މެޑެއްޔެއް ޖަހަން ސިނާއަތެއް ފުނޑާނުލާ: ޝާހިދު

ބޭރު ފައިސާ އާ ބެހޭ ގަވާއިދާއި މަނީޗޭންޖިންގ ވިޔަފާރި އާއި ބެހޭ ގަވާއިދަށް ބަދަލު ގެނައުމުގައި ކަމާއި ގުޅުން ހުރި ފަރާތްތަކާއި މަޝްވަރާ ނުކުރުމުގެ ކަންބޮޑުވުން އެމްޑީޕީގެ ރައީސް އޮނަރަބަލް އަބްދުއްލާ ޝާހިދު ފާޅުކުރައްވައިފިއެވެ. ގުޅުންހުރި ފަރާތްތަކާ މަޝްވަރާ ނުކޮށް ސަރުކާރުން ކަންކަން ކުރަން އުޅުމުން އެންމެ ބޮޑު ސިނާއަތަށް ބޮޑެތި ގެއްލުންވާ މަގަށް ކަންކަން ދާތަން ފެންނަކަމަށް ޝާހިދު ވިދާޅުވެއެވެ.

"ސިޔާސީ ގޮތުން ވަގުތީ މެޑެއްޔެއް ޖަހާލަން ސިނާޢަތެއް ފުނޑާލުމަކީ އަދި ރައްޔިތުންގެ ފަޅިއަށް އެރުނީއެއްނޫން" ކަމަށް ޝާހިދު ވިދާޅުވިއެވެ. އިގުތިސާދުގެ މައިބަދަ އަކީ ކޮންމެ ގައުމެއްގައި ވެސް ރައްޔިތުންގެ ތެރެއިން އުފެދިގެން އަންނަ ވިޔަފާރިތައް ކަމަށާއި ސަރުކާރު ތަކުން ވިޔަފާރި އާއި ގުޅުންހުރި ސިޔާސަތުތަކަށް ބޮޑެތި ބަދަލުތަކެއް ގެންނަންވާނީ ކުދި އަދި މެދުފަންތީގެ ވިޔަފާރިތަކާއި ބޮޑެތި ވިޔަފާރިތަކަށް ގެއްލުން ނުވާނެގޮތަށް ކަމަށް ޝާހިދު ވިދާޅުވެއެވެ.

"މަޝްވަރާ އިސްކުރުމަށް" ސަރުކާރަށް މީގެކުރީންވެސް ޝާހިދުވަނީ ގޮވާލައްވާފައެވެ. ފަތުރުވެރިކަމުގެ ސިނާއަތާ މަޝްވަރާކޮށް ގޮތް ނިންމުމަކީ އެންމެ ރަނގަޅުގޮތް ކަމަށް ޝާހިދު ވިދާޅުވެއެވެ.

ދިވެހިރާއްޖެ އަށް ޒިޔާރަތްކުރާ ޓޫރިސްޓުންގެ ތެރެއިން، ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓްހައުސް ތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ މަގުން ބޭންކަށް ޑޮލަރު މާރުކުރަން ލާޒިމުކޮށް ބޭރު ފައިސާގެ ގަވާއިދަށް ވަނީ ކުއްލި ބޮޑު ބަދަލެއް ސަރުކާރުން ގެނެސްފައެވެ. އެމްއެމްއޭގެ އެ ގަވައިދަކީ ތަންފީޒު ކުރެވޭނެ ގަވައިދެއް ނޫން ކަމަށް ފަތުރުވެރިކަމުގެ ދާއިރާގެ އިސް ފަރާތްތަކުން ގެންދަނީ ބުނަމުންނެވެ.