ހީރަސް ސުފުރާ: އޯޓުކުޅި ބޯކިބާ

ހީރަސް ސުފުރާ ހިމަނާލަން މިއުޅެނީ އާދައިގެ  ކުޅި ބޯކިބަލެއް ނޫނެވެ. އޯޓްސް ބޭނުން ކޮށްގެން އަޅާ އޯޓުކުޅި ބޯކިބާ އެޅުމަކީ ނިކަން ފަސޭހަކަމެކެވެ.

ބޭނުންވާތަކެތި:

• 1 ޖޯޑު އޯޓްސް
• 1 ޖޯޑު ފެނުކައްކާފައިވާ އަލުވި
• 1 މަސްދަޅު
• 1/2 ލުނބޯގެ ހުތް
• 1 ފިޔާ
• 10 ހިކަނދިފަތް
• 1/2 ގިތެޔޮމިރުސް
• 1/4 ސައިސަމްސާ ރީނދޫ
• 1 ސައިސަމުސާ ޗިސްކޮށްފައިވާ އިނގުރު
• 1 ލޮނުމެދު (ޗިސްކޮށްފައި)
• ރަހަލާވަރަށް ލޮނު
• 1 ސައިސަމްސާ ތެޔޮ

ހަދާނެގޮތް:

• އޯޓްސް ޕެކެޓުގައިވާ ބުނެފައިވާ ގޮތަށް އޯޓްކޮޅު ތައްޔާރުކޮށްލާށެވެ. ފެންކޮޅަކަށް އަޅާފައި ކުޑައިރުކޮޅަކު ބަހައްޓާލުން ނޫންކަމެއް ކުރާކަށް ވަރަށް މަދުން ނޫނީ ޕެކެޓްގައި ބުނެފައެއް ނޯވެއެވެ.
• ގިތެޔޮމިރުހާއި ފިޔައާއި ހިކަނދިފަތް ތުނިކޮށް ކޮށާލާށެވެ.
• ކޮށި ތަކެއްޗާއި އިނގުރާއި، ލޮނުމެދާއި، ލުނބޯ ހުތް ލޮނުކޮޅާއި އެކު ރަނގަޅަށް މޮޑެލާށެވެ.
• މޮޑެލި ތަކެތީގެ ތެރެއަށް މަސްދަޅާއި، އަލުވި، ރީނދޫ އަދި އޯޓްސްކޮޅު އަޅައި އެއްކުރާށެވެ.
• ތަވައެއް އުދާށެވެ. ނޮން ސްޓިކް ވައްތަރުގެ ތަވައެއް އޮތީއްޔާ ރަނގަޅީ އެ ބޭނުން ކުރުމެވެ.
• ތެޔޮކޮޅު ޓިޝޫކޮޅެއް ބޭނުންކޮށްގެން ތަވާގައި ރަނގަޅަށް ހާކާލާށެވެ.
• އެއްކުރި ސާމާނު ތަވަޔަށް އަޅާލާފައި ރީތިކޮށް ފަތުރާލާ އޮމާންކޮށްލާށެވެ. ބައި އިންޗިއެއްހާ ބޯމިން ހުންނާނެ ވަރަށް ފަތުރާލީމަ ރަނގަޅުވާނެއެވެ.
• ގިނި ބަހައްޓާނީ މަޑުކޮށެވެ. އަދި ބޯކިބަލުގެ މަތީބައިގެ ތެތްކަން ފިލަންދެން  ފިހުމަށްފަހު ފުށުން ޖަހާށެވެ.
• ފުށުންޖެހުމުން އަޑީގައި އޮތް ބަޔަށް ރަން މުށިކުލަ އަރަންދެން ފިހާށެވެ.