2025: މުއިއްޒު ވެރިކަމެއްގާ އެޅޭނީ ނޭވާ ހޮޅިޔަށް!

2025 ވަނައަހަރު ފެށުނީ ނާމާންކަމާއި ބިރުވެރިކަމާއި ދަތިކަމުގެ އިންޒާރު ދެމުންނެވެ. އަހަރު ފެށުނީ މޫސުން ގޯސްވުމަކުން އެކަންޏެއް ނޫނެވެ. ރާއްޖޭގެ ކަންކަން ގޯހުން ގޯހަށް ދާކަމުގެ އިންޒާރުންނެވެ. 

2024 ވަނަ އަހަރު ރައީސް މުއިއްޒަށް 49.3 ބިލިޔަންގެ ބަޖެޓެއް ދައުލަތް ހިންގަން ލިބުނެވެ. 2024 އަކީ ރިޔާސަތު ބަދަލުވެ ދައުލަތް ރަނގަޅަށް ތަރުތީބުކޮށްގެން ގޯސް ތަކުރާރުނުކޮށް ދައުލަތް ހިންގަން ރައީސް މުއިއްޒަށް ލިބުނު އަހަރެކެވެ. މުއިއްޒަށް ދައުލަތް ހިންގަން ލިބުނީ 2023ގެ ސަޕްލިމެންޓްރީ ބަޖެޓްގެ ގޮތުގައި 6.5 މިލިޔަން ރުފިޔާއާއިވެސް އެކުގައެވެ. ރާއްޖޭގެ ތާރީހު އެހާތަނަށްދުށް އެންމެ ބޮޑު ބަޖެޓް ކަމުގައިވާ ބަޖެޓް 49.3 ބިލިޔަން ރުފިޔާ ހުސްވެ އިތުރު 5.3 ބިލިޔަން ރުފިޔާވެސް 2024އަށް މުއިއްޒަށް ލިބުނެވެ. އަހަރެއްގެ ތެރޭގައި 61.1 ބިލިޔަން ރުފިޔާ ތަޅާހުސްކޮށްލިއިރު 2024ގައި ރަަަައްޔިތުންނާއި ގައުމުގެ ހެވާލާބައަށް މުއިއްޒަށް ކޮއްދެވުނުކަމެއް ހަރާމުން ހަރާމެވެ.

އާއްމު ރައްޔިތުންނަށް އާމްދަނީ ލިބޭނެ ގޮތްތައް ތަނަވަސްކޮށް ނުދެއެވެ. ލިބޭ އެއްޗަކުން ދެކޮޅުޖެހޭނެ އެއްވެސް ކަމެއް ނުކޮށްދެއެވެ. ރަނގަޅަށް ހިނގަމުންދިޔަ އެތައް ކުދި ވިޔަފާރިއެއް ލިބޭއެއްޗަކާއި ކުރަންޖެހޭ ހޭދަ ނުބައްދަލުވެ ހުސްވިއަހަރު ތެރޭގައި ބަނގުރޫޓްވެގެން ހުއްޓާލަން ޖެހުނެވެ. 2025ގެ ޖެނުއަރީން ފެށިގެން ދައުލަތުގެ މުސާރަވެރިންގެ ތެރެއިން އެތައް ބައެއްގެ މުސާރައިން %10 ކެނޑޭނެއެވެ. އާއްމު ރައްޔިތު މީހާއަށް ލިބޭއެއްޗެއް މަދުވެ ކުރަންޖެހޭ ހޭދަ ފެންނަނީ ބޮޑުތަނުން އިތުރުވާތަނެވެ. ހުސްވިއަހަރު އެތައް ބައެއްގެ ވަޒީފާގެއްލި މަގުމަތިވެއްޖެއެވެ. 

ކިތަންމެ ވަރަކަށް ތެޔޮގުޅާ ސާދާ ކުރިޔަސް 2025އަށް 56 ބިލިޔަންގެ ބަޖެޓެއް ލިބިގެންވެސް މުއިއްޒުގެ ވެރިކަމެއްގައި ވަކީން ވާނީ ކޮން ރަނގަޅެއް ހެއްޔެވެ. ކަންކަން އިތުރަށް ގޯހުން ގޯހަށް ދިޔުން ނޫން މަންޒަރެއް ނުފެނެއެވެ. 2025ގައި ނޭވާ ހޮޅިޔަށް ނޭޅި ރައްޔިތުންނަށް ތިބެވޭނެ ކަމުގެ ކުޑަވެސް އުންމީދެއް އަދި ނެތެވެ. 

2025 ގެ ބަޖެޓުން ފެންނަން އޮތީ އާއްމު އަސާސީ ހިދުމަތަށް ދައުލަތުންދޭ ބައެއް ސަބްސިޑީތައްް ކަނޑާލުމެވެ. ބައެއް ހިދުމަތަށްދޭ ސަބްސިޑީ ކުޑަކުރުމެވެ. ކުރިން އާސަންދައިން ލިބުނު އެތައް ފަރުވާއަކާއި ގިނަ ބޭހެއް މިހާރަކު އާސަންދަ ކަވަރެއް ނުކުރެއެވެ. ބޭނުންކުރާ ނިސްބަތް އިތުރުނުވެ ކަރަންޓާއި ފެނަށް ގޭބިސީތަކުން ދައްކަންޖެހޭ މިންވަރު ކުރީ އަހަރަށްވުރެ ހުސްވި އަހަރު ދެގުނަ ތިންގުނަ ބޮޑެވެ. ޕަބްލިކް ޓްރާންސްޕޯޓްގެ ސަބްސިޑީ ކުޑަކޮށް ދަތުރުފަތުރަށް ކުރަންޖެހޭ ހަރަދު ބޮޑުތަނުން ވަނީ އިތުރެވެ. ކާޑާއި ތެލުގެ ސަބްސިޑީ ކަނޑާލާ ބަނޑުފުރާނަ މުއްތިކުރުމަށް ދަތިކުރުމަށްވެސް އޮތީ ކަނޑައެޅިފައެވެ. އެހެން ކަމުން ސަބްސިޑީ ކަނޑާލުމުން ނުވަތަ ކުޑަކުރުމުން 2025 އަހަރު ވެގެން ދާނީ ހުސްވިއަހަރަށް ވުރެވެސް ރައްޔިތުން ނިކަމެތިކޮށް ހާލުގައި ޖައްސާނެ އަހަރަކަށެވެ. 

ތަކެތީގެ އަގާއި ހިދުމަތުގެ އަގު ބޮޑުވެ އަތްނުފޯރާއިރު ލިބޭ އާމްދަނީ މައްޗެއް ނުވެއެވެ. އާއްމު ފަރުދުން ބޭންކްތަކުން ނަގާފައިވާ ލުއިލޯނުތަކާއި އެނޫންވެސް ލޯނުތައް އަނބުރާ ދެއްކޭ ނިސްބަތް ދަށްވެ ދިރިއުޅުމުގެ ހާލަތު ބޮޑުތަނުން ދަށަށް ހިނގައްޖެއެވެ. 2025 ވަނަ އަހަރު ދިވެހި އާއްމު ރައްޔިތުންގެ ހާލަތު ރަނގަޅުވުމުގެ ކުލަވެސް ނެތެވެ.