ކޭޕާކާއި ސީލައިފަށްވުރެ ބޮޑު ސްކޭމެއް: ހައްޖުބޭންކް
ހައްޖު ކޯޕަރޭޝަނުން ސްކޭމް ހިންގަނީ ހައްޖު ދައްކައިގެން
ބޭނުންޖެހިފައިވާ މީހާގެ މަޖުބޫރީ ހާލަތުގެ ނާޖާއިޒު ފައިދާ ނަގައިގެން މީހުން ދަވާލުމުގައި ކޭޕާކާއި ސީލައިފަށްވުރެ ހައްޖު ކޯޕަރޭޝަނުން ހިންގާ ސްކޭމް ވަކިން ކުޑައެއް ނޫނެވެ. އަންމަޓީއާއި މަންޑޭ ސްކޭމް ހިންގީ އެޕާޓްމެންޓް ދައްކައިގެންނެވެ. ހައްޖު ކޯޕަރޭޝަނުން ސްކޭމް ހިންގަނީ އިސްލާމް ދީނުގެ އެއްރުކުން ކަމުގައިވާ ހައްޖު ދައްކައިގެންނެވެ.
ހައްޖަށް ދިޔުމަކީ ކޮންމެ ދިވެހި މުސްލިމަކު މަރުވުމުގެ ކުރިން ކުރެވޭތޯ ބަލާ ކަމެކެވެ. ހައްޖު ވާޖިބު ނުވިޔަސް ޒަމާންތަކެއް ވަންދެން ފައިސާ އެއްކޮށްގެން ވެސް ހައްޖުވުމަކީ ގިނަ ދިވެހިން ވަރަށް ބޮޑަށް އިސްކަން ދޭކަމެކެވެ. އެއްކުރާ ލާރިކޮޅު ހައްޖަށް މީހުން ފޮނުވާ ޖަމާއަތަކަށް އެއް އަހަރު ކުރިން ދީގެން ގިނަ ބަޔަކު މީގެކުރީން ހައްޖަށް ދިޔުމުގެ ނަސީބު ވަނީ ހޯދާފައެވެ. ބައެއް ފަހަރު ޖަމާއަތް ތަކަށް ފައިސާ ހަވާލު ކުރުމުން ފައިސާކޮޅަށް ޖަމާއަތުން ހިޔާނާތްތެރިވެ ހައްޖަށް ގެންގޮސްނުދީ ދެއްކި ފައިސާކޮޅު ނުލިބި ހައްޖަށް ނުދެވި މަރުވެ ގޮސްފައިވަނީ ވެސް ކިތަންމެ ބައެކެވެ.
ހައްޖަށް މީހުން ފޮނުވާ އަމިއްލަ ޖަމާއަތްތަކުން ފަހަކަށް އައިސް ފައިސާ ނަގަމުން އަންނަނީ ހައްޖަށް ދިޔުމަށް ދައްކަންޖެހޭ އަދަދު އަހަރުތެރޭގައި ބަހާލައިގެން ދައްކާ ނިންމާ ގޮތަށެވެ. ހައްޖަށް ފޮނުވުމުގެ ތަރުތީބު ކަނޑައަޅަނީ ލިބޭ ކޯޓާގެ އަދަދަށް ނިސްބަތްކޮށް ފައިސާ ދައްކާ ނިންމާ ތަރުތީބުންނެވެ. ޖައްޖު ގްރޫޕްތަކުން ނަގާ ފައިދާގެ މަންޒަރު ބަލަން ސަރުކާރަކަށް ނޯވެވުނެވެ.
ހައްޖު ކަށަވަރުކޮށް ދިނުމުގެ ނަމުގައި އެންމެ ފަހުން ސަރުކާރުން ހައްޖުކޯޕަރޭޝަން ހަދައިގެން މީހުން ހައްޖަށް ފޮނުވަން ފެށިއެވެ. ހައްޖަށް ދާން ބޭނުންވާ މީހާ ހައްޖު ކޯޕަރޭޝަނަށް ފައިސާ ދެއްކުމުން ހައްޖަށް ދެވޭނެ ކަމުގެ ޔަގީންކަން ދެމުންނެވެ. ހައްޖަށް ދިޔުމަށް މީހަކު ނިޔަތް ގެންފިނަމަ އެ މީހަކަށް ހައްޖު ކޯޕަރޭޝަނުގައި ފައިސާ ޖަމާކުރެވޭނެ ގޮތް ހަދާ ހައްޖަށް ފޮނުވަދޭނެ ކަމަށްބުނެ ފައިސާ ޖަމާކުރުވަން ފެށީއެވެ.
ރާއްޖެއަށް ލިބޭ ހުރިހާ ހައްޖު ކޯޓާއެއް ހައްޖުކޮޕަރޭޝަނުގެ ބާރުގެ ދަށަށް ގެނަސް އަމިއްލަ ޖަމާއަތްތަކަށް އެކަށީގެންވާ އަދަދަށް ކޯޓާ ނުލިބޭނެ ގޮތަށް އުސޫލުތައް ބަދަލުކޮށް ތަރުތީބު ކުރީއެވެ. ކުރިއަށް އޮތް ދިހަ އަހަރު މީހުން ހައްޖަށް ފޮނުވިޔަސް ހުސްނުވާ ވަރަށް ހައްޖު ކިޔޫ ދިގުކޮށްލީއެވެ.
އެތައްހާސް ބަޔެއްގެ އަތުން ފައިސާ ނަގައިގެން އެތައް މިލިޔަން ރުފިޔާއެއް އެއްކޮށްގެން އޭގެ އިންޓަރެސްޓް ހޯދަމުން އެ ފައިސާއިން ވިޔަފާރިކޮށް ބިންގަނެ ޕްލެޓްއަޅާ ކޯޕަރޭޝަނުގެ މުއައްޒަފުންނަށް ފްލެޓްދީ "ހައްޖު ބޭންކް"އަށް ހައްޖު ކޯޕަރޭޝަން ބަދަލުކޮށްފިއެވެ.
އެތައް ހާސް ބަޔަކު ހައްޖަށް ނުދެވިފައި ކިޔޫގައި ބައިތިއްބައިގެނެވެ. ކުރިއަށް އޮތް 5 އަހަރު ތެރޭގައިވެސް ހައްޖަށް ދެވޭނެ ކަމުގެ ޔަގީންކަން ނެތިއެވެ. ރާއްޖެއަށް ލިބޭ ހައްޖު ކޯޓާތަކުން ބައެއް ސަރުކާރުގެ ހިލޭ އެހީގައި ހައްޖަށް ފޮނުވާ 50 މީހުންނަށް ނެގުމުން ވެއިޓް ލިސްޓްގައި ތިބި މީހުން ކޮންމެ އަހަރަކު 50 އަދަދު ފަހަތަށް ޖެހެއެވެ. ފައިސާ ދައްކައިގެން އިންތިޒާރުގައި ތިބި އެތައް ބަޔަކު ހައްޖަށް ނުދެވި ދުނިޔެއަޅާ ދަނީ ވެސް މަދެއްކޮށް ނޫނެވެ.
ޑރ. ޝަހީމް ލައްވާ ހައްޖު ވިއްކައިގެން މުއިއްޒު ކުރާ ވިޔާފާރިއަކީ ނިޒާމްގެ ތެރެއިން ހިންގާ ވަރުގަދަ ސްކޭމަކަށް ނޫނީ ނުވެއެވެ. މިހާވަރުން ދަންޏާ ނަމާދަށް މިސްކިތަށް އަރާމީހުންގެ އަތުންވެސް ކޮންމެވެސް ނަމެއްގައި ފައިސާ ނެގުމުގެ ސްކޭމެއް ނުހިންގާނެ ކަމެއް ނޭނގެއެވެ.
