އެމްޕީއެލް: 3 މުއައްޒަފުން ހައްޖަށް ފޮނުވުން
އަންނަ އަހަރު ފަސް މުވައްޒަފުން ހައްޖަށް ފޮނުވާނެ
މޯލްޑިވްސް ޕޯޓްސް ލިމިޓެޑް (އެމްޕީއެލް)އިން އެ ކުންފުނީގެ ތިން މުވައްޒަފަކަށް ހައްޖު ދަތުރެއް ދީފިއެވެ. ހައްޖު ދަތުރަށް ހޮވުނު ތިން މުވައްޒަފުންނަކީ އެމްޕީއެލްގެ ހައްޖު އަދި އުމްރާ ޕޮލިސީގެ ދަށުން ހައްޖުގެ އަޅުކަން އަދާކުރުމަށް ހުށަހެޅި މުވައްޒަފުންގެ ތެރެއިން ހޮވުނު ތިން މުވައްޒަފުންނެވެ. އެމްޕީއެލް އިން ހައްޖަށް ފޮނުވާ ތިން މުވައްޒަފުންނަކީ:
- މުޙައްމަދު އަޤްލީމް – ސީނިއަރ ފައިނޭންސް އެގްޒެކެޓިވް
- އައިޝަތު ސުނީޒާ – ސީނިއަރ އެގްޒެކެޓިވް
- އިބްރާހިމް ވަހީދު – ޖެނެރަލް މެނޭޖަރ
އެމްޕީއެލްގެ ހައްޖު އަދި އުމްރާ ޕޮލިސީގެ ދަށުން ހައްޖުގެ އަޅުކަން އަދާކުރުމަށް ކުރިމަތިލެވޭނީ ކުންފުނީގައި މެދުނުކެނޑި 15 އަހަރު ނުވަތަ އެއަށްވުރެ ގިނަ މުއްދަތަކަށް ޚިދުމަތްކޮށްފައިވާ މުވައްޒަފުންނަށެވެ.
ހައްޖަށް ދިޔުމުގެ ފުރުސަތު ލިބުނު ތިން މުވައްޒަފުންނާ އެމްޕީއެލްގެ ސީއީއޯ ޝާހިދު ޢަލީ ވަނީ ބައްދަލު ކުރައްވާފައެވެ. ހައްޖު ދަތުރު ހަމަޖެހުނު ކަމުގެ ލިޔުން އެ މުވައްޒަފުންނަށް ހަވާލުކޮށްދެއްވީ ވެސް ޝާހިދު އަލީއެވެ. ހައްޖު ދަތުރު ލިބުނު ތިން މުވައްޒަފުން އެކަމާ މެދު ވަރަށް ބޮޑަށް އުފާކޮށް އެ ކުންފުންޏަށް ޝުކުރު އަދާކުރެއެވެ.
އެމްޕީއެލްގެ އަމާޒަކީ އަންނަ އަހަރު ފަސް މުވައްޒަފުން ހައްޖަށް ފޮނުވުން ކަމަށް ޝާހިދު ވިދާޅުވިއެވެ. ރަމަޟާން މަހު ތިން މުވައްޒަފުން އުމްރާއަށް ފޮނުވުމަށް މަސައްކަތް ކުރައްވާ ކަމަށް އެމްޕީއެލްގެ ސީއީއޯ ޝާހިދު ޢަލީ ވިދާޅުވިއެވެ.
