ރާއްޖެއަށް އޮތް އުފާވެރި މަގަކީ ރައީސް ސާލިހު: ރޮޒައިނާ
ރައީސްއަކީ މަދުން ނޫނީ ނުފެންނާނެ ފަދަ ރަނގަޅު ނަމޫނާއެއް: ރޮޒައިނާ
ރާއްޖެ އުފާވެރިކަމާއި ހަމައަށް ދާން އޮތް ހަމައެކަނި މަގަކީ ރައީސް އިބްރާހީމް މުހައްމަދު ސާލިހު ކަމަށް އައްޑޫ މީދޫ ދާއިރާގެ އިއްޒަތްތެރި މެންބަރު ރޮޒައިނާ އާދަމް ވިދާޅުވެއްޖެއެވެ. އެކަމަނާ އެހެން ވިދާޅުވީ ތ. ހިރިލަންދޫގައި ބޭއްވި އެމްޑީޕީގެ ކަންމަތީ ބައްދަލުވުމުގައި އިއްޔެ ވާހަކަފުޅު ދައްކަވަމުންނެވެ. ކުޑަރަށެއް ބޮޑު ރަށެއް ތަފާތު ކުރުމެއް ނެތި ރަށްތައް ތަރައްގީކުރުމަކީ ކުޑަ ރަށްރަށަށް ލިބިގެންދާ ވަރަށް ބޮޑު އުފަލެއް ކަމަށާއި ހިރިލަންދޫ އަކީ އެ ސިޔާސަތުގެ ފައިދާ ކުރި އެއް ރަށް ކަމަށް ވެސް ރޮޒައިނާ ވިދާޅުވިއެވެ.
ރައީސް ސާލިހަކީ ވަރަށް މަދުން ނޫނީ ނުފެންނަ ފަދަ ވިސްނުންތެރި ބޭފުޅެއް ކަމަށް އެކަމަނާ ވިދާޅުވިއެވެ. އެކަމަނާ ވިދަޅުވި ގޮތުގައި ކޮވިޑް 19 އަކީ ދުނިޔޭގެ ލީޑަރުންނަށް މިފަހުން ކުރިމަތިވި އެންމެ ބޮޑު އިމްތިހާނެވެ. އެ އިމްތިހާނުން ރައީސް އިބްރާހީމް މުހައްމަދު ސޯލިހު ފާސްވެވަޑައިގެންނެވީ ދުނިޔެއިން އެއްވަނައިގައި ކަމަށް އައްޑޫ މީދޫ ދާއިރާގެ އިއްޒަތްތެރި މެންބަރު ރޮޒައިނާ އާދަމް ވިދާޅުވިއެވެ.
ރާއްޖޭގެ ސިޔާސީ ދާއިރާގައި ހަރަކާތްތެރިވާ ލީޑަރުންގެ ތެރެއިން ރައީސް ސާލިހަށްވުރެ ވިސްނުންތެރިކަމާއެކު މަސައްކަތްކުރައްވާ، ހިކުމަތްތެރި ލީޑަރެއް ދިވެހިންނަށް ނުލިބޭނެ ކަމަށް އެކަމަނާ ވިދާޅުވިއެވެ. ރައީސްއަކީ ރަނގަޅު ނަމޫނާއެއް ކަމަށާއި އެފަދަ ބޭފުޅެއް މަދުން ނޫނީ ނުފެންނާނެ ކަމަށް ރޮޒައިނާ ވިދާޅުވިއެވެ. ރައީސައަކީ މަޑުމައިތިރިކޮށް ހުންނެވިޔަސް ވަރަށް ހަރުދަނާ ރަނގަޅު ޝަހުސިއްޔަތެއްކަން ކޮވިޑުގެ ހާލަތުގައި ގައުމު މެނޭޖްކުރެއްވި ގޮތުން އެކަނިވެސް ސާފުވާކަމަށް ރޮޒޭ ވިދާޅުވިއެވެ.
