ދޮންއަމަޔަށް އެވޯޑްދިނުމުން މީޑިއާ ކައުންސިލް އުވާލާނެ!

ހުސްވި އަހަރުގެ ޖާނަލިޒަމް އެވޯޑް މުއިއްޒަށް ހަޖަމެއްނުވާނެއެވެ. "ދޮންއަމާ" އަށް ޖާނަލިޒަމް އެވޯޑް ލިބުމަކީ މުއިއްޒު ފައިދަށުން ބިންގަނޑު ކަހައިގެން ދާވަރު ކަމަކަށް ވެއްޖެކަން ކަށަވަރެވެ. މުއިއްޒު ގެންގުޅޭ ބޯފިތުނު ކަމަނާގެ ބަސްމަގު ހުރިގޮތުން މުއިއްޒުގެ ބޮލުރޮދި ކެނޑިއްޖެކަން ޔަގީނެވެ. މުއިއްޒު ބޮލަށް ތެޔޮއަރައިގެން އެކަމާ މޮޅިން ޝިއުނާމެން ނެގިނެގިފައި ޖެހުނަސް "ދޮންއަމާ" އެވޯޑް ހޯދައިފިއެވެ. ދެން އޮތް އެވޯޑް އޮތީ "ބެލްކަނި" ވީޑިއޯ ރިޕޯޓަށް ނޫންކަމެއް ނޭނގެއެވެ. "ބެލްކަނި" އެވޯޑް ހޯދުމުގެ ކުރީން މީޑިއާ ކައުންސިލް އުވާނުލާ މުއިއްޒު ލޮލުފިޔަ ނުޖަހާނެކަން ގައިމެވެ. 

މީޑިއާ ކައުންސިލަކީ ސަރުކާރުގެ ބާރެއް ނުފޯރާ ގޮތަށް އޮތް ހަމައެކަނި ދައުލަތުގެ މުއައްސަސާއެވެ. އެކައުންސިލަކީ ރައީސް ބޭނުން ވުމުން މެންބަރުން ވަކިކުރެވޭ ތަނެއް ނޫނެވެ. މަޖިލީހުގެ ރުހުންލިބިގެން މެންބަރުން ތިބޭ ތަނެއްވެސް ނޫނެވެ. މީޑިއާ ކައުންސިލަކީ ނޫސް އެޖެންސީތަކުން ވޯޓު ލިބިގެން އުފެދިފައި އޮންނަ ކައުންސިލެކެވެ. މީޑިއާ ކައުންސިލަކީ އަމިއްލަ ޒާތުގައި މަސައްކަތް ކުރާ މިނިވަން މުއައްސަސާއެކެވެ. މީޑިއާ ކައުންސިލަށް ސަރުކާރުގެ ނުވަތަ ސިޔާސީ ޕާޓީއެއްގެ ނުޒޫފު ފޯރުވޭނެ ހަމައެކަނި ގޮތަކީ ކައުންސިލްގެ ގާނޫނަށް ބަދަލު ގެނައުމެވެ. 

މިހާރު ގާނޫނު އޮތްގޮތުން މީޑިއާ ކައުންސިލަށް ސިޔާސީ ނުފޫޒެއް ނުފޯރުވޭނެއެވެ. ރައީސް ބޭނުންވުމުން ބޭނުންހާ ކަމެއް ބޭނުންހާ ގޮތަކަށް އެކައުންސިލަކުން ނުކުރުވޭނެއެވެ. އެހެން ކަމުން މީޑިއާ ކައުންސިލާއި ބްރޮޑްކާސްޓިންގ ކަމިޝަން އެއްކޮށްލުމުގެ ވާހަކަ ދޭތެރެ ދޭތެރެއިން މަޖިލީހުގައި ފެންމަތިވެއެވެ.

ސިޔާސީ ނުފޫޒު މީޑިއާ ކައުންސިލްގެ މައްޗަށް ނުފޯރުވޭތީ އެ ކައުންސިލަކީ މެންބަރުންގެ މުސާރަ އެންމެ ކުޑަ މުއައްސަސާއަށް އޮންނަނީ ހަދާފައެވެ. ދައުލަތުގެ ބަޖެޓުންވެސް އެންމެ ކުޑަ ބަޖެޓެއްދޭ މުއައްސަސާއަކީ މީޑިއާ ކައުންސިލޭ ބުނުމަކީ ދޮގަކަށް ނުވާނެއެވެ. 

އެއްވެސް އިރެއްގައި މީޑިއާ ކައުންސިލަކީ ސަރުކާރުގެ ރުހުމާއި ތާއިދު ލިބޭ މުއައްސަސާއެއް ނޫނެވެ. ސަރުކާރުން ބޭނުންވާހާ ގޮތްގޮތަށް މީޑިއާތަކަށް ފިޔަވަޅުއަޅާ މީޑިއާގެ މިނިވަންކަން ސަރުކާރު ބޭނުންވާހާ ގޮތަކަށް ކޮންޓްރޯލުކޮށް ނުދޭތީ އަބަދުވެސް އޮންނަނީ ބޭނުންނެތް މުއައްސަސާއެއްގެ ގޮތުގައި ދައްކައިގެން އުވާލުމުގެ ބިރުދައްކާފައެވެ.

ސަރުކާރުގެ ނުފޫޒު މީޑިއާތަކުގެ މައްޗަށް ހިންގަން ބޭނުންކުރާ ހަތިޔާރަކީ ބްރޮޑްކާސްޓިންގ ކޮމިޝަނެވެ. ބްރޮޑްކާސްޓިންގ ކޮމިޝަނަކީ މެންބަރުންނަށް ބޮޑު މުސާރަދޭ މަޖިލީހުން އައްޔަނުކުރާ ބައެއްކަމުން މަޖިލީހުގެ މެޖޯރިޓީ އޮންނަ ޕާޓީއެއްގެ ޕަޕެޓެއްގެ ގޮތުގައި ބްރޮޑްކާސްޓިންގ ކަމިޝަން މަސައްކަތް ކުރުވައެވެ. 

ރައީސް އޮފީހުން ބޭނުންވާ ގޮތަށް މީޑިއާތަކަށް ފިޔަވަޅު ނާޅައިގެން މީޑިއާ ކައުންސިލާމެދު ނުރުހުންވެފައިވާ ދަނޑިވަޅެއްގައި "ދޮންއަމާ"އަށް މީޑިއާ އެވޯޑް ދިނުމަކީ މުއިއްޒުގެ ރުޅިފަޅައިގެން ދާނެކަމެކެވެ. މުއިއްޒުގެ މުށުތެރޭގައި އެޅިހާބަތަކަށް ރިހަވެފައި އޮތް މަޖިލީހުން މީޑިއާ ކައުންސިލް އުވާލާކަށް ދެން ލަހެއް ފަހެއް ނުވާނެއެވެ. އެކަމަކު ރައްޔިތުން މުއިއްޒާ އަރާހަމަ ކުރާނެއެވެ.