ބިންވެރިޔާ ސްކީމް ބާތިލުކުރުމަކީ މުއިއްޒު ހަނގުރާމަ އިއުލާންކުރުން

މާލޭ ރައްޔިތުންގެ މައްޗަށް އޮންނަ އަދާވާތް ތެރިކަން ރައީސް މުއިއްޒުގެ ވަރަށް ބޮޑެވެ. މުއިއްޒުގެ އަދާވާތްތެރިކަމުން ކުރާކަމަކީ މާލޭ މީހުނަށް ގޯއްޗާއި ފްލެޓް ނުދީ ހިފެހެއްޓުން އެކަންޏެއް ނޫނެވެ. ކޮންމެ ކަމެއްގައިވެސް މާލޭ މީހުނަށް މުއިއްޒު ކުރަނީ ދައްޗެވެ. އުދަގުލެވެ. މާލޭގައި ދިރިއުޅޭ މީހުނަށް ލުއިފަސޭހަވާނެ އެއްވެސް ކަމެއް މުއިއްޒެއް ނުކުރާނެއެވެ.

ބިންވެރިޔާ ސްކީމަކީ ސްކޭމެއްގެ ގޮތުގައި ސިފަކޮށް މާލޭގެ 9000 އާއިލާއެއްގެ ބައިލައްކައެއްހާ މީހުންނާ މުއިއްޒު ސަރުކާރުން ހަނގުރާމަ އިއުލާނު ކުރާނީ އެހެންވެގެންނެވެ. ޕީއެންސީގެ މަތިފަޑީ މީހުންނާއި މުއިއްޒު ސަރުކާރުގެ އެތައް އިސްވެރިންނެއް މާލޭ މީހުންނަށް މާލެ ސަރަހައްދުން ގޯތި ދިނުމާ ދިމާ ދެކޮޅުވާނީ އެހެންވެއެވެ. 

މުއިއްޒުގެ ކޮއްކޮ ނިލަންދޫ މެންބަރ ސައުދާއާއި ޕީއެންސީ ޕީޖީ ލީޑަރ ފަލާހާއި ބާރަށު ދާއިރާގެ މެންބަރު ޝުޖާއުއާއި މާފަންނު ދެކުނު ދާއިރާގެ މެންބަރު ރިފާއުއާއި އެނޫންވެސް މަޖިލިސް އެތައް މެންބަރުންނެއް މާލޭ މީހުނަށް ގޯތިދިނުމާ ދެކޮޅެވެ. މާލެ ސަރަހައްދުން މާލޭ މީހުނަށް ގޯތިދިނުން އެއީ ކޮށްގެން ނުވާނެ ޖަރީމާއަކަށް އެމީހުން ވަނީ ހަދާފައެވެ. އެކަމަކު ދައުލަތުން ބޮޑު ހޭދަކޮށްގެން ހިއްކާފައިވާ ބިމަކުން ހިލޭ ދީފައިވާ ގޯއްޗެއްގައި ދިމްޔާތު އިމާރާތްކޮށްގެން މުއިއްޒު ފައިދާ ނަގާ އުޅޭއިރު އެކަން އެ މީހުންނަކަށް ގޯހަކަށް ނުވެއެވެ. ދިމްޔާތަކީ ވަށަފަރު ހުސައިން އަބްދުއްރަހުމާނު އުފަން ވީއިރު މަހަކަށް ވެއްޓުނު ބިމެއް ނޫނެވެ.

ދިމްޔާތެކޭ އެއްގޮތަށް ދައުލަތުން ހަރަދުކޮށްގެން މާލޭގެ ބިމަށް އިތުރުކޮށްފައިވާ އެތައް ސަތޭކަ ގޯއްޗެއް އެކި މީސްމީހުނަށް މީގެކުރިން ވެސް ދީފައި އެބައޮތެވެ. އެއީވެސް ހަމަ ބަންޑާރަ ބިމެވެ. ދިނީ ހިލެއެވެ. އެ ބިންބިމުގައި ވިޔަފާރިކޮށް، ކުއްޔައްދީ، ވިއްކާ ބޮޑެތި މަހުޖަނުންނަށް އެތައް ބަޔަކު ވަނީވެފައެވެ. އެ ތަންތަނުގައި ބޮޑެތި ބިނާތައް ކޮށްގެން ބޮޑެތި ފައިދާ ނަގަމުންދާ މީސް މީހުން "ބިންވެރިޔާ ސްކީމް"އިން ބަޔަކަށް ހިލޭ ގޯތިދީގެން އުޅޭތީ އެބަ މޭކަރައެވެ.

ބިންވެރިޔާ ސްކީމަކީ އުފެދުމުގައިވެސް ބާތިލު ސްކީމެއްކަމަށް މުއިއްޒުގެ މުސާރަވެރިންނާއި މާލޭގެ ބިމަށް އިތުރުކުރި ބައިން ގޯތި ހޯދައިގެން ގޯތީގެ ފައިދާ ނަގަމުންދާ ބަޔަކު ބިންވެރިޔާ ސްކީމާ ދެކޮޅަށް އެބަ ވަކާލާތުކުރެއެވެ. ބިންވެރިޔާ ސްކީމަކީ ގާނޫނާ ހިލާފު ގައިރު ޒިންމާދާރު ކަމެއް ކަމަށް ސިފައެބަކުރެއެވެ. ބިންވެރިޔާ ސްކީމުން ގޯތިތައް ދިނުން ބާތިލުކުރުމަށް އެބަ ގޮވާލައެވެ. 

ވެގެން އުޅޭގޮތަކީ މާލެ ސަރަހައްދުން ބަޔަކަށް ހިލޭ ގޯތި ލިބުމަކީ އެބަޔަކު ތަނަވަސްވެ ފޯރުންތެރި ވެދާނެ ކަމެއް ކަމުން އެކަން ބަޔަކަށް ހަޖަމު ނުވަނީއެވެ. މާލޭގެ ކުލީގެ އަގުވެއްޓި އަތްފޯރާ ފަށަށް ބޯހިޔާވަހިކަން ތިރިވުމަކީ ދިމްޔާތު ކަހަލަ އިމާރާތްތަކުގެ ޑިމާންޑް ކުޑަވެ އަގުތައް ވެއްޓޭނެތީ އެކަން ނުވާނެ ހުރިހާ ގޮތެއް ބާރުގައި ތިބީތީ ހަދަން އުޅެނީއެވެ. 

ބިންވެރިޔާ ސްކީމުން ހިލޭ 9000 ގޯތި މާލޭ މީހުނަށް ދީފިއްޔާ ބާރަށު ޝުޖާއާއި އިނގުރައިދޫ ފަލާހާއި އެނޫން ވެސް މުއިއްޒުގެ އައުވާނުންނަށް ޑިސްކައުންޓް ރޭޓްގައި ދަމައިގަތް ބިންތަކުގެ އަގެއް ނުހުންނާނެތާއެވެ. ފަޒުލުމެން ދަރިފަސްކޮޅަށް ބަހާށާއި ބޮޑުއަގުގައި ވިއްކާ ވިޔާފާރިކޮށްގެން ވެރިންގެ ޖީބުތައް ފުރާކަށް ބިމެއް ނުހުންނާނެއެވެ.  

އެހެން ކަމުން މާލެ ސަރަހައްދުގެ ބިމަކީ ރަންވަޅަކަށް ހަދައިގެން ސަރުކާރު ހިންގަން ތިބޭ މީހުން ދައުލަތް ދަވާލަން އޮތް ވަސީލަތަކަށް މާލެ ސަރަހައްދުގެ ބިންތައް ހެދުމަކީ އޭގެ އަނެއް ބޭނުމެވެ. އެޗްޑީސީ ތެރެއިން މީހާރު ހިންގާލައިގެން އެއުޅޭ ޒާތުގެ ވައްކަންތައް ހިންގޭނީ ބަޔަކަށް ބިންނުދީ ވީހާވެސް ގިނަ ބިމެއް ސަރުކާރު ހިންގާ މީހުންގެ ކޮންޓްރޯލުގައި ބާއްވައިގެންތާއެވެ.