ތުއްތު ދެކުދިންނާއި އެކުދިންގެ މަންމަ މަރާލާފާ އޮއްވާ ފެނިއްޖެ

އިންޑިއާގެ ބިހާރު ސްޓޭޓްގެ މުޒައްފަރުޕޫރުގައި އަންހެނަކާއި އޭނާގެ ތުއްތު ދެ ދަރިން، އެމީހުން ދިރިއުޅޭ ގޭގެ ތެރޭގައި މަރާލާފައި އޮއްވާ ފެނިއްޖެއެވެ. މި ހިތާމަވެރި ހާދިސާގައި މަރުވެފައިވަނީ އުމުރުން 30 އަހަރުގެ ރީތާ ދޭވީ އާއި، އޭނާގެ ތިން އަހަރުގެ އަންހެން ދަރިފުޅު ވައިޝްނަވީ ކުމާރީގެ އިތުރުން ހަތް މަހުގެ ފިރިހެން ދަރިފުޅު ރުދްރާ ކުމާރެވެ. ފުލުހުން މައުލޫމާތު ދޭ ގޮތުގައި މި ތިން މީހުންވެސް މަރާލާފައިވަނީ ކަރުގައި ހިފާ ނޭވާ ހާސްކޮށްލައިގެންނެވެ.

ހާދިސާ ހިނގާފައިވަނީ ކާންތީ ޕޮލިސް ސްޓޭޝަންގެ ބެލުމުގެ ދަށުގައިވާ އަވަށެއްގައެވެ. މި މަރުތަކުގެ މައުލޫމާތު ފެންމަތިވީ، ރީތާގެ ފިރިމީހާ ސަންތޯޝް ކުމާރު ސާހް (މިތައިލާލް ސާހް) އަންގާރަ ދުވަހުގެ ފަތިހު 3 ޖަހާކަންހާއިރު ގެއަށް އައި ވަގުތުގައެވެ. އޭނާ ގެއަށް އައިއިރު ގޭގެ ދޮރު ބޭރުން ތަޅުލާފައި ހުރުމުން، އަވަށްޓެރިންނާއި ތިމާގެ މީހުންގެ އެހީތެރިކަމާއެކު ދޮރު ހަލާކުކޮށްލައިގެން އެތެރެއަށް ވަތްއިރު، އަނބިމީހާ އާއި ދެ ދަރިން އޮތީ މަރާލާފައެވެ.

ފުލުހުން ބުނި ގޮތުގައި ހަށިތައް ފެނުނުއިރު އެމީހުންގެ ކަރުގައި ހިފާފައި ހުރި ކަމުގެ ނިޝާންތަކާއި ނިތްކުރިމަތީގައި ޒަހަމްތަކެއް ހުއްޓެވެ. އަދި އެމީހުންގެ ނޭފަތުން ލޭ އައިސްފައި ހުރި ކަންވެސް ފާހަގަކުރެވުނެވެ. މި މައްސަލަ ތަހުގީގު ކުރުމަށްޓަކައި ފޮރެންސިކް ޓީމުތަކާއި ކޭ-9 ޑޯގް ސްކޮޑް މިހާރު ދަނީ އެ ސަރަހައްދުގައި ހަރަކާތްތެރިވަމުންނެވެ.

މިހާތަނަށް ބެލި ބެލުމުން މި މަރުތަކަކީ އާއިލީ ދެބަސްވުމަކާ ގުޅުންހުރި ކަމެއް ކަމަށް ބެލެވެއެވެ. ގޭގެ އެއްވެސް މުދަލެއް ގެއްލިފައި ނުވާތީ، މިއީ ވައްކަމެއް ނުވަތަ ފޭރުމެއްގެ ތެރެއިން ހިނގި ކަމެއް ނޫންކަން ފުލުހުން ވަނީ ޔަގީންކޮށްފައެވެ. ސަންތޯޝް ފުލުހުންގާތު ބުނެފައިވާ ގޮތުގައި ބިމުގެ މައްސަލައެއްގައި އޭނާގެ ތިމާގެ މީހުންގެ ފަރާތުން މީގެ ކުރިން އިންޒާރުތައް ލިބިފައިވެއެވެ. އަދި މި މަރުތަކުގެ ފަހަތުގައި ވަނީ އޭނާގެ ބޭބެ ނުވަތަ ކޮއްކޮގެ ދަރިން (ކަޒިންސް) ކަމަށް އޭނާ ތުހުމަތު ކުރެއެވެ.

މި މައްސަލައާ ގުޅިގެން ސުވާލު ކުރުމަށްޓަކައި މިހާތަނަށް ދެ އަންހެނަކު ފުލުހުންގެ ބެލުމުގެ ދަށަށް ގެނެސްފައިވާއިރު، މައިގަނޑު ތުހުމަތު ކުރެވޭ މީހުން މިހާރު ވަނީ ފިލާފައެވެ. އެމީހުން ހޯދައި ހައްޔަރު ކުރުމަށް ފުލުހުން ދަނީ ހާއްސަ އޮޕަރޭޝަންތަކެއް ހިންގަމުންނެވެ. މަރުވި މީހުންގެ ހަށިތައް މިހާރު ވަނީ ޕޯސްޓްމޯޓަމް ހެދުމަށް ފޮނުވާފައެވެ.