ތަހުގީކުރަމުން ވަގަށް ނެގި ބިޓްކޮއިންގެ ބަދަލުގައި 1.8 މިލިއަން ފައުންޑް

ތަހުގީގެއްގެ ތެރެއިން ހިފެހެއްޓި އަގުބޮޑު ކްރިޕްޓޯކަރަންސީ، ބިޓްކޮއިންތަކެއް ވަގަށް ނެގި ނޭޝަނަލް ކްރައިމް އެޖެންސީ (އެން.ސީ.އޭ) ގެ ކުރީގެ އޮފިސަރަކު، އެ ތަކެތީގެ ބަދަލުގައި 1.8 މިލިއަން ފައުންޑް ދައްކަން ޖެހިއްޖެއެވެ.

ބްރިސްޓަލްއަށް ނިސްބަތްވާ އުމުރުން 44 އަހަރުގެ ޕޯލް ޗޯލްސް، ވައްކަމާއި މަނީ ލޯންޑަރިންގެ ކުށަށް އިއުތިރާފުވުމާ ގުޅިގެން، މިދިޔަ އަހަރު ލިވަޕޫލް ކްރައުން ކޯޓުން ވަނީ އޭނާ ފަސް އަހަރާއި ބައިގެ މުއްދަތަށް ޖަލަށްލުމަށް ހުކުމްކޮށްފައެވެ.

ޑާކް ވެބް މެދުވެރިކޮށް ގާނޫނާ ހިލާފު ތަކެތި ވިއްކާ ކުށްވެރިން ހޯދުމަށް އެން.ސީ.އޭ އިން ކުރިއަށްގެންދިޔަ ތަހުގީގެއްގައި ބައިވެރިވުމަށްފަހު، މަސްތުވާތަކެތީގެ ވިޔަފާރިކުރާ މީހެއްގެ އަތުން އަތުލައިގަތް ބިޓްކޮއިންގެ ދެބައިކުޅަ އެއްބައި ޗޯލްސް ވަނީ އޭނާގެ އަމިއްލަ އެކައުންޓްތަކަށް ބަދަލުކޮށްފައެވެ.

ކްރައުން ޕްރޮސެކިއުޝަން ސާވިސް (ސީ.ޕީ.އޭ) އިން ވަނީ ޗޯލްސްގެ އަތުން ފެނުނު 30 ބިޓްކޮއިންގެ އަގާ އެއްވަރުގެ ފައިސާ ދެއްކުމަށް އަމުރެއް ނެރެފައެވެ. އެ ބިޓްކޮއިންތަކުގެ އަގު ކުރިން 36,000 ފައުންޑްގައި ހުރި ނަމަވެސް، މިހާރު އެ ތަކެތީގެ އަގު ވަނީ 1.8 މިލިއަން ފައުންޑަށްވުރެ މައްޗަށް އަރާފައެވެ.

މި މައްސަލައިގެ ތަހުގީގީ ޓީމުގައި މަސައްކަތްކުރިއިރު، ތަހުގީގަށް ހިފެހެއްޓި ޑިޖިޓަލް އާލާތްތަކުން ކްރިޕްޓޯކަރަންސީ ނެގުމާއި އެ ތަކެތި ތަހުލީލުކުރުމުގައި ޗޯލްސް ބައިވެރިވިއެވެ. މި މަސައްކަތުގެ ތެރެއިން، "ސިލްކް ރޯޑް 2.0" ނަމަކަށް ކިޔާ ޑާކް ވެބްސައިޓެއް މެދުވެރިކޮށް ކުށްވެރިންގެ ނެޓްވޯކްތަކަށް ގާނޫނާ ހިލާފު ތަކެތި ވިއްކިކަން ސާބިތުވެ، 2019 ވަނަ އަހަރު ތޯމަސް ވައިޓް 64 މަސްދުވަހަށް ޖަލަށްލުމަށް ހުކުމްކުރެވުނެވެ.

ވައިޓްގެ އަތުން 97 ބިޓްކޮއިން އަތުލައިގަތް ފަހުން، އޭގެ ތެރެއިން 50 ބިޓްކޮއިން ޑިޖިޓަލް ވޮލެޓުން ބޭރުކޮށްފައިވާކަން ފާހަގަކުރެވުނެވެ. އެން.ސީ.އޭ އިން އޭރު ބެލީ ވައިޓް ބަންދުގައި ހުރެގެން ކޮންމެވެސް ގޮތަކުން އެ ވޮލެޓަށް ވަދެފައިވާ ކަމަށެވެ. ނަމަވެސް ވައިޓް އެކަމަށް އިންކާރުކުރިއެވެ.

ހަގީގަތުގައި 2017 ވަނަ އަހަރު، ދައުލަތަށް ހިފެހެއްޓި ވޮލެޓުން ބިޓްކޮއިންތައް ނެގީ ޗޯލްސްއެވެ. އަދި އޭނާ ވަނީ ކްރިޕްޓޯކަރަންސީގެ އެކި މުއާމަލާތްތަކެއް ހިންގައިގެން އެކަން ފޮރުވަން މަސައްކަތްކޮށްފައެވެ.

މި ވައްކަމާ ގުޅިގެން މާސީސައިޑް ފުލުހުން ތަހުގީގެއް ފަށައި، 2022 ވަނަ އަހަރުގެ މެއި މަހު ޗޯލްސް ހައްޔަރުކުރިއެވެ. އަދި އޭނާގެ އަތުން ޖުމްލަ 30 ބިޓްކޮއިން ފެނިފައިވެއެވެ.

ސީ.ޕީ.އޭ ގެ ޕްރޮސީޑްސް އޮފް ކްރައިމް ޑިވިޜަންގެ ލޫކް ކްލެމެންޓްސް ވިދާޅުވި ގޮތުގައި، އެން.ސީ.އޭ ގެ ކުރީގެ އޮފިސަރު ވަނީ އޭނާއަށް އޮތް އިތުބާރުގެ ނާޖާއިޒު ފައިދާ އަމިއްލަ މަންފާއަށްޓަކައި ހިފާފައެވެ.

އޭނާ އިތުރަށް ވިދާޅުވީ، ކުށްކޮށްގެން ހޯދާ މުދާ އަތުލުމަށް ނެރޭ އަމުރުތަކަކީ ކުށްކޮށްގެން މަންފާ ނުހޯދޭނެކަން ކަށަވަރުކުރުމަށް އޮތް ވަރުގަދަ ވަސީލަތެއް ކަމަށެވެ. އަދި މިއަދުގެ އަމުރަކީ، ކުށްވެރިންގެ މުދަލާއި ފައިސާ ކޮންމެ ތަނެއްގައި ފޮރުވާފައި ހުރި ނަމަވެސް، އެ ތަކެތި ހޯދުމުގައި ދޫނުދޭނެކަން ހާމަކޮށްދޭ މެސެޖެއް ކަމަށްވެސް އޭނާ ވިދާޅުވިއެވެ.