ހުވާކުރިތަނުން އަޒުލުކުރެވުނުނަމަ މިހާލެއް ނުޖެހުނީސް

ކޮވިޑްގެ އާލަމީ ވަބާއާއި ގުޅިގެން ދެ އަހަރެއްހާ ދުވަހު ގައުމަށް އާމްދަނީ ލިބުން މުޅިންހެން ހުއްޓުނު ނަމަވެސް ރައްޔިތުންގެ ފުރާނަ ސަލާމަތްކޮށް ބަނޑަށް ޖެހުނަނުދީ ހިފެހެއްޓުމަކީ ސަރުކާރެއް އޮތުގެ ބޭނުމެވެ. ކިތަންމެ ދަތި ހާލެއްގައިވެސް ރައްޔިތުންނަށް ވެފައިވާ ވައުދުތައް ފުއްދޭތޯ ބެލުމަކީވެސް ސަރުކާރަށް ކުރަންޖެހޭ ކަމެކެވެ.

ކޮވިޑްގެ ރިލީފް އެއިޑްގެ ގޮތުގައި ލިބުނު މަދު ފައިސާކޮޅަކާއި ހޯމްސްޓޭ ހިދުމަތުން ލިބުނު ކުޑަކުޑަ އާމްދަނީއެއް ފިޔަވައި ލިބުނު އެއްޗެއްނެތި ކުރީ ސަރުކާރުގެ ވެރިކަމުގެ މުއްދަތުން ދެ އަހަރު ދިޔައެެވެ. އާމްދަނީ ލިބުނަސް ނުލިބުނަސް ރައްޔިތުންގެ ފުރާނަ ސަލާމަތްކޮށް ބަޑަށްޖެހުނަނުދީ ރައްޔިތުންގެ ކަންކަން މެނޭޖުކޮށް ބެލެހެއްޓުމަކީ އޭރަކު އޮންނަ ސަރުކާރަކަށް ލާޒިމުކަމެކެވެ.

ފުރާނަ ސަލާމަތްކޮށޤދީ ބަޑަށް ޖެހުނަ ނުދިނުމަކުން ނުނިމެއެވެ. ބޭނުންވާ ކަންކަން ފުއްދާދެވެން އޮތް ގޮތެއް ހޯދައިގެން ރައްޔިތުންގެ ބޭނުންތައް ފުއްދާ ދިނުމަކީ ދޫކޮށްލެވޭކަށް އޮތަކަމެއް ނޫނެވެ. އާމްދަނީ ދަށްވުމަކީ ރައްޔިތުންގެ ކަންކަން ނުކޮށްދީ ފަރުޖެއްސޭނެ ކަމެއް ނޫނެވެ. ވެވެން އޮތް ގޮތެއް ހޯދައިގެން ރައްޔިތުންގެ ފުރާނަ ސަލާމަތްކޮށްދީ ހާލުގައި ޖެހުނަނުދީ ބައިތިއްބައިގެން ބޭނުންތައް ފުއްދާދެވެން އޭރު އޮތް ސަރުކާރަށް އޮތްހާވެސް ގޮތަކީ ލޯނު ނެނގުމާއި ފައިސާ ޗާޕްކުރުމެވެ. 

ރައްޔިތަކަށް ލުޔެއް މޮޅެއް ވާނެ އެއްވެސް ކަމެއްކޮށް ނުދީ ވެރިކަމުގެ ލައްޒަތާއި އިއްޒަތުގައި ދައުލަތް ދަވާލަން މުއިއްޒު ސަރުކާރަށް މިއަދު އޮވެވެނީ ކުރީ ސަރުކާރުން ލޯނުނަގާ ފަައިސާ ޗާޕް ކޮށްގެންވެސް ގައުމާއި ރައްޔިތުން ނަގަހައްޓާ ދެމެހެއްޓީތީއެވެ. 

ބޮޑެތި ދަރަނިތައް ހުރިކަމާއި އެދަރަނިތައް އަދާކޮށް ދައުލަތް ހަމަ މަގަށް އަޅުވަން އިތުރު ދައުރެއް ދިނުމަށް ރައްޔިތުންގެ ކިބައިން އެމްޑީޕީން އެދުނެވެ. ކުރުމުއްދަތެއްގައި ފަތުރުވެރިކަން އަނބުރާ އިޔާދަކުރިހެން ދަރަނިތައް އަދާކޮށް އިގުތިސޯދުކޮޅަށް ޖަހަން ވަގުތު ދޭން ތަކުރާރުކޮށް އެދުނެވެ. ރާއްޖޭގެ ވެރިކަމަކީ އެމްޑީޕީއަށް ނުކުރެވިގެން ކަމުންރެކި މުއިއްޒު ބޮލުގައި ގަދަކަމުން އެޅުވި ކަމެއްނޫނެވެ.

އެހެން ނޫނަސް ވެރިކަން ކޮށްދޭށޭ ކިޔާ ޑރ. މުއިއްޒުގެ ދެފައިމައްޗަށް ވެއްޓި ދިވެހިރައްޔިތުން އާދޭހެއް ނުކުރެއެވެ. ހެއްދެވިހާ ބޮޑެތި ދޮގު ވައުދުތައްވެ ހުސްގޮނޑިއަކާއި ފޮޓޯގަނޑެއް ދައްކައިގެން ރައްޔިތުންގެ ފަހަތުން ހިނގާ ރޮއި ހޭރިގެން ވެރިކަން ހޯދީ މުއިއްޒު ބޭނުންވެގެންނެވެ. ވެރިކަމަށް ބަނޑުކެޑިފައި ހުރިވަރުން ދިއްލިފައިހުރި ކަމަށް ބުނި ފެހިސގްނަލްތަކެއް ދައްކާ ބައެއްގެ ލޮލުގައި ޖާދޫގެ އަދުނެއް އަޅުވައިގެންނެވެ. 

އެމްޑީޕީގެ ސަރުކާރުތަކުން ވެރިކަން ކުރިގޮތޭ ކިޔައިގެން ސައީދެއްކަމަކު މިހާރަކު ވާހަކަ ދައްކާކަށް ތާހިރެއް ނޫނެވެ. އާނއެކެވެ. ހުވާކުރި ތަނުން އަޒުލްކޮށް މުއިއްޒުގެ ވެރިކަން ވަޢްޓާ ލެވުނުނަމަ ރައްޔިތުން މި ހާލަކު ނުޖެހުނީހެވެ.