ރާއްޖޭގައި މިހާރު މިއޮތީ ބަތްކައްކާކުޅޭ ސަރުކާރެއް

ހައުސިންގ މިނިސްޓްރީން މި މަހުގެ ދެވަނަ ދުވަހު ގެެޒެޓު ކުރި އިއުލާނުގައި ވަނީ ހާއްސަ އިސްކަންދޭ ކެޓަގަރީތަކުގައި ހިމެނޭ  23 އިދާރާއެއްގައި މަސައްކަތްކުރާ މީހުންނަށް ހާއްސަ ކޮށްފައިވާ 1،000 ފްލެޓު ދޫކުރާނެ ޝަރުތުތައް ވަނީ އާންމުކޮށްފައެވެ.

ކަނޑައެޅިފައިވާ 23 ދާއިރާގެ އިދާރާއެއްގައި މެދުނުކެނޑި މަސައްކަތްކުރާތާ އެއް އަހަރު ވެފައިވާ ނަމަ އާއިލީ ބޯހިޔާވަހި ކަމުގެ ފްލެޓަށް ޝަރުތު ހަމަވާނެ ކަމަށް އުސޫލުގައި ބަޔާންކޮށްފައި އޮތެވެ. އުސޫލު ކަނޑައަޅާ އިއުލާނުކުރިތާ ދެ ދުވަސް ފަހުން ދާއިރާގައި މަސައްކަތްކުރާ މުއްދަތަކީ ފަސް އަހަރު ކަމަށް ކަނޑައަޅާ އުސޫލު ވަނީ ބަދަލުކޮށްފައެވެ. 

އަޅެފަހެ ރާއްޖޭގައި މިހާރު މިއޮތީ ބަތްކައްކާކުޅޭ ސަރުކާރެއް ހެއްޔެވެ. އުސޫލާ ހަމަތައް ހެދުމުގައި ހަމައެއް ލަމައެއް ދުރުވިސްނުމެއް ނެތެވެ. ކުއްލި ކުއްލިއަށް ހިތުހުރި ބަދަލެއް ގާނޫނުތަކާއި ގަވައިދުތަކާއި އުސޫލުތަކަށް ގެނައުމަކީ އާދައަކަށް ހަދައިފިއެވެ. އެޔެއް މިޔެއް މީހުނަށް ނޭނގޭ ވަރަށް ހަމަލަމަ ބަދަލު ކުރަނީ ކޮރަޕްޝަނާއި ފަސާދައިގެ ތެރެއިން ކަންކަން ހާސިލުކުރުމަށެވެ. ވަކި ބަޔަކަށް ނަހަމަ ފައިދާ ހޯދާދިނުމަށެވެ. 

އިހުލާސްތެރި ނިޔަތެއްގައި ހާލަތު ވަޒަން ކޮށްގެން ކުރާ ކަންކަމުގައި ކުއްލިކުއްލިއަށް އުސޫލު ބަދަލު ކުރާކަށް ނުޖެހޭނެއެވެ. ޝަރުތު ހަމަވާ މުއްދަތު އެއް އަހަރު ކަމަށް ކަނޑައެޅީ ސިޔާސީ މުވައްޒަފުންނަށް ފްލެޓު ދިނުމަށް ކަމަށް ބުނެ އަޑުތައް ފެތުރެމުންދާތީ އެ މުއްދަތު ފަސް އަހަރަށް ބަދަލުކުރަން ނިންމުމަކީ ހަމައެއް ލަމައެއް ނެތްކަން ދަލީލުކުރާ ކަމެކެވެ.

އިދާރާތަކުގައި އުޅޭ ގާބިލު މުވައްޒަފުން އެ ތަންތަނުގައި ދިގު މުއްދަތަކަށް ބޭތިއްބުމުގެ މަގްސަދުގައި ފްލެޓްދީގެން ބްލެކް މޭލުކުރާ ވިސްނުމަކީ ސަރުކާރުގެ ނިޔަތުގެ ގޯސްކަމެވެ. މުއައްޒަފުން ދިގުމުއްދަތުގައި ހިދުމަތުގައި ދެމިތިބޭނީ ރަނަގަޅު މަސައްކަތު ވެއްޓެއް ގާއިމުކޮށްދީ އެކަށީގެންވާ މުސާރައާއި އިނާޔަތާއި ދީގެންނެވެ. ފްލެޓް ދީގެނެއް ނޫނެވެ.