ފަހުންވެސް ގޮތް ދޫކުރާކަން ނަސީބު: ފައްޔާޒު

ސަރުކާރުން ކުރާ ކޮންމެ ކަމެއް ފަހުން ބަދަލުކުރަން ޖެހުމުން 'އުނބަށް ޖެހީޔޭ' ރައްޔިތުން ބުނާނެ ކަމަށާއި ގޯސްކޮށް ކޮންމެ ކަމެއް ކޮށްފައި ވެސް ބޮޑެތި ގެއްލުންތަކެއް ގައުމަށް ލިބޭ ފަހުން މަޖުބޫރުވެގެން ވެސް ރަނގަޅު ކުރާކަން އެއީ ވަރަށް ބޮޑު ނަސީބެއްކަމަށް އެމްޑީޕީގެ ޗެއަރޕާސަން ފައްޔާޒު އިސްމާއީލު ވިދާޅުވެއެވެ.

މާލެ ސަރަހައްދުން ގޯތިދިނުމަށް ކުރީ ސަރުކާރުން އެކުލަވާލި އުސޫލާއި އެއްގޮތަށް ގިރާވަރުފަޅާއި ގުޅީފަޅުން ދިނުމަށް އެއްބަސްވެ ސޮއިކޮށް ރަޖިސްޓްރީ ދޫކޮށްފައިވާ ގޯތި ތަކުގެ ރަޖިސްޓްރީ ބާތިލުކޮށް އުސޫލަށް ބަދަލުގެނެސް އަލުން ބަދަލުގެނެސް ގޯތިދޭ އެއްބަސްވުމުގައި ސޮއިކުރުވަން މިސަރުކާރުން ނިންމިއެވެ. ބިންވެރިޔާ ސްކީމުގެ ދަށުން ގުޅީފަޅުން ގޯތި ލިބުނު މީހުންގެ އެއްބަސްވުންތަކަށް ސަރުކާރުން ބަދަލު ގެނައީ މިދިޔަ ސަރުކާރުން ހަދާފައިވާ އެއްބަސްވުންތައް ބިމާބެހޭ ގާނޫނުގެ މާއްދާއަކާ ހިލާފު ކަމަށް ބުނެ އެވެ.

ސަރުކާރުގެ އެނިންމުން ބަދަލުކޮށް މިހާރު ނިންމާފައިވަނީ މެއި 30، 2025 ގައި ނެގި ގުރުއަތާ އެއްގޮތަށް ގޯތިތައް ހަވާލު ކުރުމުގެ ގޮތުން ގޯތީގެ އާ ރެޖިސްޓްރީ ނަންބަރާއި، ގޯތި އޮތް ތަން ބަޔާން ކޮށްދިނުމަށް ހިމަނާ ކޯޑިނޭޓްސްގެ އިތުރުން ގޯތީގެ ނަންބަރު ބަދަލުކުރުމަށްފަހު އިތުރު ބަދަލެއް އެއްބަސްވުމަށް ނުގެނެސް ސޮއި ކުރުވުމަށެވެ. 

ކުރީ ސަރުކާރުން ވެފައިވާ އެއްބަސްވުމަށް އިސްލާހެއް ނުގެނެސް ސޮއި ކުރުމަށް ހައުސިން މިނިސްޓްރީން މިރޭ ނިންމީ ބިންވެރިޔާ ސްކީމުގެ ދަށުން ގުޅީފަޅުން ގޯތި ލިބުނު މީހުންގެ އެއްބަސްވުމަށް ބަދަލުތަކެއް ގެންނަން ސަރުކާރުން ނިންމުމުން، އެކަމާ ގިނަ ބަޔަކު ނުރުހުން ފާޅުކޮށް ޝަރީއަތަށް ދާހިސާބަށް ދިޔުމުންނެވެ. 

ރައީސް ސޯލިހު ސަރުކާރުން ހެދި އެއްބަސްވުމުގައި އޮންނަނީ މާލެ ސަރަހައްދުން އަމިއްލަ ނަމުގައި 600 އަކަފޫޓަށް ވުރެ ބޮޑު ބިމެއް ނުވަތަ ބޯހިޔާވެހިކަމެއް ރަޖިސްޓްރީވެފައި ނެތުމާއި މާލެ ސަރަހައްދުން ތިމާގެ އަމިއްލަ ނަމުގައި 600 އަކަފޫޓަށްވުރެ ކުޑަ ބަންޑާރަ ބިމެއް ރަޖިސްޓްރީވެފައިވާނަމަ އެތަނެއް އުސޫލާ އެއްގޮތަށް ދޫކޮށްލަން އެއްބަސްވުމެވެ.

ރައީސް މުއިއްޒު ސަރުކާރުން ގެނައި ބަދަލުގައިވަނީ ގޯތި ލިބޭ ފަރާތުގެ އަމިއްލަ ނަމުގައި 600 އަކަފޫޓަށް ވުރެ ކުޑަ ބަންޑާރަ ގޯއްޗެއް، އަމިއްލަ ގޯއްޗެއް، އެއްމެދު އިމާރާތެއް، ފްލެޓެއް، ސަރުކާރުން ދީފައިވާ ސޯޝަލް ހައުސިން އެއް ރާއްޖޭގެ އެއްވެސް ސަރަހައްދަކުން ރަޖިސްޓަރީ ކޮށްފައިވާނަމަ އެ ގޯއްޗެއް ރަޖިސްޓަރީ ކުރެވިފައިވާ އެއްމެދު މިލްކުވެރިންނަށް ބަދަލަކާއި ނުލައި ދޫކޮށްލުން ޝަރުތުކޮށްފައެވެ. އޭގެ އިތުރުން ގޯތީގެ އެއްމެދު މިލްކުވެރިޔަކު ނެތް ނަމަ ދައުލަތަށް ދޫކޮށްލުމަށް ގޯތި ލިބޭ ފަރާތުން އެއްބަސްވުމަށެވެ. 

"މިހާ ހިސާބަށް ކަންކަން ދިޔައީމާ ތިމަންނާއަށް ހަމަ މިކަން ވާނެބާއޭ އަމިއްލަ ނަފުސާ ސުވާލުކޮށްލަން އެބަޖެހޭކަމަށް އޮނަރަބަލް ފައްޔާޒު ވިދާޅުވެއެވެ. ގައުމާއި ރައްޔިތުން ދެކެ އެއްވެސް ވަރެއްގެ ލޯތްބެއް އޮތްނަމަ ހިތާހިތުން މި ސުވާލުކޮށްލާ، އިއާދަނުކުރެވޭ ހިސާބަށް ކަންކަން ދިޔުމުގެ ކުރިން ގައުމާއި ރައްޔިތުންނަށްޓަކައި މަގާމުން ދުރަށް ޖެހިލުން އެއީ އެންމެ ފައިދާ ހުރި ގޮތް ކަމަށް އެމްޑީޕީގެ ޗެއަރޕާސަން ފާޑުވދާޅުވެ ކުރެއްވި ޕޯސްޓެއްގައި ލިޔުއްވާފައިވެއެވެ.