އެއް އާއިލާއެއްގެ ދެކުދިން ޝަހީދުކޮށްލައިފި

ޣައްޒާގެ އުތުރުގައި އިސްރާއީލުން ދިން ޑްރޯން ހަމަލާއެއްގައި އެއް އާއިލާއަކަށް ނިސްބަތްވާ ދެ ކުޑަކުދިން ޝަހީދުކޮށްލައިފިއެވެ. މިއީ ހަމާސްއާއެކު ވެފައިވާ ހަނގުރާމަ ހުއްޓާލުމުގެ އެއްބަސްވުމާ އިސްރާއީލުން ޚިލާފުވި ކަމަށް ބުނާ އިތުރު ހާދިސާއެކެވެ.

މި ހަމަލާ ދީފައިވަނީ ކަމާލް އަދުވާން ހޮސްޕިޓަލް ކައިރިން އާންމުން ތަކެއް ދަރު ހޮވަން އުޅެނިކޮށެވެ. އާންމުންނަށް މިފަދަ ނުރައްކާތެރި ހާލަތަކަށް ކުރިމަތިލާން ޖެހިފައިވަނީ ތެލުގެ ދަތިކަން އިންތިހާއަށް ބޮޑުވެ، ފިނި މޫސުމުގެ ގަދަ ފިނީގައި ހޫނުކަން ހޯދާނެ އެހެން ގޮތެއް ނެތުމުގެ ސަބަބުންނެވެ.

ވަގުތީ ފޭލިގެތަކުގައި ދިރިއުޅެމުންދާ ފަލަސްތީނުގެ ރައްޔިތުން މޫސުމީ ގޮންޖެހުންތަކާ ކުރިމަތިލަމުންދާއިރު، އިސްރާއީލުން ދަނީ އިންސާނީ އެހީގެ ސާމާނާއި، ފޭލިގެ އަދި އިމާރާތްތައް މަރާމާތުކުރަން ބޭނުންވާ ތަކެތި އެތެރެކުރުމަށް ހުރަސްއަޅަމުންނެވެ.

އޮކްޓޯބަރު މަހު ހަނގުރާމަ ހުއްޓާލުމުގެ އެއްބަސްވުން އަމަލީގޮތުން ފެށުނު ފަހުން، އިސްރާއީލުން އެތައް ސަތޭކަ ފަހަރަކު އެއްބަސްވުމާ ޚިލާފުވެފައިވާ ކަމަށް ރިޕޯޓުތައް ބުނެއެވެ. ޣައްޒާގެ ހެލްތު މިނިސްޓްރީން ހާމަކޮށްފައިވާ ގޮތުގައި، އޮކްޓޯބަރު 11 އިން ފެށިގެން މިހާތަނަށް ފަލަސްތީނުގެ 481 މީހުން ޝަހީދުވެ، 1,206 މީހުން ވަނީ ޒަޚަމްވެފައެވެ.

އަދި 2023 ވަނަ އަހަރުގެ އޮކްޓޯބަރު 7 އިން ފެށިގެން ޖުމްލަ 71,000 އަށްވުރެ ގިނަ މީހުން ވަނީ ޝަހީދުވެފައެވެ. މީގެ އިތުރުން، މި ފިނި މޫސުމުގައި ގަދަ ފިނީގެ ސަބަބުން މަރުވި ކުޑަކުދިންގެ އަދަދު މިހާރު ވަނީ 10 އަށް އަރާފައެވެ.

ހަމަ އެއާއެކު، އެމެރިކާގެ މަންދޫބުން ވަނީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާ ބައްދަލުކޮށް ޣައްޒާގެ މަސްލަހަތާ ގުޅޭގޮތުން މަޝްވަރާކޮށްފައެވެ. މި ބައްދަލުވުމުގައި އެމެރިކާއިން ވަނީ ޣައްޒާ އަލުން އާބާދުކުރުމަށް "ނިއު ޣައްޒާ" ގެ ނަމުގައި މަޝްރޫއެއް ހުށަހަޅާފައެވެ.

މިއީ އިސްރާއީލުން އެއްބަސްވުންތަކާ ޚިލާފުވަމުންދާ ދަނޑިވަޅެއްގައިވެސް، ހަނގުރާމަ ހުއްޓާލުމުގެ އެއްބަސްވުން ދެމެހެއްޓުމަށް ކުރެވޭ މަސައްކަތެއްގެ ގޮތުގައި ބެލެވެއެވެ.