މޯދީ ގެރިއަށް އަޅުކަން ކުރާކަމަަކަށް މިހާރަކުނުވޭ!

މުއިއްޒު ވެރިކަމަށް އިންތިހާބުވުމުންވެސް އަލް ޖަޒީރާގައި ބުނީ ސާފު އަދަދު ނޭނގުނަސް 2000އަށްވުރެ ގިނަ އިންޑިޔާ ސިފައި ރާއްޖޭގައި ތިބި ކަމަށެވެ. ވެރިކަމަށް ހުވާކުރުމާއެކު އެ އެންމެން ބާލާނެ ކަމަށް ވެސް ބުންޏެވެ. އެވަރުން ފުއްދާލީއެއް ނޫނެވެ. ވެރިކަމަށް ހުވާކޮށްފައި ދިން ތަގުރީރުގައިވެސް ދެއްކީ އެވާހަކައެވެ. އިންޑިއާއިން ރާއްޖޭގެ ސިޔާދަތަށް އަރައި ގަންނަމުން ދާވާހަކަ އަޑަށް ބަރުލާފާ ދެއްކިއެވެ.   

ކުރީ ސަރުކާރުގެ ވެރިންނަށް އިންގޮނޑިން ތެދުވެ އަނެއް ގޮނޑިއަކަށް ދެވެނީވެސް އިންޑިޔާ އެންބަސީގެ ހުއްދަ ލިބިގެން ކަމަށް ބުނެ އަނގަފުޅާ ކުރީވެސް މުއިއްޒެވެ. ވެރިކަން ލިބުނު ވެސް ފަހުންނެވެ. ސައިޒުން ކިތަންމެ ކުޑަޔަސް ރާއްޖެއަކީ އިންޑިއާގެ ބެކްވާރޑްގައި އޮތް ގައުމެއް ނޫންކަމަށާއި އިންޑިއާއިން ރާއްޖެއަށް ބްލީ ކުރާކަމަށް ބުނީ ދެވަނަ މީހެއް ނޫނެވެ. ރައީސް މުއިއްޒެވެ. 

އިންޑިއާ އައި ދެކޮޅަށް ވައްވައް ނުޖަހާ މީހަކު މުއިއްޒު ސަރުކާރުގެ ސިޔާސީ މަގާމަކަށް ކުފޫ ހަމައެއް ނުވެއެވެ. ޝިއުނާއެއް މަލްޝާއެއް ކިޔާނެކަމެއް ނެތެވެ. ދެންމެ ދެންމެ ހިވީ އިންޑިއާ އާއި ދެކޮޅަށް ހަނގުރާމަ އިއުލާނު ކޮށްފާނެހެންނެވެ. އެހާވެސް ފަލަކޮށް ސިޔާދަތުގައި ރަތް ރޮނގު އޮތީ ދަމާފައެވެ. 

ތުރުކީއަށާއި ޗައިނާއަށް ދަތުރެއް ކޮށްލެވުނީމާ ވަކީން ހީވީ ދުނިޔެ ރަންވިހެންނެވެ. އޭރު ބުނަމުން އައީ ކޮން އިންޑިއާއެއް ހެއްޔެވެ. ބަލިމީހުން އާސަންދައިން އިންޑިއާއަށް ފޮނުވުން ހުއްޓާލާ ދޭޝް8 ގައި ބަލިމީހުން ގެންދާނީ ބެންކޮކަށް ކަމަށް ބުންޏެވެ. އާސަންދައިގެ ދަށުން ބޭސްކުރުން އިންޑިއާގެ ބަދަލުގައި ބެންކޮކާއި ދުބާއީން ހަމަޖައްސާނެ ކަމަށް ބުންޏެވެ. ނުވިތާކަށް ރާއްޖޭގެ ރަސްމީ މައި ހޮސްޕީޓަލަކީ އިންދިރާ ގާނދީ މެމޯރިއަލް ހޮސްޕިޓަލް ނޫންކަމުގައި ނިންމާ ރަސްމީ މައި ހޮސްޕިޓަލަކީ ދަރުމަވަންތަ ކަމަށް ހަމަޖެއްސިއެވެ. 

އެއަރ އެންބިއުލާންސް ހަދާ ދަތުރުތައް ލަންކާއަށް ކުރަން ފެށިއެވެ. ދުބާއީއާއި ބެންކޮކަކަށް އަދި އެންމެ ދަތުރެއްވެސް އެއަރ އެމްބިއުލާންސް ނުކުރެއެވެ. އަނެއްކޮޅުން އާސަންދައިން ފަތުއަޑު ކިޔާފައި އިންޑިއާއަށް ބޭހަށް މީހުން ފޮނުވުމެއް ނުހުއްޓުވުނެވެ. 

ރާއްޖޭގެ ރައްޔިތުންނަށް ބޭނުންވާ ކާޑު މެދުނުކެނޑި ތުރުކީން ލިބޭނެ ކަމަށްވެސް ބުންޏެވެ. ހުސްވި ޑިސެމްބަރުގައި ކާޑު ބަރުކޮށްގެން ތުރުކީން ރާއްޖެއަށް ނައްޓާލި ބޯޓު އަދި ބަނދަރު ނުކުރެއެވެ. ފިޔައާއި ބިހާ އަލުވި ޕާކިސްތާނުން ގެނެސް ދަތިނުވެ ލިބެން ހުންނަ ގޮތް ހަދާކަމަށް ބުންޏެވެ. އެބުނި ޕާކިސްތަނު ޝިޕްމަންޓްތައް ދިޔައީ ކަންދަހާރަށް ނޫންކަމެއް ނޭގެއެވެ. 

މުއިއްޒު ރާއްޖެއާއިގެން އިންޑިއާ ނޫންގޮތެއް ހޯދަން ތެޅެގަތްގަތީނުން ފޭބީ ހުޅުނބެވެ. އެމެރިކާގެ ސްޓޭޓް ޑިޕާޓްމަންޓުން އައި ބަޔަކު އައިސް މުއިއްޒަށް ކުޑަ މިސުރު ދައްކާލުމުން ކީހާޅެން ފަރިއްސަށްވެ ނިމުނީއެވެ. ގޮތް ހުސްވެ އަތްފައި ފިނިވީއެވެ. އިންޑިއާ އެޅިހާ ބަތަކަށް މުއިއްޒަށް ޖެހުނީ ރިހަވާށެވެ.

ބާލަން ގަދަފައި ވިއްދި އިންޑިއާގެ ހެލްކޮޕްޓަރުތަކާއި ޑޯނިޔާ ބޯޓު ޖެހުނީ ބާއްވާށެވެ. މަދަނީންގެ ނަމުގައި އަސްކަރީ މީހުން ގެނެސްގެން ޖެހުނީ ބައިތިއްބާށެވެ. ސެނަހިޔާއިން އެންމެ އަސްކަރީ ޑޮކްޓަރަކުވެސް ފޮނުވައެއް ނުލެވުނެވެ. އިންޑިއާގެ ފިޔާ ކޯޓާ ދޫކޮށްލާ ދިނުމަށް ޖެހުނީ އާދޭސް ކުރާށެވެ. އިންޑިއާގެ ލޯނުތައް ރިޝެޑިއުލުކޮށް ދަންމާލުމަށް ދެފައިތަޅާ ޖެހުނީ ރޯށެވެ. 

އިންޑިއާއިން ފައުޖުތައް ގެނެސް ރާއްޖޭގައި އިންޑިއާ ސިފައިން ބައިތިއްބަން އެއްވެސް އިރަކު އުޅުނު ކަމަކަށް މިހާރަކު ނުވެއެވެ. އިންޑިއާއި ރާއްޖޭގެ ގުޅުން އެއްވެސް ވަރަކަށް ގޯސް ވީކަމަކަށްވެސް މިހާރަކު ނުވެއެވެ. އިންޑިއާގެ ފަތުރުވެރިން ރާއްޖެ ބޮއިކޮޓް ކުރި ކަމަކަށްވެސް ނުވެއެވެ. އިންޑިއާއިން ފަތުރުވެރިން ރާއްޖެ ގެނައުމަށް ދެފައިމައްޗަށް ތިރިވެ ސަލާން ޖަހަނީއެވެ. މިހާރަކު މޯދީ ގެރިއަށް އަޅުކަންކުރާ ކަމަކަށްވެސް ނުވެއެވެ.