ވެލައަކަށް ގޯނާކުރި ފަތުރުވެރިއަކަށް ގާނޫނީ ފިޔަވަޅު އަޅަނީ

އޮމާންގެ މަޝްހޫރު ރަސް އަލް ހައްދު ސަރަހައްދުގައި ވެލާތަކަކަށް ގޯނާކުރާ މަންޒަރު ފެންނަ ވީޑިއޯއެއް އާންމުވުމާ ގުޅިގެން، އެ ފަތުރުވެރިޔާއަށް ދައުވާކުރުމުގެ މަސައްކަތް ކަމާބެހޭ ފަރާތްތަކުން ފަށައިފިއެވެ.

ސޯޝަލް މީޑިއާގައި ދައުރުވި މި ވީޑިއޯއިން ފެންނަނީ، ބޮޑު ވެލައެއްގެ ބުރަކަށިމަތީގައި އެ ފަތުރުވެރިޔާ އިށީނދެގެން އިނދެ، އޭނާގެ ބާރު ދައްކާލުމުގެ ގޮތުން މަސްތައް އަރުވައިގެން އިންނަ މަންޒަރެވެ. އަދި އެވަގުތު އޭނާގެ އަތުގައި ކުޑަ ވެލައެއް އޮތްތަން ފެނެއެވެ. މި ވީޑިއޯއާ ގުޅިގެން ގިނަ ބައެއްގެ ކަންބޮޑުވުން ފާޅުކޮށްފައިވާއިރު، އޮމާންގެ ކަމާބެހޭ އިދާރާތަކުގެ ސަމާލުކަމަށް މިކަން ވަނީ އައިސްފައެވެ.

އޮމާންގެ އެންވަޔަރަންމަންޓް އޮތޯރިޓީން ހާމަކުރި ގޮތުގައި، މިއީ ވަށައިގެންވާ މާހައުލާއި ދިރުންތައް ހިމާޔަތްކުރުމުގެ ގާނޫނާ ހިލާފު އަމަލެކެވެ. އަދި ވެލާތަކަށް އަތްލުމާއި، އެސޫފިތަކާ ގާތްވުމާއި، އޭގެ ގުދުރަތީ ދިރިއުޅުމަށް ބުރޫއަރާ ފަދަ އެއްވެސް ކަމެއް ނުކުރުމަށް އެ އިދާރާއިން ވަނީ އިލްތިމާސްކޮށްފައެވެ. މީގެ އިތުރުން، ދިރުންތަކަށް ނުވަތަ އެތަކެތީގެ މާހައުލަށް ގެއްލުންދޭ އެއްވެސް އަމަލެއް ފެނިއްޖެނަމަ، ލަސްނުކޮށް އެކަން ރިޕޯޓްކުރުމަށްވެސް އާންމުންގެ ކިބައިން އެދިފައިވެއެވެ.

މަސްކަޓާ ގާތްގަނޑަކަށް 350 ކިލޯމީޓަރު ދުރުގައި އޮންނަ ރަސް އަލް ހައްދަކީ ވެލާ ބިސްއެޅުމަށް ހާއްސަ، އޮމާންގެ އެންމެ މުހިންމު އެއް ސަރަހައްދެވެ. ކޮންމެ އަހަރަކުވެސް ޖޫން މަހުން ފެށިގެން އޮކްޓޯބަރު މަހުގެ ނިޔަލަށް އެތައް ހާސް ވެލައެއް ބިސްއެޅުމަށް އެ ސަރަހައްދުގެ ގޮނޑުދޮށްތަކަށް އަރައެވެ. މިއީ ދުނިޔޭގެ އެކި ކަންކޮޅުތަކުން ފަތުރުވެރިން ޒިޔާރަތްކުރާ މަގުބޫލު މަންޒިލެކެވެ.