މަރުގެހުކުމް ތަންފީޒުނުކޮށް ފާޅުކުރަނީ މުނާފިގުކަން!

ޑރ. މުއިއްޒު ރާއްޖޭގެ ވެރިކަމަށް އައީ އިސްލާމް ދީނަށް ނަސްރު ދިނުމުގައި ދެވަނައެއް ނެތް ސަރުކާރަކަށް މުއިއްޒު ސަރުކާރު ވާނެ ކަމުގެ ދޮގުވައުދާ އެކުގައެވެ. ރާއްޖޭގައި އިސްލާމް ދީނުގެ ހުކުމްތައް ތަންފީޒު ކުރުމުގައި ފަސްނުޖެހޭނެ ކަމަށް ބުނެ ސަލަފީންގެ ރައީސްގެ ގޮތުގައެވެ. 

ވެރިކަމަށް އަހަރު ވެއްޖެއެވެ. އީދުގާ ކުލަބޮކި ދިއްލާ ހަވާއަރުވާ ދީނުގެ ނަމުގައި ބޮޑެތި އިސްރާފް ކުރުން ނޫންކަމެއް ކުރެވުނު ތަނެއް ނުފެނެއެވެ. މިޔުޒިކާ ލަވައިގެ ފޯރި އިހުނަށް ވުރެ ބޮޑަށް ހިއްޕާލާފައި އޮތްއިރު ދީނުގެ ރުކުންތަކުން ކުރަނީ ވިޔަފާރިއެވެ. ގެއްލި އުވެނެތިފައިވާ ބުޑިސްޓް ސަގާފަތް ގައުމިއްޔަތުގެ ނަމުގައި ކުރިއަރުވަން އޮތީ ފޫގަޅާފައެވެ. 

ދޮގު ހެދުމާއި މަކާރާ ހީލަތާއި ހިޔާނާތާއި ކޮރަޕްޝަނުން މުޅި ސަރުކާރު އޮތީ ފޯވެ ތަތްތެޅެފައެވެ. ވައުދެއް ވެއްޖެނަމަ ހިލާފު ނުވުމަކީ މުއިއްޒަށް އައިބުކަމެކެވެ. ބޮޑާކަމާއި ކަންދެއްކުމާއި އިސްރާފް ކުރުމަކީ މުއިއްޒުގެ ސުންނަތަށް އޮތީ ހަދާފައެވެ. 

އައްޑަން ގަޑިން ގާނޫނު އަސާސީ ބަދަލުކޮށްލެވޭ ވަރަށް ބާރު ލިބިގެންހުރެ އިސްލާ ޝަރީއަތާ ތައާރަޒުވާ ގޮތަށް ހުރި ގާނޫނުތައް ބަދަލުކުރާކަށް ނޫޅެއެވެ. ޗާރީއަތުން ރިބާ ނަގާދޭ ދިނުން ހުއްޓުވުމުގެ ނިޔަތެއް ނެތެވެ. ވައްކަން ކުރުމާއި ޒިނޭކުރުން އާއްމުވެ ހަށިވިއްކުން ހައްދު ފަހަނާއަޅާ ގޮސްފައި އޮތްއިރު ހިރުވާތަން ކަހާނުލައެވެ. ހައްދު ތައުޒީރަކީ އޮތް އެއްޗަކަށް ނުވެއެވެ. ގިސޯސު ހިފުމަކީ މުހިންމު ކަމެއް ކަމަށް ނުދެކެއެވެ.

ވެރިކަމަށް އަންނަން އުޅުނުއިރު މަރުގެ ހުކުމް ތަންފީޒު ކުރަން ފަސް ނުޖެހޭނެކަމަށް ބުނެ ނިކަން ބާރަށް ވާހަކަ ދެއްކިއެވެ. ނިހާއީ މަރުގެ ހުކުމުގައި ތިބި އެތައް ބަޔަކު ޖަލުތަކުގައި އެބަތިއްބެވެ. ތިންމަރު ހަލާގެ ކޯޓުން ނިމި މަރު ހައްގުވެފައި ހުރި އެންމެ މީހަކަށްވެސް މުއިއްޒު ވެރިކަމަށް އަހަރު ވީއިރުވެސް މަރުގެ އަދަބު ދޭކަށް މުއިއްޒަކަށް ނުކެރުނެވެ.

ނިތްކުރީގައި ހުރި ބޯ ކުރަގަނޑަކީ އަޅުވެރިކަމުގެ ސިއްކައެއް ކަމުގައި ދައްކައިގެން ވެރިކަމަށްއައި މުއިއްޒުގެ މުނާފިގުކަން ރައްޔިތުންނަށް ހާމަވެއްޖެއެވެ. ދީނުގެ ނަމުގައިވެސް ރައްޔިތުން ދިނީ ދޯކާކަން މަރުގެ ހުކުމް ތަންފީޒު ނުކުރުމުން މާބޮޑަށް ސާފުވެއެވެ.