އިލެކްޝަނަށް: ނޭއްގާނިކަން ދައްކަން ރައްޔިތުންނަށް ދައުވަތު ނުދީ!

ޕާޓީތަކުގެ މެންބަރޝިޕްގައި މައްސަލަ ހުރިކަން އިލެކްޝަން ކޮމިޝަން އެނގެނީ ކިހާވަރެއް ވީމަހެއްޔެވެ. ވެރިކަން ކުރާ ޕީއެންސީން އައިޑެންޓިޓީން ވައްކަންކޮށްގެން މެންބަރުން ޕާޓީއަށް ވައްދާފައިވާކަން ނޭނގޭ ކުޑަކުއްޖަކުވެސް ނޫޅެއެވެ. 

އިލެކްޝަން ކަމިޝަން ކަމިޝަނަށް އެތައް ޝަކުވާއެއް އޮތީ ހުށަހަޅާފައެވެ. ކޮންމެ މީހަކު އެމީހެއްގެ ޝަކުވާ ވަކީން ހުށަނޭޅުމަކީ ލިސްޓާމެދު ޝަކުވާ ނެތުމެއް ނޫނެވެ. ޝަކުވާ ހުށަނާޅާ ކޮންމެ ފޯމަކީ ސައްހަ ފޯމެއް ކަމަށް ބަލައިގެން ޕާޓީތަކުގެ މެންބަރޝޕިް ސައްހަކަން ކަނޑައަޅަން އާއްމުކޮށް ހީލަތްތެރި އިއުލާނެއް ކުރުމަކީ އިލެކްޝަން ކަމިޝަން ޒިންމާއިން ރެކެވޭނެ ކަމެއްނޫނެވެ. 

ފޮޓޯތަކާއި ސޮއިތަކާއި ފިންގަރޕްރިންޓްގެ ސައްހަކަން ކަށަވަރުކުރުމެއްނެތި ދޮގު ހެކިންގެ ދޮގުހެއްކަށް ބުރަވެ ޕާޓީތަކުގެ މެންބަރުޝިޕް ސައްހަކުރަން އިލެކްޝަނެއް ކަމަކު އުޅޭނެ ކަމެއްނެތެވެ. ވެރިކަމުގެ އާރާ ބާރުގައި ހުރީތީ މުއިއްޒު ބޭނުންހާ ގޮތަކަށް ކަންކަން ކުރެވޭނީ ވަކިވަރެއް ވަންދެނެވެ. 

ޕާޓީތަކަށް މީހުން ވެއްދުމުގައި ރޭވިގެން ގާނޫނާ ހިލާފް ބޮޑެތިކުށް ކޮށްގެން ޕީއެންސީއަށް މެންބަރުން އިތުރުކޮށްފައިވާކަން ސާބިތު ނުވަންނާ ރާއްޖޭގައި ށަބިތުވާނެ އެއްވެސް ކުށެއް ނުއޮންނާނެއެވެ. ޝަހުސު އޮޅުވާލުމާއި ދޮގުހެކި ދިނުމާއި ދޮގު މައުލޫމާތު ދީގެން ނާޖާއިޒު ފައިދާ ނެގި މީހުން ހޯދާ ފިޔަޅު އަޅަންނޫޅެ ޕީއެންސީގެ ވަގުފޯމްތަކަށް ގާނޫނީ ސައްހަކަން ހޯދާދޭން މަސައްކަތްކުރާ އިލެކްޝަން ކޮމިޝަންގެ މެންބަރުން މަގާމުގައި ތިބެން މުއިއްޒު ރުއްސަން ޗަރުކޭސް ކުޅެން ނުހަދާށެވެ. 

އިންސާފު ނުލިބި އިތުބާރު ގެއްލި ގޮތްހުސްވުމުން އެންމެންނަކު " ދެން ކިއްކުރާނީ" ކިޔާލަ ކިޔާލާ އަބަދު ހިމޭނުން ތިބޭނެ ކަމަށް ހީކުރަނީ ވަރަށް މޮޔަވީއެވެ. ދުނިޔޭގެ އެތަން މިތަނުން އެ ހަގީގަތް ފެންނަން އެހުރީއެވެ. އެއްޔަކީ ރާއްޖޭގެ ދުރުމާޒީއާއި ކައިރި މާޒީގައި ވެސް ފެންނާން އޮތް ހަގީގަތެވެ. 

މަހެއް ފަހާލާނެ މަހެއް ކަނޑުގައި އުޅޭފާނެކަން ހަދާން ނައްތާނުލާން ދިވެހި މުހާވަރާއެއްގައި އޮވެއެވެ. މުއިއްޒަށްވުރެ ގައުމާއި ރައްޔިތުން މާބޮޑެވެ. އިތުބާރު ގެއްލިފައިވާ ބަޔަކު ދައުލަތުގެ މުއައްސަސާތަކަށް ސަވާރުވެގެން ތިބެ މީހުންގެ ލޭކައްކުވަން ނޫޅޭށެވެ. ނުބައި ނުލަފާކަމާއި ނޭއްގާނިކަން ދައްކަން ރައްޔިތުންނަށް ދައުވަތު ނުދޭށެވެ.