ރާއްޖޭގެ ނަމޫނާއަށް ބަލައިގެން ސީޕްލޭންގެ ހިދުމަތް ލަކްޝަދީބަށް

ލަކްޝަދީޕުގައި ރާއްޖޭގެ ނަމޫނާއަށް ބަލައިގެން ސީޕްލޭންގެ ހިދުމަތް ފެށުމަށް އިންޑިއާގެ މަރުކަޒީ ސަރުކާރުން ހުއްދަ ދީފިއެވެ. މިއީ އެ ސަރަޙައްދުގެ ރަށްތައް ދަތުރުފަތުރުގެ ނިޒާމުން ގުޅާލުމަށް އެޅުނު މުހިންމު ފިޔަވަޅެކެވެ.

ލަކްޝަދީޕުގެ ރީތި ފަރުތަކާއި ފަޅުތަކުގެ މަތިން ސީޕްލޭންގައި ދަތުރުކުރުމުގެ ހުވަފެން ހަގީގަތަކަށް ވުމާ މިވަނީ ވަރަށް ގާތްވެފައެވެ. ފަތުރުވެރިކަމާއި ދަތުރުފަތުރުގެ ދާއިރާ ކުރިއެރުވުމަށްޓަކައި، އިންޑިއާގެ އެންވަޔަރަންމަންޓް މިނިސްޓްރީގެ ޚާއްޞަ ކޮމިޓީއަކުން ވަނީ އެ އަތޮޅުގެ ހަ ރަށެއްގައި "ވޯޓަރ އެއިރޮޑްރޯމް" ނުވަތަ މޫދު ބަނދަރުތައް ހެދުމުގެ ތިމާވެށީގެ ހުއްދަ ދިނުމަށް ލަފާދީފައެވެ.

މި މަޝްރޫޢުގެ ދަށުން ކޮޗިން އާއި ލަކްޝަދީޕުގެ ހަ ރަށެއް ކަމަށްވާ ކަވަރައްޓީ، ކަލްޕޭނީ، ކިލްޓާން، ކަޑްމަތު، މިނިކޯއި އަދި އަގައްޓީ ސީޕްލޭން މެދުވެރިކޮށް ގުޅާލެވޭނެއެވެ. މީގެ ސަބަބުން، އިންޑިއާގެ އެންމެ އެކަހެރި އަދި އެންމެ ހިތްގައިމު އެއް މަންޒިލަށް ފަތުރުވެރިން ދަތުރުކުރާ ގޮތަށް ބޮޑު ބަދަލެއް އަންނާނެއެވެ.

ލަކްޝަދީޕުގެ ރީތި ފަޅުތަކާއި މުރަކައިގެ ރަށްތަކަށް ދިއުމަކީ މީގެ ކުރިން ފަސޭހަ ކަމެއް ނޫނެވެ. ފަތުރުވެރިން ބަރޯސާވާން ޖެހެނީ އަގައްޓީއަށް ކުރާ މަދު ފްލައިޓްތަކަށާއި، ކޮޗިންއިން ކުރާ ދިގު ކަނޑު ދަތުރުތަކަށެވެ. ނަމަވެސް، ސީޕްލޭންގެ ހިދުމަތާއެކު މި ދަތިތަކަމަށް ދާއިމީ ހައްލެއް ލިބޭނެ ކަމަށް ސަރުކާރުން ގަބޫލުކުރެއެވެ.

މަޝްރޫޢަކީ ރާއްޖޭގެ ފަތުރުވެރިކަމުގެ ކާމިޔާބު ނަމޫނާއަށް ބަލައިގެން ފަރުމާކޮށްފައިވާ މަޝްރޫޢެކެވެ. ރާއްޖޭގައި ސީޕްލޭންގެ ހިދުމަތަކީ ލަގްޒަރީ ފަތުރުވެރިކަމުގެ ރަމްޒެކެވެ. ހުރިހާ ހުއްދަތަކެއް ލިބި، މަސައްކަތް ނިމުމުން، ލަކްޝަދީޕަށް ޒިޔާރަތްކުރާ ފަތުރުވެރިންނަށްވެސް އާދައިގެ އެއާޕޯޓްތަކަށް ބަރޯސާވުމުގެ ބަދަލުގައި، ސީދާ ރަށްރަށުގެ ފަޅުތަކަށް ސީޕްލޭންގައި ގޮސް ފޭބުމުގެ ފުރުސަތު ލިބިގެންދާނެއެވެ.

ލަކްޝަދީޕުގެ ފަތުރުވެރިކަމަށް ބޮޑު ސަމާލުކަމެއް ލިބުނީ، 2024 ވަނަ އަހަރުގެ ޖަނަވަރީ މަހު އިންޑިއާގެ ބޮޑުވަޒީރު ނަރެންދުރަ މޯދީ އެ ސަރަޙައްދަށް ކުރެއްވި ޒިޔާރަތަށް ފަހުއެވެ. ބޮޑުވަޒީރު މޯދީ އާންމުކުރެއްވި ފޮޓޯތަކާއި ވީޑިއޯތަކުގެ ސަބަބުން، ލަކްޝަދީޕަކީ ދުނިޔޭގެ ފެންވަރުގެ ފަތުރުވެރި މަންޒިލަކަށް ހެދުމުގެ ފުރުސަތު އޮތްކަން ހާމަވެގެންދިޔައެވެ.

މި މަސައްކަތުގެ އަމަލީ ތަޖުރިބާތައް މިހާރު ވަނީ ފެށިފައެވެ. އެގޮތުން، މިއަހަރުގެ މެއި މަހުގެ 13 ވަނަ ދުވަހު ކޮޗިން އާއި ލަކްޝަދީޕާ ދެމެދު ފުރަތަމަ ފަހަރަށް ސީޕްލޭންގެ ޓެސްޓް ދަތުރެއް ވަނީ ކާމިޔާބުކަމާއެކު ކޮށްފައެވެ. "ޑީ.އެޗް.ސީ.6-400 ޓްވިން އޮޓާ" މަރުކާގެ މި ބޯޓު ފުރަތަމަ ޖައްސާފައިވަނީ އަގައްޓީއަށެވެ. އޭގެ ފަހުން ކަވަރައްޓީގެ ފަޅުތެރެއަށް ވަރަށް އޮމާންކަމާއެކު ބޯޓު ޖެއްސުމާއެކު، މިއީ ލަކްޝަދީޕުގެ ތާރީޚުގައި މޫދަށް ސީޕްލޭން ޖެއްސި ފުރަތަމަ ފަހަރު ކަމުގައި ވެގެންދިޔައެވެ.

ކަމާބެހޭ ފަރާތްތަކުން މި ޓެސްޓް ދަތުރު ސިފަކޮށްފައިވަނީ އެ އަތޮޅުގެ ދަތުރުފަތުރުގެ ތާރީހުގައި ހާސިލުކުރެވުނު މުހިންމު ލަނޑުދަނޑިއެއްގެ ގޮތުގައެވެ.

މަޝްރޫޢުގެ ދަށުން ގާއިމުކުރާ "ވޯޓަރ އެއިރޮޑްރޯމް" ތަކަކީ އާދައިގެ ބޮޑެތި އެއާޕޯޓްތަކާ ތަފާތު ތަންތަނެވެ. މީގެ ތެރޭގައި ހިމެނެނީ ފަސިންޖަރުން މަޑުކޮށްލައިގެން ތިބޭނެ ކުދި ޓާމިނަލްތަކާއި، ފެންމަތީގައި އޮންނަ ހިނގާ މަގުތަކުގެ އިތުރުން ސީޕްލޭން ކައިރިކުރާނެ ހާއްސަ ބަނދަރުތަކެވެ.

ލަކްޝަދީޕް ހަ ރަށުގެ ތެރެއިން އެންމެ ގިނަ ފަސިންޖަރުން ދަތުރުކުރާނެ ކަމަށް ބެލެވެނީ ކަވަރައްޓީއަށެވެ. ހިސާބުތަކުން ދައްކާގޮތުގައި އަހަރަކު 16,000 އަށްވުރެ ގިނަ ފަތުރުވެރިން އެ ރަށަށް ދަތުރުކުރާނެއެވެ. މީގެ އިތުރުން އަގައްޓީ، ކަލްޕޭނީ އަދި ކިލްޓާން، މިއިން ކޮންމެ ރަށަކަށް އަހަރަކު ގާތްގަނޑަކަށް 8,000 ފަތުރުވެރިން ޒިޔާރަތްކުރާނެ ކަމަށް ލަފާކުރެވެއެވެ. މި ހިދުމަތުގެ ސަބަބުން ރަށްރަށުގެ ދެމެދުގައި ކުރާ ދަތުރުތަކުގެ ވަގުތު ވަރަށް ބޮޑަށް ކުޑަވެ، މިހާރު ދިއުމަށް ދަތި ރަށްރަށަށް ފަސޭހައިން ދެވޭނެ މަގު ތަނަވަސްވެގެންދާނެއެވެ.

ރޭވިފައިވާ ގޮތަށް މި މަޝްރޫޢު ކުރިއަށް ހިނގައްޖެނަމަ، މިއީ ލަކްޝަދީޕުގެ ފަތުރުވެރިކަމަށް އަންނާނެ އެންމެ ބޮޑު ބަދަލު ކަމުގައި ވެގެންދާނެއެވެ.