މަސްވެރިންގެ ދުވަހު މަސްވެރިންނަށް ފައިސާދޭނީ ގަނޑުވަރުން؟!

މަސްވެރިންނަށް 48 ގަޑިއިރުގެ ތެރޭގައި ކިރާ މަހަށް ޑޮލަރުން އަގުދޭން ވައުދުވެވުނުކަން މުއިއްޒަށް ހަދާން ވެއްޖެއެވެ. ވެރިކަމަށް އަހަރުވެގެން ދިޔައިރު މުޒާހަރާ ކޮށްގެންނޫނީ މަސްވެރިންނަށް ލާރިކޮޅު ނުދެވޭ މީހަކަށް 48 ގަޑިއިރު ތެރޭގައި މަސްވެރިންނަށް ފައިސާ ދެވޭނެކަމަށް ގަބޫލުކުރާ މަސްވެރިއަކު ނޫޅެއެވެ. 

ޑިސެމްބަރ 10ގައި ގާނޫނު އަސާސީގެ ދިފާއުގައި ބޮޑު އެއްވުމަކަށް ތައްޔާރުވާތީ ބިރުނަގައިގެން 48 ގަޑިއިރު ތެރޭގައި މަސްވެރިންނަށް ފައިސާ ދޭނަމޭ ބުނީމާ ގަބޫލު ކުރާނީ ކާކުހެއްޔެވެ. ދޮގު ހަދާހަދާ ދޮގުން ކަޅިވެފައިވާ މީހަކު ދައްކާ ވާހަކައެއް ދިވެހިން މިހާރަކު ގަބޫލެއް ނުކުރެއެވެ. ނުވެސް ކުރާނެއެވެ. ދޮގުރަސްގެފާނުގެ ދޮގުމަޅީގައި ޖެހިގެން ޅޮސްއުނދޯލި ހެއްލަން ދިވެހިން ދެނެއް ނުތިބޭނެއެވެ. 

ރާއްޖޭގެ ހުރިހާ މަސްދޯނި ފަހަރަކީ ބޭންކް އޮފް މޯލްޑިވްސް (ބީއެމްއެލް) ގައި އެކައުންޓް ހުޅުވައިގެން އުޅޭ ބައެއްނޫނެވެ. އޮޑިވެރިންގެ އެކައުންޓަކީ ދޯނި ފަހަރުގެ އެކައުންޓެއް ނޫނެވެ. ފައިސާ ނުދިނުމުގެ ބަހަނާއަކަށް ދައްކާނީ ދޯނިފަހަރުގެ އެކައުންޓު ނެތުމުގެ ބަހާނާއެވެ. 

ގާނޫނު އަސާސީގެ ދިފާއުގައި މަސްވެރިން ނިކުމެދާނެކަމުގެ ބިރު ބޮޑުވެގެން ދޫނުކޮށް އޮތް 38 މިލިޔަން ރުފިޔާ ހަމަ ކުއްލިޔަކަށް ޖަމާކުރި ވާހަކަ ބުނީމާ މުއިއްޒުގެ މުނާފިގުކަން ނޫން އެހެން ކަމެއް މަސްވެރިންނަކަށް ނުފެނެއެވެ. މިހާތަނަށް މަހަށް އަގުނުދޭން 38 މިލިޔަން ހިފަހައްޓައިގެން ހުރީ ދެވެން ނެތިގެން ނޫންކަން މަސްވެރިންނަށް މާބޮޑަށްވެސް ސާފުވީއެވެ. މާދަމާގެ ފަހުން ދެންވެސް މުއިއްޒު ހަދާނީ ހަމަ އެހެންކަން މަސްވެރިންނަށް އެނގެއެވެ.  

މިފްކޯއަށް ބޭރުގެ ސީއީއޯއެއް އައްޔަނު އެކުރީ އިއްޔެއެވެ. އޭނާ އަދި އެ އުޅެނީ އޮފީހަށްވަދެ ތަން އޮތްގޮތް ދެނެ ނުގަނެއެވެ. އެރޭންޖުމެންޓެއް ޕްލޭނެއް ހެދޭނީ އޭގެ ފަހުންތާއެވެ. އެކަމަކު ފިނޭންސް މިނިސްޓްރީ އާއި ބީއެމްއެލް އާއި މިފްކޯ މެދުވެރިވެގެން މަސްވެރިންނަށް ފައިސާދޭނެ އެރޭންޖުމަންޓެއް ހެދިވާހަކަ މުއިއްޒު އެ ބުނީއެވެ. އެވަރުގެ ކަމެއް ކުރާނަމަ ކުރިއާލާ އެވާހަކަ ނުދައްކާ މުއިއްޒެއް ނުހުންނާނެއެވެ. މީޑިއާގައި ބޮޓުން ލައްވާ އެވާހަކަ ނުފަތުރައެއް މުއިއްޒެއް ނުހުންނާނެއެވެ. މަސްވެރިންނަށް 48 ގަޑިރު ތެރޭގައި ފައިސާދޭ ވާހަކައަކީ 10 ޑިސެމްބަރ ގެ ބޮޑު އެއްވުން ފިނިކުރަން ގާފަރު މަސްވެރިން ގާތުގައި ފަޅާލި ބޮޑުކަރައެކެވެ. ދޯނިފަހަރުގެ އެކައުންޓަށް 48 ގަޑިއިރު ތެރޭގައި ފައިސާ ޖަމާކުރާ ވާހަކައަކީ އެއްވެސް ޕްލޭނެއް މަޝްވަރާއެއް އިންތިޒާމެއް އޮވެގެން ދެއްކި ވާހަކައެއް ނޫނެވެ.

ރައީސް މުއިއްޒަކީ މަސްވެރިންގެ ރައީސްއެވެ. ރައީސް މުއިއްޒު ހުރީ ރައްޔިތުންގެ ފަޅީގައެވެ. އެހެންވީމާ މަސްވެރިން ފައިސާ ހޯދަން ދާންވީ ބޭންކަކަށް ނޫނެވެ. މަސްވެރިންގެ ދުވަހު ހުރިހާ މަސްވެރިން ފައިސާ ހޯދަން އެއްފަހަރާ ދާންވީ ރައީސް އަރިހަށެވެ. ގަނޑުވަރަށް ވިއްޔާ ގަނޑުވަރަށެވެ. އާރަށަށް ވިއްޔާ އާރަށެވެ.