މީޑިއާ ކަސްތަޅު އެޅުވުމުން ވެގެންދާނީ މިހެން
މީޑިއާ ކަސްތަޅު އަޅާ ބިލު އެއޮތް ގޮތަށް ގާނޫނަކަށް ވެއްޖެނަ ވެގެންދާނެ ގޮތުގެ ވާހަކަ ދައްކަނީ މަދު މީހެކެވެ. އަބުރު ހިމާޔަތް ކުރާނެ ކަމުގެ ދޮގު ފަރުދާއެއް އާއްމުންގެ ލޮލުގައި އަޅުވައިގެން މުއިއްޒު ސަރުކާރުން ކުރަން އުޅޭކަމަކީ ވައްކަމާއި ހިޔާނަތާއި އަނިޔާ ފޮރުވުމެވެ. އޮޅުވާލުމާއި ހައްގުތައް ހަނިކުރުމެވެ.
ސަރުކާރުގެ ދޯހަޅި ސިޔާސަތުތަކަށް ފާޑުކިޔުމަކީ ކުރެވޭނެ ކަމަކަށްނުވެ ކަމެއްގެ ހެޔޮނުބައި ވަކިނުވެ ގައުމަށް ފޫނުބެއްދޭ ވަރުގެ ބޮޑެތި ގެއްލުން ލިބޭނެއެވެ. ވެރިން ބައިއަޅައިގެން ގައުމުން ބައެއް ވިއްކާލިޔަސް ޗުއްޕުވެސް ނުބުނެވޭނެއެވެ.
ނިޒާމުގެ ތެރެއިން ކުރާއެއްވެސް ވައްކަމެއް ހިޔާނާތެއް ނުބެލޭނެއެވެ. ފްލެޓްތައް ހިތުހުރި ގޮތަކަށް ބަހާލިޔަސް ވާނުވާއެއް ނޭނގޭނެއެވެ. ބިންތައް ބޭނުންހާ ބަޔަކަށްދީ ވިއްކާ ވެރިންގެ ޖީބުތައް ފުރާލިޔަސް ދޮންކަޅު ނޭނގޭނެއެވެ.
އާސަންދަ އެންސްޕާއަށް ހަދާނެ ގޮތެއް ހެއްޖަސް އެއްޗެއް ބުނެވޭނެ މީހެއް ނުހުންނާނެއެވެ. ކަރަންޓް ބިލާއި ފެން ބިލު މަތި މައްޗަށް ބޮޑުކޮށް ފުލުފުލުގައި ކަރަންޓް ކެނޑިޔަސް އަނގައެއް ނުހުޅުވޭނެއެވެ.
ރަށްރަށުގައި ތަރައްގިގެ ޕްރޮޖެކްޓެއް ހިނގިޔަސް ނުހިނގިޔަސް އެވާހަކައެއް ނުދެއްކޭނެއެވެ. ދައުލަތުގެ ތިޖުރީތަކާއި ހަވާލުވެ ތިބި މީހުން ތިޖޫރީކައި ހުސްކޮށްލިޔަސް ކުކުރާވެސް ނުލެވޭނެއެވެ.
އޮންނަ ބޮޑު އަބުރެއްގެ ސަބަބުން ތުއްތު ޅަދަރިން ޖިންސީ ޝިކާރައަށް ވިޔަސް އެ ވާހަކައެއް ނުދެއްކޭނެއެވެ. އޮފީސްތަކުގައި މަގާމުގެ ނުފޫޒުގައި ހިންގާ ޖިންސީ ފުރައްސާރާއި ޖިންސީ ގޯނާތައް ސިއްރުވާނެއެވެ.
މުއިއްޒު އިސްވެހުރެ މަޖިލިސް މެދުވެރިކޮށް ނޫސްވެރިކަން ބަނދެލަނީ ވައްކަމާއި ޖަރީމާ ހިންގުމަށް ޖާގަ ހޯދުމަށެވެ. މުޅި ގައުމުގައި އަނދިރި ދައުލަތްތަކެއް ހިންގުމަށެވެ. ޑާކް ވެބާއި ޑާކް ސްޓޭޓްގެ ނުރައްކަލަށް ރާއްޖެ ވައްޓާލުމަށެވެ.
