ޔަހޫދީންގެ ވަޒަނަކަށް ރަސްމާލެ ވާނީ މުއިއްޒު ނެރުވާ ގެގް އޯޑަރަކުންތަ!

ކުރާ ކޮންމެ ކަމަކީ ގާނޫނަކުން ނުވަތަ ކޯޓުން ބާރު ހޯދާ ކަމަކަށް ވާ ނަމަ އެ ކަމަކީ ގާނޫނާއި ހިލާފު ކަމެއް ސައްހަ ކުރަން ކުރާ މަސައްކަތެއް ކަމުގެ ސިއްކަ ޖެހެއެވެ. ރާއްޖޭގައި ފުޅާ ދާއިރާއެއްގައި މިއަދުގެ ސަރުކާރުން 2023 ގެ ކުރިން ހިންގި “އިންޑިއާ އައުޓު” ކެމްޕެއިން އޭރުގެ ސަރުކާރުން ހުއްޓުވީ ކޯޓުތެރެއިންނެވެ. ޓީވީ ޝޯވ ތަކާއި މަގުމަތީ ހަރަކާތްތަކާއި ތަންތަނުގައި ބެނާ ދެމުމުގެ ހަރަކާތްތައް ހުއްޓުނީ ކޯޓު އަމުރުންތަކުންނެވެ. 

2023 ގެ ސަރުކާރު ވެރިކަމާއި ހަވާލުވި ފަހުން ހިންގާ ގިނަ ހަރަކާތްތަކުގެ ފަރުދާއަކަށް ވަނީ މަޖިލީހުން މުއިއްޒުގެ މެމްބަރުން ފާސްކުރާ ގާނޫނަކުން ނުވަތަ ކޯޓުން ނެރޭ އަމުރަކުންނެވެ. އަބުރު ރައްކާތެރި ކުރުމުގެ ނަމުގައި އަރަބި ބަހެއް ބޭނުން ކުރުން މަނާ ކުރިއެވެ. “ކައްޒާބު” ބަސް ބޭނުން ކުރުން ގޮތަކަށް މަނާ ވިއެވެ. އެހެންނަމަވެސް ދޮގު ހަދާ މީހަކާއި ދިމާލަށް މީހަކު ލޯބިން ކައްޒާބޭ ވެސް ކިޔާ ފާނެއެވެ. ހަމަ އެފަދައިން އަންހެން ޖިންސުއްލަތީފަކަށް ދައުލަތުގެ އެންމެ މުގައްދަސް އެއް އިދާރާއިގައި ގޯނާ ކުރި ކަމުގެ ތުހުމަތު ތަކެއްގެ ވާހަކަ ހުއްޓުނީ ގެގް އޯޑަރު ކިޔާ އަމުރަކުންނެވެ.

ސަރުކާރުން ކުރާ ކަންކަން ގޯސް ކަމަށް ސަރުކާރަށް ގަބޫލު ކުރެވޭ ހިސާބުން މުއީޒު މެމްބަރުން ލައްވާ ފާސް ކުރަނީ ގާނޫނެކެވެ. ނޫނީ ނެރެނީ ކޯޓު އަމުރކެވެ. އޭގައި ބުނަނީ “ތިޔަ ހެނެއް ނުކިޔޭނެ” އެވެ. ބައެއް މަދު ހާލަތްތަކުގައި ކޮންމެވެސް މީހަކު ލައްވާ ކޯޓަށް މައްސަލައެއް ވައްދާނީއެވެ.

އިންސާފު ހޯދުމުގެ ތެދުވެރި ނިޔަތުގައި އިހުތިޖާޖުކުރުމުގެ ގޮތުން ކޯޓަށް ވައްދާ ައްސަލަތައްވެސް ނިމެނީ މުއިއްޒު ބޭނުންވާ ހޮތަށެވެ. މުއިއްޒު މެމްބަރުން ކަރަށް ފައްތާފައިވާ ޖޭއެސްސީ މަޅިއަކުން ސަލާމަތް ކުރުމަށް ހުށަހެޅުމުން ކޯޓުން މައްސަލަތައް ނިމެނީ ތުހުމަތުގެ އިނގިލި ދިއްކުރެވޭނެ ފަދަ ގޮތަކަށެވެ. އެއީ ސަރުކާރުން ބޭނުންވާ ގޮތަށެވެ. ގާނޫނީ ހަމައެއް ކޮންމެވެސް ގޮތަކުން ހޯދަނީއެވެ. އެ ހިސާބުން އެކަމެއް ނިމުނީއެވެ. އެ ހާލަތު މަރުވީއެވެ. 

ދިވެހީންނާއި އަލަށް ކުރިމަތިވެގެން އުޅޭ މުސީބާތަކީވެސް އެފަދަ މަގަކުން ދަތުރު ކުރާނެ ކަމެއް ކަމަށް ބެލެވެއެވެ. ދިވެހި އާންމު ރައްޔިތުންގެ ކަންބޮޑުވުން ޖާއިޒުކަމަށް ގިނަ ބަޔަކު ގަބޫލު ކުރެއެވެ. ދިވެހީންނަށް ބޯހިޔާ ވަހިކަން ކަށަވަރު ކޮށްދޭނެ ކަމަށް ބުނެ ހިއްކަން ފެށި ފުށި ދިއްގަރު ފަޅެވެ. ބައެއް މީހުންގެ ނަމުންނަމަ މުއިއްޒު މާލެ ނުވަތަ ރާޖޫ މާލެއެވެ. އެތަން ބޭރުގެ ކުންފުންޏަކަށް ދިން ވާހަކައެވެ. ތުހުމަތު ކުރެވެނީ އަބޫދާބީ ކުންފުންޏަކަށް ދީފައިވާ ކަމަށް އަޑު ފެތުރިގެން އުޅޭ ބިމުގައި ޔާހޫދީން ވަޒަންވެރި ވާނެކަމުގެ ބިރުވެރި ކަމެވެ.

ސަރުކާރާއި ކުންފުނީގެ ރާގު އިރުއިރުކޮޅާ ކަހަލަ ގޮތަކަށް ބަދަލުވެއެވެ. 20 ބިލިއަން 12 ބިލިއަނަށް ބަދަލުވެއްޖެއެވެ. 99 އަހަރު ދުވަހަކުވެސް ނުނިމޭނެ ކަހަލަ 99 އަހަރަކަށް ބަދަލުވެއްޖެއެވެ. ބިމެއް މިލްކެއް ނުވޭ ނަމަވެސް އިމާރާތް މިލްކު ކުރެވޭނެކަމެވެ. ޔަހޫދީންނާއި ގާތް ގުޅުމެއް އޮތް ކުންފުންޏެއް ކަމަށް އޮތްއޮތުން ބަދަލު ކުރެވޭނެ ގޮތެއް އެއްވެސް ހަމައަކުން ނެތެވެ. ކުނަފުނީގެ ޕްރޮފައިލް ތަކާއި ދުނިޔޭގެ ތާރީހުގައި އަރުޝީފު ކުރެވިފައިވާ ލިޔުންތަކުން އެ ގުޅުން ރަގަޅަށް ސާބިތުވެއެވެ. 

މިއަދު އަނެއްކާވެސް އޮތީ ސަރުކާރަށް 3 ގޮތެކެވެ. ފުރަތަމަ ގޮތަކީ މި ޕްރޮޖެކްޓް ދިފާއުވާނެ ގޮތަށް މުއިއްޒު މަޖިލިސް ލައްވާ ގާނޫނުތަކެއް ފާސް ކުރުމެވެ. އެ ގޮތް ކަމުނުދާނަމަ ވަންނާން ޖެހޭނީ ކޯޓަށެވެ. ދެކޮޅުގެ ވެސް އެންމެ ފަހުބަސް އަންނަނީ އެއް މޭޒަކުންނެވެ. ދެވަނަ ގޮތަކީ މިނިވަން ފަރާތަކުން ކޯޓަށް މައްސަލައެއް ވެއްދުމެވެ. އެ ހިސާބުންވެސް ގޮތް ނިންމާނީ ދައުލަތުގެ އެއް ވަށިގަނޑަކުންނެވެ. ތިންވަނަ ގޮތަކީ އެ ވާހަކަވެސް ގެގް އޯޑަރަކުން މަނާ ކުރުމެވެ. މިއިން ކޮންމެ ކަމެއް ކުރުމަށް ވިސްނުމަކީވެސް އެކަމެއްގައި ދެކޮޅު ނުޖެހޭ، ދިވެހީންގެ މަސްލަހަތާއި ބީރައްޓެހި ކަންކަން ހުރިކަން ރަމްޒުކޮށްދޭ އަލިގަދަ ހެކި ތަކެކެވެ.

ދިވެހިރާއްޖޭގައި ޔަހޫދީން ގާއިމުވާކަށް ދިވެހީން ނޭދޭނެއެވެ. އެކަން ހުއްޓުވުމަކީ އަންނާން އޮތް ޖީލުތަކަށް ދައުލަތް ވާސިލު ކޮށްދިނުމަށް ކޮންމެހެންވެސް ކުރުން ލާޒިމު ކަމެކެވެ. ދިވެހިރާއްޖެ މިއަދުގެ ސަރުކާރާއި އެކުވިއަސް އަދި މިއަދުގެ ސަރުކާރާއި ނުލާވިއަސް ދެމި އޮންނަމް ޖެހޭނެއެވެ.