ހީރަސް ސުފުރާ: ކެރެޓްކްރީމް ހަލުވާ
ކެއުމުގެ ހަވާސާގައި ބޭނުން ކޮށްލަން ނިކަން ފައްކާ
ހީރަސް ސުފުރާ މިފަހަރު ހާއްސަ ކޮށްލާނީ ކެރެޓްކްރީމް ހަލުވާއަށެވެ. މި ހަލުވާއަކީ ކެއުމުގެ ހަވާސާގައި ބޭނުން ކޮށްލަން ނިކަން ފައްކާ އެހާމެ މީރު އެއްޗެކެވެ. ތަޖުރިބާ ކޮށްލަމާ ހިނގާށެވެ.
ބޭނުންވާ ތަކެތި:
- 8 ޖޯޑު ކެރެޓް ( ގާނާ، އާވިން ކައްކާ ވަރަށް ބޮޑަށް މަޑުކޮށްފައި)
- 2/1 ޖޯޑް ޒުވާރިފުށް
- 2 ދަޅު ގެރިކިރު
- 2/1 ޖޯޑު ހަކުރު
- 4 ޖޯޑު ދިޔާކިރު
- 2 ޖޯޑު ނެސްލޭ ކްރީމް
- 2/1 މޭޒުމަތީ ސަމުސާ ވެނީލާ އެސެންސް
ތައްޔާރު ކުރާނެ ގޮތް:
- ތެއްޔެއް އުނދުން މައްޗަށް އުދާލާށެވެ.
- ހަކުރުކޮޅު ތެލީ ތެރެއަށް އަޅާލާށެވެ.
- މަޑުގިނީގައި ބަހައްޓައިގެން ދޭފަތުން ހަލަމުން ގޮސް ހަކުރުކޮޅު ހިތި ރަހަ ނުދޭވަރަށް ބްރައުން ކޮށްލާށެވެ.
- އޭގެފަހުން ކެރެޓްކޮޅު އަޅާފައި ދޭފަތުން ހަލަމުން މަޑު ގިނީގައި ކައްކާލާށެވެ.
- ކެރެޓްކޮޅުގައި ހަކުރު ހިފާ ރަނގަޅަށް އެއްވަންދެން މަޑު ގިނީގައި ބަހައްޓައިގެން ދޭފަތުން ހަލަމުން ކައްކާށެވެ.
- ޒުވާރިފުށްކޮޅު އޮލަކޮށް ފެންފޮދެއްގައި ގިރާފައި ކިރުފޮދު ވެސް އެއްކޮށް ތެއްޔަށް އަޅައިގެން ދޭފަތުން ހަލަމުން ކައްކާށެވެ.
- ޒުވާރިފުށްކޮޅު ރޯފިލުމުން ގެރިކިރާއި އެސްންސް ވެސް އޭގެތެރެއަށް އެއްކޮށްލާށެވެ.
- އެންމެފަހުން ކްރީމް އެއްކޮށްފައި އުނދުން މަތިން ތެލި ބާލާށެވެ.
އެހުރީ ވަރަށް މީރުކޮށް ކެރެޓްކްރީމް ހަލުވާ ތައްޔާރުވެފައެވެ. އަވަހަށް ތަށްޓަށް އަޅާލާ ސުފުރާ މައްޗަށް ނެރޭށެވެ. ފިނިކޮށްގެން ވެސް ވަރަށް މީރުވާނެއެވެ.
