މީޑިއާ އާއި ހަނގުރާމަ އިއުލާނު ކުރުމުން އިތުރުވާނީ ކުރުސީ
ރާއްޖޭގެ މީޑިއާ އާއި ދެކޮޅަށް މުއިއްޒު ސަރުކާރުން މިހާރު ހިންގަމުންދާ ނޭއްގާނި ހަރަކާތުން ފޫނުބެއްދޭ ވަރުގެ ބޮޑެތި ގެއްލުން ގައުމާ ރައްޔިތުންނަށް ނުލިބިއެއް ނުދާނެއެވެ. މީޑިއާ ރެގިއުލޭޓް ކުރުމުގެ ނަމުގައި ހީލަތްތެރި ކަމާއެކު މީޑިއާ ކަސްތަޅު އަޅުވާ ނޫސްވެރިން އުލުބައިންދަން އުޅުމަކީ ނޫސްވެރިކަމާ ދެކޮޅަށް ސަރުކާރުން ހަނގުރާމަ އިއުލާނު ކުރުމެވެ.
މީޑިއާ ޒިންމާދާރު ކުރުވުމާއި ރެގިއުލޭޓް ކުރުން އެއްފުރާޅެއްގެ ދަށަށް ގެނައުމަކަށް އެއްވެސް މީޑިއާ އަކުން އެއްވެސް އިރަކު ދެކޮޅެއް ނުހަދައެވެ. ރާއްޖޭގައި މިހާރު ހުރި ގާނޫނުތަކުން ވެސް ޒިންމާދާރު ނޫސްވެރިކަން ކުރުމަށާއި ޖަވާބުދާރީ ކުރުވުމަކަށް ހުރަހެއް ނެތެވެ.
މުޅި މިޑިއާއަކީ ސަރުކާރުން ބޭނުންވާ ކަމެއް ނޫނީ ހާމަ ނުކުރެވޭ ވަރަށް ތަޅުލެވިފާވާ އެއްޗަކަށް ވެއްޖެނަމަ ގައުމަށާއި ސަރުކާރަށް އޮތް ނުރައްކާ ބޮޑެވެ. އޭގެ އެތައް މިސާލު އެބަހުއްޓެވެ.
ސަރުކާރާ ދެކޮޅަށް ސަރުކާރުގެ ތެރެއިން ބަގާވަތެއް ރޭވި ފައްކާވިޔަސް ދޮންކަޅު ނޭގި ރައީސް މަގާމުން ދުރުކުރާ ހިސާބަށް ދިޔަސް ހިލަމެއް ނުވާނެއެވެ. ރައީސަށް ސިއްރުން ސަރުކާރުތެރޭގައި ތިބި ބަޔަކު ދައުލަތް ނޮޅާކައި ހުސްކުރިޔަސް ދޮންކަޅު ނޭނގޭނެއެވެ.
ގާނޫނީ އިމުގެތެރެއިން ރަޖިސްޓްރީ ކޮށްގެން ފާޑުކިޔުން ހުއްޓުވާލުމުން ޑާކް ވެބްގައި ކޮންބައެއް ކުރާކަމެއްކަން ނޭނގޭ ގޮތަށް އެތައް ސައިޓެއް ހިންގާ ދޮގު ވާހަކަތަކާއި ވަކިވަކި ފަރުދުންގެ ބަރަހަނާ މަންޒަރުތަކާ ގައުމީސަލާމަތަށް ނުރައްކާވާ ކަންކަން މާބާރަށް ފެތުރޭނެއެވެ. މާރާމާރިއާއި އަނިޔާވެރިކަމާއި ޓެރެރިޒަމަށް ހިތްވަރު ދިނުން ހައްދުން ނެއްޓޭނެއެވެ. އެތައް ހާސް ކުރުސީ އަކާއި ޑީއޯއެއް އުފަންވާނީއެވެ.
