ހީރަސް ރެސިޕީ: އޯޓް ބޯކިބާ
ހީރަސް ރެސިޕީގައި މިއަދު ކިޔުންތެރިންނަށް ގެނެސްދޭނީ އޯޓްސް ބޯކިބާ އެވެ. އޯޓްސް ބޯކިބަލަކީ ތަންކޮޅެއް ފަސޭހައިން އަޅާލެވޭ ބޯކިބަލެކެވެ. އޯޓްސް ބޭނުން ކުރުމުން ބޯކިބާ އެޅުން ތަންކޮޅެއް އަވަސްވެއެވެ.
- ބޭނުންވާތަކެތި:
- 1 ޖޯޑު އޯޓްސް
- 1 ޖޯޑު ފެނުކައްކާފައިވާ އަލުވި
- 1 މަސްދަޅު
- 1 ސައިސަމްސަލުގެ ޗިސްކޮށްފައިވާ އިނގުރު
- 1 ފިޔާ
- 1 ލޮނުމެދު ޗިސްކޮށްފައި
- 1 ސައިސަމްސާ ތެޔޮ
- 1/2 ލުނބޯގެ ހުތް
- 10 ހިކަނދިފަތް
- 1/2 ގިތެޔޮމިރުސް
- 1/4 ސައިސަމްސާ ރީނދޫ
- ރަހަލާވަރަށް ލޮނު
- ހަދާނެގޮތް:
ތަަައްޔާރު ކުރުން :
- އޯޓްސް، ޕެކެޓުގައިވާ ގޮތަށް ތައްޔާރުކޮށްލާށެވެ. ގިނަ ފަހަރަށް ޕެކެޓްގައި އޮންނާނީ ފެންކޮޅަކަށް އަޅާފައި ކުޑައިރުކޮޅަކު ބަހައްޓާލަން ބުނެފައެވެ.
- ގިތެޔޮމިރުހާއި ފިޔައާއި ހިކަނދިފަތް ތުނިކޮށް ކޮށާލާށެވެ.
- ކޮށި ތަކެއްޗާއި އިނގުރާއި، ލޮނުމެދާއި، ލުނބޯ ހުތް ލޮނުކޮޅާއި އެކު ރަނގަޅަށް މޮޑެލާށެވެ.
- އޭގެތެރެއަށް މަސްދަޅާއި، އަލުވި، ރީނދޫ އަދި އޯޓްސްކޮޅު އަޅައި އެއްކުރާށެވެ.
ބޯކިބާ ފިހުން:
- ތަވައެއް އުދާށެވެ. ނޮން ސްޓިކް ވައްތަރުގެ ތަވައެއް އޮތީއްޔާ އެ ބޭނުން ކުރާށެވެ.
- ތެޔޮކޮޅު ޓިޝޫކޮޅެއް ބޭނުންކޮށްގެން ތަވާގައި ރަނގަޅަށް ހާކާލާށެވެ.
- އެއްކުރި ސާމާނު ތަވަޔަށް އަޅާލާފައި ރީތިކޮށް ފަތުރާލާ އޮމާންކޮށްލާށެވެ. ބައި އިންޗިއެއްހާ ބޯމިން ހުންނާނެ ވަރަށް ފަތުރާލީމަ ރަނގަޅުވާނެއެވެ.
- ގިނި ބަހައްޓާނީ މަޑުކޮށެވެ. އަދި ބޯކިބަލުގެ މަތީބައިގެ ތެތްކަން ފިލަންދެން ފިހުމަށްފަހު ފުށުން ޖަހާށެވެ.
- ދެން އަޑީގައި އޮތް ބަޔަށް ރަން މުށިކުލަ އަރަންދެން ފިހާށެވެ.
