މުއިއްޒު ބޭނުމީ މަހުޖަނުން ބަނގުރޫޓްކޮށްލަން

މުއިއްޒު ސަރުކާރުގެ ސިޔާސީވެރިންގެ ގޮތުގައި ބޮޑު މުސާރަ ނަގައިގެން ތިބި އެތައް ބަޔަކު އެއްވާނަކަށް ސޯޝަލް މީޑިއާގައި އިންޑިއާއަށް ފުރައްސާރަ ކުރިއެވެ. ހަޖޫ ޖެހިއެވެ. އިންޑިއާގެ ބޮޑުވަޒީރު މޯދީއަށް ނުކިޔާ ހުތުރު އެއްޗެއް ނުޖައްސުވާ ހުތުރު ސިފައެއް ނެތެވެ. ދުނިޔޭގެ އެންމެ ބޮޑު އާބާދީއާއި ޖެހިގަތް އިރު ހީވީ ރާއްޖެއަކީ ދުނިޔޭގެ ސްޕަރޕަވަރު ހެންނެވެ. ދުވަހަކުވެސް އިންޑިއާގެ މުއްޕަތަށް ނުވެއްޓި މޭފުއްޕާފައި އުޅެވެން އޮތް ބައެއްހެންނެވެ. 

ބަޅުވާ ނައިބާއި ބޯފިތުނު ނައިބު އިސްވެ ތިބެ "ގެރިގޮރު" ފުޅިފުޅިން މޯދީއަށާއި އިންޑިއާއަށް ދިނީ އޮތް ގައުމީ ލޯތްބެއްގެ ބޮޑުކަމުންނޯލައެވެ. ފަތުރުވެރިއެއްގެ ގޮތުގައި ނުވަތަ އެނޫން ގޮތަކަށްވެސް ދުވަހަކު އިންޑިއާ މީހަކު ރާއްޖެނަޔަސް ތިބީ ވަރިހަމަވެފައެވެ. އިންޑިއާ އައުޓް އޮތީ މެކްހުގައެވެ. ކުޑަ ގޮތެއް ހަދާލިޔަސް އިންޑިއާ އާއި ދެކޮޅަށް ހަނގުރާމަ އިއުލާނުކުރަންވެސް ތިބީ ރެޑީގައެވެ. 

އެހާ ހިސާބަށް ދިޔައިރުވެސް ހީކުރެވުނީ ސިޔާސީ ވެރިންތަކެއް ކުރިޔަސް މިވަރުކަމެއް މިކުރަނީ ރައީސް މުއިއްޒަށް އެއްވެސް ވަރަކަށް ނޭނގި ކަމަށެވެ. ޗައިނާ ދަތުރުން އެނބުރިއައިސް މާލެ ނާރާ ވަށިވަށީން އިންޑިއާއަށް މުއިއްޒު ދިނުމުން އެނގި ކަށަވަރުވީ ބަޅުވާ ނައިބުމެން އިންޑީއާއަށް ފުރައްސާރަކުރީ މުއިއްޒު ބޭނުންވެގެން މުއިއްޒު ބުނެގެން ކަމެވެ.

ރާއްޖޭގެ ފަތުރުވެރި ކަމުގެ އެންމެ ބޮޑު މާރކެޓުން ރާއްޖެ ބޮއިކޮޓް ކުރުމުން ފަތުރުވެރިކަން ބޮޑުތަނުން ދަށަށް ދިޔަސް ވަރިހަމަވެފާ މުއިއްޒު ހުރުމުގައި ސިއްރެއް އޮންނާނެއެވެ. ޓޫރިޒަމް ސިނާއަތުގައި އިންޑިއާ މާރކެޓް އެއްވަނައިން ފަސްވަނައަށް ވައްޓާލުމުގައި އިސްވެތިބި ބަޅުވާ ނައިބާއި ބޯފިތުން ނައިބު ސަސްޕެންޝަނުގައި ބައިތިއްބައިގެން މުސާރަދީ ފަހުން ސަރުކާރު ދެ ކުންފުނިން އެ ދެ މީހުނަށް މުސާރަ ދީފައި މީހުނަށް ފުރައްސާރަ ކުރަން ބައިތިއްބާނީ މުއިއްޒު ލައްކަ ބޭނުން ކަމަކަށް ވާތީތާއެވެ. 

ކަންކަން ރޭކާ މިލަނީ އަދިކިރިޔާއެވެ. މުއިއްޒު އަޅައިގަނެ ފިތިބާރުވެގެން މިއުޅެނީ އިންޑިއާއަކާ ނޫނެވެ. މުޅިން އެހެން ބަޔަކާއެވެ. މިހާރު ބަޅުވާ ނައިބުމެންގެ ފުރައްސާރަ ކުރުން އަމާޒުވެފާ ހުރީ ރާއްޖޭގައި ތިބި ރާއްޖޭގެ ރިސޯޓް އޯނަރުން ކަމުގައިވާ ހައެއްކަ ދިވެހި މަހުޖަނުންނާއެވެ. ރައްޔިތުންގެ ފަޅިއާއި މަހުޖަނުންގެ ފަޅި ބަހައިގެން ރައްޔިތުންގެ ހިތުގާ މަހުޖަނުންނަށް ނަފްރަތު އުފައްދާށެވެ. މުއިއްޒު ބޭނުން ވެގެން އުޅެނީ އެމީހުންގެ މުއްސަދިކަން ފޭރިގަންނާށެވެ. އާރާ ބާރުގެ ބޭނުން ކޮށްގެން ރާއްޖޭގައި ތިބިހާ މަހުޖަނުން ފުޑާލާށެވެ. ޓޫރިޒަމް ފުނޑުނަސް ބައެއްގެ ވަޒީފާ ގެއްލުނަސް ގައުމު އިނދަޖެހުނަސް ރާއްޖޭގައި ތިބި މަހުޖަނުން ކޮޅު ބަނގުރޫޓްކޮށްނުލާ މުއިއްޒަށް ހަމަނޭވާ ނުލެވޭނެއެވެ.