އެމްޔޫ މަނިކު އަވަހާރަވި ހަބަރު އެއްސެވީ ފުން ހިތާމަޔާއެކު: ރައީސް ސޯލިހު
ދިވެހިރާއްޖެއަށް ފަތުރުވެރިކަން ތަޢާރަފްކޮށް އަދި ޒަމާނީ ކުރިއެރުންތައް ގެނެސްދެއްވި އެއް ބާނީ ކަމުގައިވާ ނިޝާން މުލީގޭ ޝަރަފުގެ އިއްޒަތުގެވެރި މުހައްމަދު އުމަރު މަނިކު (އެމްޔޫ މަނިކު) އަވަހާރަވި ހަބަރު އެއްސެވީ ނުހަނު ފުން ހިތާމަޔާއެކުގައި ކަމަށް ކުރީގެ ރައީސް އިބްރާހީމް މުހައްމަދު ސޯލިހު ވިދާޅުވެއްޖެއެވެ. ރައީސް ސޯލިހު އެހެން ވިދާޅުވީ މުހައްމަދު އުމަރު މަނިކު (އެމްޔޫ މަނިކު) އަވަހާރަވުމުގެ ހިތާމައިގައި އެކްސްގައި ކުރެއްވި ތައުޒިޔާގެ ޕޯސްޓްގައެވެ.
މުހައްމަދު އުމަރު މަނިކު (އެމްޔޫ މަނިކު) އަވަހާރަވި ހިތާމާގައި އެމަނިކުފާނާއި އާއިލާ ބައިވެރިވެ ވަޑައިގެން ތައުޒިޔާ ދަންނަވާކަމަށް ވިދާޅުވެފައިވެއެވެ.
ރައީސް ސޯލިހު ވިދާޅުވީ "އެމްޔޫ މަނިކަކީ ފަތުރުވެރިކަމުގެ ޞިނާޢަތް ކުރިއެރުވުމަށް ގިނަ ޚިދުމަތްތަކެއް ކުރެއްވުމުގެ އިތުރުން ދިވެހި ދައުލަތަށްވެސް 19 އަހަރަށްވުރެ ގިނަ ދުވަހު ޚިދުމަތް ކުރައްވާފައިވާ ޚިދުމަތް ތެރިއެއް" ކަމަށެވެ. އިޖްތިމާޢީ ދާއިރާއިންވެސް ގައުމަށް ނުހަނު ގިނަ ހިދުމަތްތަކެއް ކޮށްދެއްވަމުން ގެންދެވި ބޭފުޅެއް، ކަމަށްވެސް ރައީސް ސޯލިހު ވިދާޅުވިއެވެ.
ހާއްސަކޮށް ސިއްހީ ދާއިރާ އަށާއި ތައުލީމީ ދާއިރާއަށް ކޮށްދެއްވި ހިދުމަތްތައް ރައީސް ސޯލިހު ފާހަގަ ކުރައްވައެވެ. އެގޮތުން އެމްޔޫ މަނިކަކީ މަތީ ތައުލީމުގެ ފުރުސަތު ފަހިކޮށް މީހުން ބިނާކުރުމަށް ވަރަށް ގިނަ ބަޔަކަށް ދީލަތި އެހީތެރިކަން ފޯރުކޮށް ދެއްވަމުން ގެންދެވި ބޭފުޅެއްކަމަށް ރައީސް ސޯލިހު ވިދާޅުވިއެވެ.
"އަޅުގަނޑުގެ ދުޢާ އަކީ މާތް الله ޢާއިލާއަށް ކެތްތެރިކަން ދެެއްވާ މަރްޙޫމް މުހައްމަދު އުމަރު މަނިކަށް ސުވަރުގޭގެ ދާއިމީ ނިޢުމަތް މިންވަރު ކުރެއްވުން" ކަމަށް ޕޯސްޓް ނިންމަވާލައްވަމުން ރައީސް ސޯލިހު ވިދާޅުވެފައިވެއެވެ.
