އދގެ އަސާސްތަކާ ހަމަތައް ނެގެހެއްޓުން މުހިއްމު: އޮނަރަބަލް ޝާހިދު
ކޮންމެ ގައުމަކަށްވެސް ބައިނަލްއަގްވާމީ ސުލްހައާއި ހަމަޖެހުމަށް މަސައްކަތްކުރެވޭނެ
ޔޫ.އެން ޑޭ ފާހަގަ ކުރާއިރު އދގެ ޗާޓަރުގެ އަސާސްތަކާއި ހަމަތައް ނެގެހެއްޓުން އިހުނަށްވުރެ މިހާރު މުހިއްމުވެފައިވާ ކަމަށާއި މަލްޓިލޭޓަރަލިޒަމްއާއި މަޝްވަރާއާއި އެއްބައިވަންތަކަން ކުރިއަށް ނެރެން ޖެހޭކަމަށް ޔޫއެން 76ވަނަ ޖެނެރަލް އެސެމްބްލީގެ ރައީސް އަބްދުއްލާ ޝާހިދު ވިދާޅުވެއްޖެއެވެ.
ރާއްޖޭގެ ކުރީގެ ހާރިޖީ ވަޒީރު އަދި އެމްޑީޕީގެ މިހާރުގެ ރައީސް އޮނަރަބަލް އަބްދުއްލާ ޝާހިދު ވިދާޅުވި ގޮތުގައި ބޮޑެތި ގައުމުތަކާއެކު ކުޑަ ގައުމުތަކުން ވެސް މި ޒިންމާ އަދާކުރަން ޖެހެއެވެ. ރާއްޖެއިން އެކަން ސާބިތު ކޮށްދީފައިވާ ކަމަށްވެސް އެ މަނިކުފާނު ވިދާޅުވިއެވެ.
ރާއްޖެއަކީ އަބަދުވެސް މަލްޓިލޭޓަރަލިޒަމް ގަބޫލުކުރާ އަދި އދ.ގެ މުހިއްމުކަން ގަބޫލުކުރާ ގައުމެއްކަމަށް ޝާހިދު ވިދާޅުވިއެވެ. 1965 ވަނަ އަހަރުގެ ޖުލައި 26 ގައި ރާއްޖެއަށް މިނިވަންކަން ލިބުމަށްފަހު ހާރިޖީ ސިޔާސަތުގެ ފުރަތަމަ ނިންމުމަކަށް ދިވެހިރާއްޖެއިން ނިންމީ އދގެ މެމްބަރުކަން ހޯދުންކަން ރާއްޖޭގެ ރައްޔިތުންގެ މަޖިލީހުގެ ރައީސްކަން ވެސް ކުރައްވާފައިވާ ރާއްޖޭގެ އެންމެ ފުންނާބުއުސް ޑިޕްލޮމޭޓް އޮނަރަބަލް ޝާހިދު ވިދާޅުވިއެވެ.
ކޮންމެ ގައުމަކީވެސް ބައިނަލްއަގްވާމީ ސުލްހައާއި ހަމަޖެހުމާއި ކުރިއެރުމަށް މަސައްކަތްކުރެވޭނެ އަދި ކުރަން ޖެހޭނެ ގައުމެއް ކަމަށާއި އދ އަކީ އޭގެ އުނިކަންތަކާއި މައްސަލަތަކާއެކުވެސް، އަދިވެސް މުހިއްމު އަދި އޭގެ ބޭނުން ހިފަން ޖެހޭ ޖަމިއްޔާއެއް ކަމަށް އެމްޑީޕީގެ ރައީސް ޝާހިދު ގަބޫލު ކުރައްވައެވެ.
މިއަދު ދުނިޔެއަށް ދިމާވެފައިވާ ބޮޑެތި މައްސަލަތައް ކަމުގައިވާ ތިމާވެށީގެ މައްސަލަތަކާއި، ފަގީރުކަމާއި، ގަތުލުއާއްމުތައް ފަދަ މައްސަލަތައް ހައްލުކުރުމުގައި އދގެ ދައުރު މުހިއްމުވެފައިވާ ކަމަށްވެސް އދ ގެ ޖެނެރަލް އެސެމްބްލީގެ ރައީސްކަން ކުރެއްވުމުގެ ޝަރަފް ލިބިވަޑައިގެން ހުންނެވި ހަމައެކަނި ދިވެހި ދަރި އޮނަރަބަލް އަބްދުއްލާ ޝާހިދު ވިދާޅުވިއެވެ.
އޮނަރަބަލް އަބްދުއްލާ ޝާހިދު މިމޭރުމުން ވާހަކަފުޅު ދެއްކެވީ މިއަދު ފާހަގަކުރަމުންދާ " ޔޫ.އެން ޑޭ" ގެ މުނާސަބަތުގައި އެކްސްގައި ޕޯސްޓްކުރައްވާ ދެއްވި މެސެޖެއްގައެވެ.
ޔޫ.އެން ޑޭ ފާހަގަކުރަނީ 1945 ވަނަ އަހަރުގެ އޮކްޓޯބަރު މަހުގެ 24 ވަނަ ދުވަހު އެމެރިކާގެ ސެން ފްރެންސިސްކޯގައި އެކުވެރި ދައުލަތްތައް "ޔުނައިޓެޑް ނޭޝަންސް" އުފެއްދުމަށް ގައުމުތަކުން އެއްބަސްވެ ސޮއިކުރި ކުރުން ފާހަގަކުރުމަށެވެ.
