ތުޅާދޫ 13 މިލިޔަންވެސް މުއިއްޒު ދިރުވާލީ؟

ބ. އަތޮޅު ތުޅާދޫއާއި ގޮއިދޫއާއި ފުޅަދޫ އަދި ފެހެންދޫގައި 2023 ވަނައަހަރު ތަރައްގީގެ އެތައް މަޝްރޫއެއް ކުރިއަށް ދިޔައެވެ. އެމްޑީޕީގެ ސަރުކާރުން 2023 ވަނަ އަހަރު ތުޅާދޫ ދާއިރާގައި ތަރައްގީގެ ގިނަ މަސައްކަތްތަކެއް ކުރަން ފަށާ ބާރު ސްޕީޑްގައި ކުރިއަށް ގެންގޮސްފައި ވެއެވެ. އެގޮތުން ދާއިރާގެ މައިރަށް ތުޅާދޫއަކީ އެމްޑީޕީ ސަރުކާރުން ވަރަށް ބޮޑު އިސްކަމެއް ދީގެން ތަރައްގީ ކުރެވޭތޯ މަސައްކަތް ކުރެވުނު ރަށެކެވެ. 

ތުޅާދޫގައި ޑިމޮކްރެޓްސްއާއި ޕީޕީއެމަށް ތުޅާދޫގައި ކިތަންމެ ތާއީދު ބޮޑުނަމަވެސް ރައީސް ސޯލިހުގެ ތަފާތު ނުކުރުމުގެ ސިޔާސަތުގެ ދަށުން ތުޅާދޫގެ ތަރައްގީއަށް އެމްޑީޕީން ވަރަށް ބޮޑު އިސްކަމެއް ދިނެވެ. އެގޮތުން 2023ގެ ބަޖެޓްގައި ހިމަނައިގެން ކުރަމުން އައިކަންކަމުގެ ތެރެއިން އެމްޑީޕީ ވެރިކަން ނިމުނުއިރު ތުޅާދޫ ރައްޔިތުން ބޭނުންވެގެން ކުރަމުންއައި ނުނިމިއޮތް މުހިންމު ދެކަމެއް ފާހަގަ ކޮށްލާނަމެވެ.   

1- 30 އެނދުގެ ހޮސްޕިޓަލް އިމާރާތްކުރުން. 

18 މަސްތެރޭގައި ނިންމުމަށް އެމްޓީސީއާއއި އެކު 4.4 މިލިޔަން ރުފިޔާއަށް ނިންމުމަށް އެމްޓިސީއާއއެކު އެއްބަސްވެގެން ފަށަފައިވާ މަސައްކަތުގެ %30 ވަނީ އެމްޑީޕީގެ ވެރިކަން ނިމުނު އިރުކޮށް ނިމިފައެވެ. ތުލާދޫ ހޮސްޕިޓަލްގެ އެއްވެސް މަސައްކަތެއް މިސަރުކާރުން އަދި ނުކުރެއެވެ. 

2. ފުޓްބޯޅަ ބޮޑު ދަނޑު ހެދުން. 

އެމްޑީޕީގެ ވެރިކަން ނިމުނު އިރު ފުޓްބޯޅަ ދަނޑުގެ %80 މަސައްކަތް ވަނީ ނިމިފައެވެ. ނުނިމިހުރި މަސައްކަތްތައް ކުރުމަށް 0.75 މިލިއަން ރުފިޔާ 2024އަށް ބަޖެޓް ކުރެވިފައި އޮތަސް އެކަން މިސަރުކާރަކުން ނުކުރިއެވެ.

ރައީސް މުއިއްޒު ސަރުކާރަށް އެމްޑީޕީން 2024 އަހަރަށް ފާސްކޮށްދިން 49 ބިލިއަން ރުފިޔާގެ ބަޖެޓްގައި ބ. ތުޅާދޫ ދާއިރާގެ 4 ރަށުގެ ތަރައްގީގެ މަޝްރޫއުތަކަށް 38.5 މިލިޔަން ރުފިޔާ ކަނޑައެޅިއެވެ. 

ތުޅާދޫ ރައްޔިތުންގެ އެދުމުގެ މަތީން 2024 ވަނަ އަހަރުގެ ބަޖެޓްގައި އެމްޑީޕީން ވަނީ ގިނަ ކަންތައްތަކެއް ހިމަނާދީ ފާސްކޮށްދީފައެވެ. އެގޮތުން 2024 ވަނަ އަހަރުގެ ދައުލަތުގެ ބަޖެޓްގައި ބ. ތުޅާދޫގައި އަލުން ތަރައްގީކުރުމަށް ބަޖެޓްކުރެވިފައިވާ 13 މިލިޔަން ރުފިޔާގެ ޕީއެސްއައިޕީ 7 ޕްރޮޖެކްޓް އޮތެވެ. އޭގެ ތެރޭގައި ހިމެނެނީ:

• ހޭންޑް ބޯޅަ ކޯޓް ތަރައްގީކުރުން
• އެއަރޕޯޓް ގާއިމުކުރުން
• ފެންހިންދާ ނިޒާމް ގާއިމުކުރުން
• ބަނދަރު ނެރުފައިކަށި އަޕްގުރޭޑް ކުރުން
• މަގުތައް ޒަމާނީ ފެންވަރަށް ހެދުން
• ކުނިމެނޭޖްކުރާ މަރުޒަކު އަޕްގުރޭޑްކުރުން
• އިތުރު 100 ހައުސިންގ ޔުނިޓް އެޅުން 

2024 ގެ ބަޖެޓް ހުސްވެ ސަޕްލިމެންޓްރީ ބަޖެޓެއް ފާސްކޮށް އަހަރު ނިމިގެން ދިޔައިރު ހައްދަވައިގެން ބުނެވިދިޔަ އެއްވެސް ކަމެއް ބ. ތުޅާދޫގައި ރައީސް މުއިއްޒު ސަރުކާރުން ކޮށްފައެއް ނެތެވެ. ކުރަން ފަށާފައެއްވެސް ނެތެވެ.