މުއިއްޒު ރައްޔިތުން ކިބައިން މި ހިފަނީކޮން އިންތިގާމެއް! ކޮން ރިވެންޖެއް!
ރިސޯޓް އޯނަރުން ރާއްޖެ ދޫކޮށް ވިޔަފާރިއަށް ފަހި އެހެން ތަންތަން ހިޔާރުކޮށްފާނެ!
މުއިއްޒުގެ ސަރުކާރުން ބޭނުންވަނީ ރިސޯޓްތަކުގެ މުއައްޒަފުންނަށް ޑޮލަރުން މުސާރައާއި ސާވިސްޗާޖު ދިނުން ހުއްޓުވާށެވެ. ޓޫރިޒަމް އިންޑަސްޓްރީގެ ވެރިންނާއި މުވައްޒަފުން ޖައްސައި ފިތުނަ އުފައްދައިގެން ޓޫރިޒަމުން ރައްޔިތުމީހާގެ ޖީބަށް ވަންނަ ޑޮލަރުކޮޅު ވަނަ ނުދޭށެވެ. މުއިއްޒާއި އޭނާގެ އައުވާނުން ނާޗަރަންގީ ކުޅެން ރާއްޖޭން ބޭރަށް އުދުހެން ޑޮލަރު ބައްކުރާށެވެ.
ރިސޯޓްތަކުގެ މުއައްޒަފުންނާއި އެމީހުންގެ އަބިދަރިންނާއި އާއިލާތައް ލޯހުޅުވާ ހޭލާށެވެ. ޑޮލަރު މާރުކުރަން މަޖުބޫރުކުރުވާ ސަރުކާރުގެ ސިޔާސަތާ ދެކޮޅު ހަދައި ހައްގު ހޯދުމަށާއި ސަރުކާރު ޖަވާބުދަރީ ކުރުވުމަށް ޓޫރިޒަމް އިންޑަސްޓްރީ މުވައްޒަފުންނާއި އާއިލަތަކުން ތެދުވުމުގެ ވަގުތު ޖެހިއްޖެއެވެ.
"ދިވެހި ރައްޔިތުން ނިދިން ހޭލާ ހައްގު ހޯދުމަށްޓަކައި ހައްގު ބަސް ބުނަންވީ ވަގުތު މީ،" ކަމަށް ވެލިދޫ ދާއިރާގެ އިއްޒަތްތެރި މެންބަރ މުހައްމަދު އައްބާސް ވިދާޅުވާނީ ގައިމު އެކަމުގައި ނުރައްކާތެރި ކަންތައްތަކެއް އޮވެގެންނެވެ. މިކަމުގައި ބަސް ނުބުނެފި ނަމަ މުވައްޒަފުންނަށް ލިބޭ ގެއްލުން ވަރަށް ބޮޑުވެދާނެ ކަމަށް އައްބާސް ވިދާޅުވެއެވެ.
ވިސްނާ ފިކުރުކުރާށެވެ. ދިވެހިރާއްޖޭގައި ބައިނަލްއަގުވާމީ ހޮޓެލް ޗެއިންތަކުން ހިންގާ ރިޒޯޓުތައް ވަރަށް ގިނައެވެ. އެ ތަންތަނުގެ ދާއިމީ ވަޒީފާގައި އެތަކެއް ހާސް ދިވެހިން އެބައުޅެއެވެ. ރިސޯޓުތަކުގައި ވަޒީފާގައި އުޅޭ ގިނަ މީހުންގެ އަނބިދަރިން ތިބެނީ މާލޭގަޔާއި ރާއްޖޭން ބޭރުގައި ކުށްޔަށެވެ. އުފަން ރަށުގައި އަނބިދަރިން ބައިތިއްބައިގެން އުޅޭމީހުން ދާދިމަދެވެ.
ސަރުކާރަކުން ހިންގާ ގާނޫނެއް ނުވަތަ ގަވާޢިދަކާއި ބައިނަލްއަގުވާމީ ހޮޓެލް ޗެއިންތަކުން ހިތްހަމަ ނުޖެހިއްޖެނަމަ ރިޒޯޓުތައް ބަންދުކޮށްލައިގެން ވިޔަފާރިނުކޮށް ހަތަރު ފަސް އަހަރު ތިބޭކަށް އޭގެން ގިނަ މީހުން ޖެހެލުމެއް ނުވާނެއެވެ. އެވަރުގެ ބާރު އެވެރިންގެ ޖީބުގައި ހުންނާނެއެވެ. ނިކަމެތިވެ ގޮތް ހުސްވާނީ ވަޒީފާ އަދާކުރާ ދިވެހި މީހާއަށެވެ.
އޭރުން އެތަންތާ ވަޒީފާގައި ތިބި ދިވެހި މުއައްޒަފުންގެ ވަޒީފާގެއްލި މުސާރަ ނުލިބި، ކުއްޔަށް ތިބި އަނބިދަރިން ތިބި ތަންތަނުން ނެރެ އެ ތަންތަން ހުސްކުރުމުން މަގުމަތި ވާނީ ދިވެހި އެތައް އާއިލާއެކެވެ. އެންމެ ފަހުން ކިޔަވަން ތިބި ދަރިން ޔުނިވަރސިޓީތަކާއި ކޮލެޖުތަކާ ސްކޫލުތަކުން ކަނޑާލައިގެން އެނބުރި ދާންޖެހޭނީ އުފަން ރަށަށެވެ. މަތީ ފާސްތައް ނެގުމުގެ އުންމީދުގައި ކިޔަވަން އުޅުނު ހުރިހާ ދަރިވަރުން ތިބޭނީ ކަޅުއޮށް ބާނަށް ގޮނޑުދޮށުގައި ކަކުނި ކޮންނާށެވެ.
މާލޭ މީހުން މާލޭގައި ދަރަނި ނަގައިގެން ބިނާކުރި އިމާރާތްތައް ހުންނާނީ ހުހަށެވެ. އޭރުން ދިމްޔާތުވެސް ހަމަ ހުންނާނީ ފަޅަށެވެ. ބަނޑަށް ޖެހެނީ ވަޒީފާ ގެއްލުނު ދިވެހިންގެ އާއިލާތަކާއި ލިބޭ ކުލިން ކައިގެން ބޮއެގެން އުޅޭ މާލޭ މީހުންނެވެ. ރިސޯޓް އޯނަރުންނާއި ފައިސާ ވެރިން ރާއްޖެ ދޫކޮށް ވިޔަފާރިއަށް ފަހި އެހެން ތަންތަން ހިޔާރު ކުރާނެއެވެ.
ސަރުކާރުގެ ބޯގަޅި ސިޔާސަތުން ގެއްލުން ލިބޭނީ އެކެއް ދެމީހަކަށް އެއްތަނެއް ދެތާކަށް ނޫނެވެ. މުޅި ދިވެހި ގައުމަށެވެ. މުއިއްޒު ރައްޔިތުން ކިބައިން މި ހިފަނީކޮން އިންތިގާމެއް ހެއްޔެވެ! ކޮން ރިވެންޖެއް ހެއްޔެވެ!
