ނަމުން އިސްލާމް - ކަމުން އިޔަހޫދީ ސަރުކާރެއް!

ބޭރު މީހުން ދިވެހި ރައްޔިތުންނަށް ވުމަކީ ރާއްޖެއަށް އައުކަމެއް ނޫނެވެ. ދިވެއްސަކަށް ވުމަށްޓަކާ ދިވެހި މަންމައަކަށް ނުވަތަ ބައްޕައަކަށް ނިސްބަތްވުމެއް ގާނޫނު ލާޒިމެއް ނުކުރެއެވެ. މުސްލިމަކަށްވުމާއި މެދުނުކެނޑި ފަސް އަހަރު ރާއްޖޭގައި ދިރިއުޅުމުން ކިތަންމެބޭރު މީހަކަށްވިޔަސް އެމީހަކަށް ދިވެހި ރައްޔިތަކަށް ވެވޭގޮތަށް ރާއްޖޭގެ ގާނޫނުތައް އޮންނަތާ ކިތަންމެ ޒަމާނެކެވެ. އެގޮތަށް ދިވެހި ރައްޔިތުކަން ހޯދައިގެންއުޅޭ ކިތަންމެ ބަޔަކު މިހާރުވެސް ރާއްޖޭގެ ކަންކޮޅުތަކުގައި އެބައުޅެއެވެ. 

ފަރަންސޭސީ މުސްލިމް އާއިލާއެއްގެ މީހުން ނޫނަސް ވިސާނެތި ރާއްޖޭގައި އެތައް ހާސްބަޔަކު އެބައުޅެއެވެ. ދޭތެރެއަކުން އަންޑޮކިއުމެންޓް ލޭބަރުންގެ ވާހަކަ ފެންމަތިވަނީ އެހެންވެތާއެވެ. އެހެނެކޭކިޔާ ވިސާނެތި ރާއްޖޭގައި ބަޔަކު އުޅޭތޯ ބަލާ ސުވާލުކޮށްލާނެ ޕޮލިހެއް އިމިގްރޭޝަނެއް ރާއްޖޭގައި އޮންނަކަމަކަށް ނުވެއެވެ. ދިހަބާރަ އަހަރު އެއްވެސް ބަޔަކަށް ވިސާނެތި ރާއްޖޭގައި އުޅެވޭނީ ސަރުކާރުތަކުން އެކަމަށް ލޯމަރާލައިގެން ތިބީމައެވެ. 

ރާއްޖޭގައި ވިސާނެތި ފަރަންސޭސި މުސްލިމު އާއިލާއަށް އަމާންކަމާއި ރައްކާތެރި ކަމާއެކު 12 އަހަރު އުޅެވުނުހެން ދެންވެސް ރާއްޖޭގައި ނޫޅެވޭންވީ ސަބަބެއް ނެތެވެ. އެމީހުން ނިސްބަތްވާ ގައުމަކީ ނިވައިވެގެން އުޅޭ މުސްލިމު ކަނބަލުންނަށް ރައްކާތެރިކަމެއް އޮތްތަނެއް ނޫންކަން މުޅި ދުނިޔެ ދަނެއެވެ. ފަރަންސޭސިވިލާތުގައި މޫނުބުރުގާ އަޅާ އަންހެނުންނަށް ރައްކާތެރިކަން ނެތަސް ސައްތައިން ސައްތަ މުސްލިމު ދިވެހި ރާއްޖޭގައި އެފަދަ މުސްލިމު އާއިލާއަކަށް ހިމާޔަތާ ރައްކާތެރިކަން ނުދެވޭންވީ ސަބަބެއް ނެތެވެ. 

އިސްލާމް ދީނުނަށް ފުރައްސާރަކުރާ އަދި ދީނުން ބޭރުވެ ރާއްޖެ ދޫކޮށްދާ ދިވެހިންނަށް ހިމާޔަތާ ރައްކާތެރިކަންދޭ އެތައް ގައުމެއް ދުނިޔޭގައި އެބައޮތެވެ. އެކަމަކު މުސްލިމުންނަށް ވީތީ އަމިއްލަ ގައުމުގައި ރައްކާތެރިކަން ނެތިގެން ރާއްޖެއައިސް ތިބި ފްރާންސް އާއިލާއަށް ރާއްޖޭން ރައްކާތެރިކަމާއި ހިމާޔަތް ނުދެވޭންވީ ސަބަބެއް ނެތެވެ. ރާއްޖޭގައި އުޅޭ މުސްލިމް ފަރަންސޭސި އާއިލާއަށް ރާއްޖޭގައި ތިބުމަށް ގާނޫނީ އެއްވެސް ހުރަހެއް އޮތްނަމަ ރެއަކާ ދުވާލެއްގެ ތެރޭގައި ގާނޫނަށް ބަދަލު ގެނެސްގެން ވެސް ރައީސް މުއިއްޒުގެ ދީނީ ސަރުކާރުން އެމީހުން ފޮނުވާނުލާ ވާން އޮތްގޮތެއް ހަދާނުދޭންވީ ސަބަބެއް ނެތެވެ. 

ފަރަންސޭސި މުސްލިމު އެ އާއިލާ ރާއްޖޭގައި ހޭދަކުރި 12 އަހަރު އެ މީހުންގެ އުޅުމާގުޅުންތަކުން ވިސާނެތި އުޅުން ނޫން އެހެން ގޯސްތަކެއް ނެތްނަމަ އެ މީހުންނަށް ދިވެހިރައްޔިތުކަން ހައްގެވެ. އެހެނީ އެ މީހުން ރާއްޖެ އެތެރެވީ ވަގަށް ނޫން ކަމަށްވެފައި، ދިވެހި ސަރުކާރުގެ އިހުމާލުން ފުރުވާނުލެވި ތިބި ތިބުމަކީ އެ މީހުންގެ އެކަނި ޒިންމާއެއް ނޫނެވެ. 

ދިވެހިންނާ ހިތާވެގެން ކާވެނި ކުރުމުގެ ބޭނުމުގައި ނަމެއްގައި އިސްލާމްވެގެން ތިބިބައެކޭ ހީވާކަހަލަ ކިތަންމެ ބަޔަކު ދިވެހި ރައްޔިތުކަން ހޯދައިގެން އެބައުޅެއެވެ. އެހެން ނަމަވެސް ދިވެހި ރައްޔިތަކަށް ވުމުގެ ހުރިހާ ޝަރުތެއް ފުރިހަމަ ވެފާތިބި މުސްލިމް ފަރަންސޭސި އާއިލާއަކަށް ދިވެހިންނަކަށް ނުވެވުނެވެ. އެކަމަކު ބުނަންހެއްޔެވެ. އެ މީހުނަށް ރައްކާތެރިކަމާއި ހިމާޔަތްނުދީ ނުރައްކަލުގެ ތެރެއަށް ފޮނުވާލުމަކީ ސައްތައިންސައްތަ އިސްލާމީ ދިވެހި ރާއްޖެއަށް ލިބޭ ވަރަށްވެސް ބޮޑު ހުތުރު ނަމެކެވެ. ދިވެހިންނަކީ އިންސާނިއްޔަތުކަމެއް ނެތް ބައެއްގެ ގޮތުގައި ލޭބަލްވެގެން ދާނެކަމެކެވެ. ފަރަންސޭސި މުސްލިމު އާއިލާގެ މައްސަލާގައިވެސް މިހާރުގެ ސަރުކާރުން ދައްކަމުން އެދަނީ އިޒްރޭލް ޕާސްޕޯޓް ބޭންކުރުމުގައި ދައްކަމުންދާ ފަދަ މުނާފިގުކަމެވެ.  

ކަމަކީ ކުޑަކުދިންތަކެއް ހިމެނޭ މައްސަލައެއްކަމަށްވާތީ އެ ކުދިންގެ މަސްލަހަތަށް ރިއާޔަތްކުރަންވެސް ޖެހޭނެއެވެ. މުސްލިމުން އެކަކު އަނެކަކުގެ މައްޗަށް އޮންނަ އޯގާތެރިކަމަކާއި ޒިންމާއަކުން ރާއްޖެއަކަށް ރެކެވިގެން ނުވާނެއެވެ. ރާއްޖޭގައި ވިހާ ބޮޑުވަމުންދާ ކުދިބަޔަކަށް އެކަށީގެންވާ ތައުލީމު ނުލިބި ބޮޑުވަމުން އައުމަށް ދޫކޮށްލެވިގެންވެސް ނުވާނެއެވެ. ޒާތްޒާތުގެ ފިޔަވަޅުއަޅާ ބޮޑު ކަންތައް ގަނޑަކަށް އެކަން ހެދުމުގެ ބޭނުމެއް ނެތެވެ. އޭގެ ބަދަލުގައި 12 އަހަރަށްވުރެ ގިނަ ދުވަހު މެދުނުކެނޑި ރާއްޖޭގައިއުޅެ، ރަނގަޅަށް ދިވެހި ބަހުން ވާހަކަދައްކާ، އިސްލާމީ އެ އާއިލާ ދިވެހި ރައްޔިތުންނަށް ހެދުން ހުރިހާ ގޮތަކުންގެސް އައުލާކަން ބޮޑެވެ.