ނުރައްކާތެރި އަލިފާނުގެ ހާދިސާއެއްގައި، 28 މީހުން މަރުވެއްޖެ

ޗައިނާގެ އިރުމަތީ ފޫޖިއަން ޕްރޮވިންސްގެ ޖިންޖިއަން ސިޓީގެ ޖިއަންގތޯ އަވަށުފައި ހުންނަ ފައިވާން އުފައްދާ ފެކްޓްރީއެއްގައި ހިނގި ނުރައްކާތެރި އަލިފާނުގެ ހާދިސާއެއްގައި، މަދުވެގެން 28 މީހުން މަރުވެއްޖެއެވެ. މި ހާދިސާ ހިނގާފައިވަނީ ބުރާސްފަތި ދުވަހު މެންދުރު 12:04 ހާއިރުއެވެ.

ހާދިސާއާ ގުޅިގެން ކުއްލި ހާލަތުގައި ހަރަކާތްތެރިވާ ގިނަ އަދަދެއްގެ ޓީމުތަކުން މީހުން އެ ސަރަހައްދަށް ގޮސްފައިވެއެވެ. އަލިފާން ނިއްވާ މީހުންނާއި ސަލާމަތީ ހިދުމަތްތަކުން އަލިފާންގަނޑު ކޮންޓްރޯލް ކުރުމަށް މަސައްކަތް ކުރަމުންދިޔައިރު، އެމްބިއުލާންސްތައް ވެސް ވަނީ ތައްޔާރީ ހާލަތަކަށް ގެނެވިފައެވެ.

ހާދިސާގެ ކުރީކޮޅު ލިބުނު މައުލޫމާތުތަކަށް ބަލާއިރު، ގިނަ ބަޔަކު އިމާރާތުގެ ތެރޭގައި ތާށިވެފައި ނުވަތަ ވީނުވީއެއް ނޭނގި ގެއްލިފައިވާ ކަމަށްވެއެވެ. ސޯޝަލް މީޑިއާގައި ދައުރުވަމުންދިޔަ ވީޑިއޯތަކުން ފެންނަ ގޮތުގައި، އިމާރާތުގައި ބޯކޮށް ދުން ފެތުރި އަލިފާންގަނޑު ބޮޑުވަމުން ދިޔަ ވަގުތު ބައެއް މަސައްކަތްތެރިން ތިބީ ސަލާމަތް ނުވެވި އިމާރާތުގެ ފުރާޅުމަތީގައެވެ. ހާދިސާގެ ނުރައްކާތެރިކަން ހުރި ގޮތުން، ފުރަތަމަ ކޮޅު ސަލާމަތީ ހިދުމަތްތަކަށް ފެކްޓްރީގެ ބައެއް ސަރަހައްދުތަކަށް ވަނުމަށް ބޮޑެތި ހުރަސްތަކެއް ކުރިމަތިވިއެވެ.

ޗައިނާގެ މިނިސްޓްރީ އޮފް އިމަޖެންސީ މެނޭޖްމަންޓާއި ނޭޝަނަލް ފަޔަރ އެންޑް ރެސްކިއު އެޑްމިނިސްޓްރޭޝަނުން ވަނީ، މީހުން ސަލާމަތް ކުރުމާއި ހާދިސާ ތަހުގީގު ކުރުމުގެ ކަންކަން ބެލެހެއްޓުމަށް ހާއްސަ ޓީމެއް އެ ސަރަހައްދަށް ފޮނުވާފައެވެ.

މި އަލިފާނުގެ ހާދިސާ ހިނގަން މެދުވެރިވި ސަބަބު ދެނެގަތުމުގެ ތަހުގީގު ދަނީ ކުރަމުންނެވެ.