މީޑިއާ ކަސްތަޅު ބިލް ބޭރުނުކޮށް ދޭނެ ލަފައެއް މަޝްވަރާއެއް ނެތް
މާ ގިނަ ބަހަނާ ނުދައްކާ މީޑިއާ ކަސްތަޅު ބިލު މަޖިލީހުން ބޭރުކުރާށެވެ. ތިޔަ ބިލަކަށް ދޭނެ އެހެން ހިޔާލެއް ކުރާނެ އެހެން ބަހުސެއް ނެތެވެ.
ނޫސްވެރިކަމުގެ އާޖުފާޖު ނޭނގޭ ބަޔަކު ޖަޒްބާތުގައި ހަސަދަ ފިލުވާ އެއްޗަކަށް ގާނޫނު ހަދަން ތިޔަހުންނަނީ ހާދަވަރެކެވެ. މުއިއްޒާއި ނަމިރާ ނަޒިމާއި ބަންޑާރަ އުޝާމާއި ތުޅާދޫ ހަމީދާ ހަންނާނަށްވުރެ މިގައުމު މާބޮޑެވެ.
އޮޅެގެން ނޫޅޭށެވެ. ހުރިހާ މީޑިއާއަކީ ތިމާބޭނުންވާ ވާހަކައަކާއި ތިމާ ބޭނުންވާ ކަމެއް ބޭނުންވާ ގޮތަށް ފަތުރާކަށް އޮންނަ އަމިއްލަ ޕްރޮޕަގެންޑާ މެޝިނެއް ނޫނެވެ. އެކި މީޑިއާގެ ކޮންޓެންޓް ތަފާތުވާނެކަން ތުއްތު ކުއްޖާއަށްވެސް އެނގޭނެއެވެ.
ކުރާނެހާ ގޮތަކަށް ކުރާނެހާ ކަމެއްކުރާއިރު އެވާހަކަ ދައްކާނެއެވެ. އަބުރު ގެއްލޭ ގޮތަށް ހިތުހުރިކަމެއް ކުރަމުން އަބުރޭ ނުކިޔާށެވެ. ވައްކަން ކުރަންޏާ ވައްކަން ކުރާވާހަކަ ދައްކާނެއެވެ. ވަގަކު ވައްކަން ކޮށްފައި އެއްބަސްނުވެ ނުކުރާ ވައްކަމަކަށް ހަދަން އަނގަ ބަންދުކުރިޔަސް ވައްކަން ނުކުރާކަމަކަށް ނުވާނެއެވެ.
ނޫސްވެރިކަމުގައި ތަޅުއަޅުވަން އަބުރުގެ ވާހަކަ ދައްކަނީ ހިންގާ ޖަރީމާ ގިނަ ކަމުންނެވެ. އަބުރު ކޮނޑަށްލައިގެން މިނިވަން ނޫސްވެރިކަން ހިސޯރު ކުރަން ގަދަފައި ވިއްދާނެ ކަމެއް ނެތެވެ. ތިޔަ ބިލަކަށް ދޭނެ ލަފައެއް މަޝްވަރާއެއް ނެތެވެ. އިތުރަށް ބަރަހަނާނުވެ ރީތިގޮތުގައި ކަންކަން ކުރަން ބޭނުމިއްޔާ މިނިވަން މީޑިއާ އޮޅުއަޅާ ބިލު ފުރަތަމަ ބޭރުކޮށްލާށެވެ.
