މުއިއްޒު ރައްޔިތުންގެ ކަރުގޮހޮރުގަނޑު ދަމައިގަތުމަކީ ރައްޔިތުން ފަޅިއަށް އެރުން!

މާގަދަ މީހަކަށް ވެގެން ބާރުގަދަ އެތައް ބައެއްގެ ބާރުތަކުގެ ތެރޭގައި "ތަޅުލެވިފައި" ހުރި އެތައް ކަމެއް މުއިއްޒު އެބަކުރަމޭ ބުނެ އަމިއްލަފަޔަށް ތިޔަ ޖަހަނީ އަމިއްލައަށް ބަޑިއެވެ. ސަރުކާރު އޮތީ ރައްޔިތުންގެ ފަޅީގައޭ ކިޔައިގެން ރައްޔިތުންނަށް ތަކުލީފަކަށް ނުވާ އެއްކަމެއް މުއިއްޒު ނުކުރެއެވެ. ކުރެވޭ ނުކުރެވޭ ކަމެއް ނޭނގި މުޅި ރާއްޖެ މުއިއްޒު ތިޔަ ފުޑާލަނީ ކޮންކަމެއްގެ ބަދަލެއް ހިފަން ހެއްޔެވެ.

ތުއްތުއިރު މައިންބަފައިން ވަކިވެ ދެމަފިރިންގެ ލޯބި އެކުއެކުގައި ނުލިބުމަކީ ރައްޔިތުންގެ މައްސަލަައެއް ހެއްޔެވެ. ބިދޭސީއަކަށް ދޮންއަމާ ކިޔަން ޖެހުމުގައި ދިވެހިންގެ އޮތީ ކޮންމައްސަލައެއް ހެއްޔެވެ. ބަފާކަށަވަރުވެ، ތަރިކައިން ބޮޑު ރަން ބިމަކާ މުދާގަނޑެއް އެކަނިމާ އެކަންޏަށް ލިބުމަކީވެސް މައްސަލައަކީ ހެއްޔެވެ.

ބްރިޖުން ލޭނުތަކެއް ކާލިވާހަކަ ދައްކާތީ ދިވެހި ރައްޔިތުންދެކެ ތިޔަ އަރަނީ މާގަދަ ރުޅިއެކެވެ. ރައިސް ޔާމީނުގެ ވަޒީރު ކަމުގައި ހުރެ ހުޅުމާލޭ ހަލިމަގު ހަދަންދިން ކުންފުނިން މަހު މުސާރަ ނަގަމުން ދިޔައޭ ބުނާތީ ތިޔަވަނީ މާވަރެކެވެ. އާސަހަރާ މިސްކިތް އަޕްގްރޭޑް ކުރުމުގެ ނަމުގައި ބަޔަކަށް ކޮންޓްރެކްޓްދީގެން މަސައްކަތް ނުކުރުވާ އެތައް މިލިޔަން ކާލިއްޔޭ ބުނާތީ ތިޔަ އަންނަނީ އަމަށަކު ރުޅިއެއް ނޫނެވެ. ކަދުރުރުކު ޑީލުންނާއި ޕާކިން ސްލޮޓާއި ބިންތައް ކުއްޔަށް ދީގެން ދައުލަތުގެ ފައިސާ ކާލައިގެން ހުރި ވާހަކަ އާއި ނޫމަޑީގެ ވާހަކަ މީހުން ކިޔާތީ އަރަނީ ހާދަހާވާ ރުޅިއެކެވެ.

ހަރާން ހުކުމަކާއި ހުސްގޮނޑިއަކާއި އިންޑިއާ އައުޓާއި ޗާގޯސް ވިއްކައިގެން ރައްޔިތުންނަށް އޮޅުވާލައިގެން ހޯދި ވެރިކަމެކޭ ބުނާތީ ތިޔަވަނީ ހާދަވަރެކެވެ. ދޮންއަމާ ޑީޕޯޓްކޮށް ބަފާގެ މުދާގަނޑު ފޭރިގަތިއްޔޭ ބުނާތީ ގޮށްމުށް ތިޔަ ކެވެނީ މާވަރަކަށެވެ. ރިޝްވަތު ދީގެން މަޖިލީހުގެ 13 މެންބަރަކު ގަތްވާހަކައާއި މަޖިލީހުގެ މެޖޯރިޓީ ހޯދަން ފަތުއަޑުކިޔާފައި ރިޝްވަތު ދިނޭ ކިޔާތީ ދެފައި ބިމުން ކަޓަނީވެސް މާބޮޑަށެވެ. ބައިބޮޑު ކުރަން ބައެއް މީހުންގެ ދަރިފަސްކޮޅަށް ދައުލަތުން މުސާރަދީގެން އެތައް ހާސް ސިޔާސީ ވަޒީފާ ދީގެން ދައުލަތް ވީދައިގެން ކަނިއްޔޭ މީހުން ބުނާތީ ނިއްކުރިން ތިހުންނަނީ ދާކަނޑާލާފައެވެ.

އަޖައިބެއް ނުވާނެހެއްޔެވެ. ރައްޔިތުން ފަޅީގައި ހުރެގެން އާސަންދަ ދަތިކޮށް ބޭސްފަރުވާ ނުކުރެވޭ ގޮތް ހަދައިފިއެވެ. ޓެކްސްތައް ބޮޑުކޮށްގެން ރަށުފަތުރުވެރިކަން ނޭވާހޮޅިއަށް އަޅުވަނީއެވެ. ކަރަންޓް ބިލާފެން ބިލު ތިންގުނައަށް ބޮޑުކޮށްފިއެވެ. މާލޭ މީހުނަށް ދިން ގޯތިތަކާއި ފްލެޓްތައް މުއްގަނޑަށް ވައްދާލައިފިއެވެ. މަހުގެ އަގުވައްޓާލާ މަސްވެރިކަން ފުނޑުފުނޑުކޮށްލައިފިއެވެ. ފަށާފައި ހުރި އިމްރާނީ މަސައްކަތްތަކާއި އަސާސީ ހިދުމަތައް ރަށްރަށުގައި ހުއްޓާލައިފިއެވެ. ޓެކްސީ ޑްރައިވަރުން މަގުމަތިކޮށްލަނީއެވެ. އާރުޓީއެލް އަގުބޮޑުކޮށް ރަށުބަންދަށް މީހުން އަނބުރާ ގެންދަނީއެވެ. ކުދިއަދި މެދުފަންތީގެ ވިޔާފާރިތަކާއި ގެވެހި ވިޔަފާރިތައް ޓެކްހާއި ޑިއުޓީއާއި ފީތަކާއި ޖުރުމަނާގައި ބައްދައިގެން ހުއްޓުވާލަނީއެވެ.

އާއްމު ރައްޔިތުންނަށް އާމްދަނީ ހޯދޭނެ ހުރިހާ މަގެއް ބަންދުކޮށް ރައްޔިތުންގެ އަތުން ނެގެން އޮތްހާއެއްޗެއް ނަގަން ދިމާކޮށްފާ ތިޔަހުރީ ކޮންކަމެއްގެ ބަދަލެއް ދިވެހިޏްގެ ކިބައިން ހިފަން ހެއްޔެވެ. ރައްޔިތުމީހާގެ ކަރުގޮހޮރު ދަމައިގަންނަމުން ރައްޔިތުންގެ ފަޅީގައި ހުރި ވާހަކަ ބުނަން މުއިއްޒު ލަދެއްނުގަނެއެވެ.