މާލެ ސިޓީގެ ހުރިހާ ލިޔެކިޔުން ޑިޖިޓަލް ކުރާނަން:އާޒިމް

މާލެ ސިޓީ ކައުންސިލްގައި އަދިވެސް މަސައްކަތް ކުރަމުން ދަނީ އެންމެ ކުރީގެ މުނިސިޕަލްޓީން ހިދުމަތް ދިން ކަހަލަ ބައްޓަމަކަށް ކަމަށް މާލެ ސިޓީގެ މޭޔަރ އާދަމް އާޒިމް ވިދާޅުވެއްޖެއެވެ. އާޒިމް ވިދާޅުވަނީ ކަމެއް ރަނގަޅު ކުރާނެ ވަސީލަތާއި މަގުތައް ކުރިން ފެނިފައި ހުރިހެން ހީފުޅު ނުވާ ކަމަށެވެ. އާޒިމު ވިދާޅުވާ ގޮތުގައި ސިޓީ ކައުންސިލު ހަމައަކަށް އަޅުވައިގެން ރީތިކޮށް މަސައްކަތް ރުކުރުވާލެވޭނެ ގޮތަކަށް މާހައުލެއް މާލެ ސިޓީ ކައުންސިލަށް ނެތް ކަމަށެވެ. 

މާލެ ސިޓީ ކައުންސިލްގެ މަސައްކަތް މިހާރު ހިނގަމުންދަނީ މާލޭގެ އެކި ހިސާބުގައި ހުރި 7 އިމާރާތެއްގައެވެ. އެހެންކަމުން ރައްޔިތުންނަށް ހިދުމަތްތައް ފޯރުކޮށް ދިނުމަށް އިންތިހާއަށް ދައްޗެވެ.

މާލެ ސިޓީ ކައުންސިިލަށް ދިމާވެފައިވާ ދަތިތައްކުން އަރައިގަތުމަށް ހިދުމަތްތައް އެއް ތަނަކުން ދިނުމަށް ބޭނުންވާ އިމާރާތެއް އެޅުމުގެ އަމަލީ މަސައްކަތް ފެށުމަށް ތައްޔާރު ވެފައިވާކަމަށް އާޒިމް ވިދާޅުވެއެވެ. މޭޔަރ އާދަމް އާޒިމްގެ އަމާޒަކީ އެ މަނިކުފާނުގެ މޭޔަރުކަމުގެ ދައުރު ނިމެންވާއިރަށް މާލޭ ސިޓީ ކައުންސިލްގެ ހިދުމަތްތައް ދޭނެ ފެންވަރު ރަނގަޅު އިމާރާތެއް ބިނާކުރެއްވުމެވެ.  

އެންމެ ކުރީގެ މުނިސިޕަލްޓީން ހިދުމަތް ދިން ކަހަލަގޮތަކަށް މިހާރުވެސް ދެވެމުން އަންނަ ހިދުމަތްތައް ޒަމާނީކޮށް މާލެ ސިޓީގެ ހުރިހާ ލިޔެކިޔުންތައް ޑިޖިޓަލް ކުރެއްވުމަކީ މޭޔަރ އާދަމް އާޒިމް އެންމެ ބޮޑު އިސްކަމެއް ދެއްވާނެ އެއްކަމެވެ. 

ހައުސިން މިނިސްޓްރީ އިމާރާތަކީ ވެސް މާލެ ސިޓީ ކައުންސިލްގެ މަސައްކަތް ހިންގަމުންދާ 7 އިމާރާތުގެ ތެރެއިން އެއް އިމާރާތެވެ. ހައުސިން މިނިސްޓްރީ އިމާރާތުގައި ހިންގަމުން ދިޔައީ ލޭންޑް އެންޑް އިންފްރާންސްޓްރެކްޗަރ އާއި ވައިޓަލް ރަޖިސްޓްރޭޝަން ސެކްޝަނުނެވެ.  

ހައުސިން މިނިސްޓްރީ އިމާރާތުގައި 12 ޑިސެމްބަރ ގައި ހިނގާދިޔަ ނުރައްކާތެރި އަލިފާނުގެ ހާދިސާގައި މަލޭސިޓީ ކައުންސިލްގެ ލޭންޑް އެންޑް އިންފްރާންސްޓްރެކްޗަރ އާއި ވައިޓަލް ރަޖިސްޓްރޭޝަން ސެކްޝަނަށް ވެސް ބޮޑެތި ގެއްލުންތަކެއްވެ އެތާނގެ ބޭނުން ނުހިފޭވަރު ވަނީވެފައެވެ.