ބަންގްލަދޭޝްއިން 11 ގައުމަކާއެކު މިނިވަން ވިޔަފާރީގެ މަޝްވަރާތައް ބާއްވަނީ!

ބަންގްލަދޭޝްގެ ބޮޑުވަޒީރު ޝެއިޚް ހަސީނާ 11 ގައުމަކާއެކު މިނިވަން ވިޔަފާރީގެ އެއްބަސްވުންތަކާ ބެހޭ ގޮތުން މަޝްވަރާ ކުރަމުން އެބަދެއެވެ. ދެކުނު އޭޝިއާގެ އެ ގައުމުން އެކްސްޕޯޓް ކުރިއެރުވުމަށް އާ ވަސީލަތްތަކެއް ހޯދަމުން ދަނީ ތިން އަހަރު ދުވަހުގެ ތެރޭގައި ޕްރިފަރެންޝަލް ޓެރިފް ލުއިތަކާއެކުގައެވެ.

އަންނަ އަންގާރަ ދުވަހު ޖަޕާނަށް ކުރައްވާ ދަތުރުފުޅުގެ ކުރިން ބޮޑުވަޒީރު ވަނީ ބަންގްލަދޭޝްގެ ވެރިރަށް ޑާކާގައި ހުންނަ ނިކީ އޭޝިއާއާ ބައްދަލުކުރައްވައި ވާހަކަފުޅު ދައްކަވާފައެވެ. މި ދަތުރުފުޅުގައި ހަސީނާ އާއި ޖަޕާނުގެ ބޮޑުވަޒީރު ފުމިއޯ ކިޝިދާ ދެ ގައުމުގެ ގުޅުން "ސްޓްރެޓެޖިކް ކޮމްޕްރިހެންސިވް ޕާޓްނަޝިޕަކަށް" ބަދަލުކުރުމަށް އެއްބަސްވެވަޑައިގަންނަވާނެ ކަމަށް ބެލެވެއެވެ. މިދަތުރު ކުރައްވަނީ ޗައިނާގެ ބެލްޓް އެންޑް ރޯޑް އިނީޝިއޭޓިވްއާ ދެކޮޅަށް ޖަޕާނުން އިންޑިއާ ކަނޑުގެ އައްސޭރިފަށުގައި ސްޓްރެޓެޖިކް ގޮތުން އޮންނަ އިންފްރާސްޓްރަކްޗާ އިންވެސްޓްމަންޓްތައް އިތުރުކޮށްފައިވާ ދަނޑިވަޅެއްގައެވެ. ހަސީނާ ވިދާޅުވީ ބަންގްލަދޭޝްއަށް ކުރިމަތިލާން ޖެހޭނީ ކުރިއަރާފައިވާ ގައުމުތަކަށް އެކްސްޕޯޓުކުރާ މުދަލުން ފަގީރު ގައުމުތައް އިސްތިސްނާކުރާ އދ ގެ ކްލެސިފިކޭޝަނެއް ކަމަށްވާ "އެންމެ ކުޑަކޮށް ތަރައްގީވެފައިވާ ގައުމު" ގެ ދަރަޖަ އިން ވަކިވުމުން ވަރަށް ތަފާތު ހާލަތަކާ ކަމަށެވެ.

އާ ޕާޓްނަރުންގެ ނަންތައް ހަސީނާ ހާމަކޮށްފައި ނުވި ނަމަވެސް އެ ޕާޓްނަރުންގެ ތެރޭގައި އިންޑިއާ، ޗައިނާ އަދި ޖަޕާން ހިމެނޭނެ ކަމަށް ބެލެވެ އެވެ. ބަންގްލަދޭޝްއަކީ ޗައިނާއަށް ފަހު ދުނިޔޭގައި ދެވަނައަށް އެންމެ ގިނައިން ފޭރާން އެކްސްޕޯޓްކުރާ ގައުމެވެ. ހަސީނާ ފާހަގަކުރެއްވި ގޮތުގައި ކާބޯތަކެތީގެ ބާވަތްތައް ޕްރޮސެސް ކުރުމާއި ޑިޖިޓަލް އިކުއިޕްމަންޓަކީ އުންމީދީ ދާއިރާތަކެކެވެ. އަދި ބޭ އޮފް ބެންގާލްގެ ވަސީލަތްތަކުގެ އިތުރުން މަސްވެރިކަމުގެ ވަސީލަތްތަކަށް ވެސް އެކަމަނާ އަލިއަޅުއްވާލެއްވިއެވެ.