އެމެރިކާއިން އީރާނު ހަނގުރާމައަށް 37.5 ބިލިއަން ޑޮލަރު ހަރަދުކޮށްފި

އެމެރިކާއިން އީރާނާ ދެކޮޅަށް ކުރަމުންދާ ހަނގުރާމައަށް މިހާތަނަށް 37.5 ބިލިއަން ޑޮލަރު ހަރަދުވެފައިވާ ކަމަށް ޑިފެންސް ސެކްރެޓަރީ ޕީޓް ހެގްސެތު އަންގާރަ ދުވަހު ވިދާޅުވެއްޖެއެވެ. ހެގްސެތު މިހެން ވިދާޅުވީ، ސިފައިންނަށް ބޭނުންވާ ފައިސާގެ އިތުރުން ދަނޑުވެރިންނަށް އެހީތެރިވުމަށާއި ވޯޓުލުމުގެ ގާނޫނަށް ގެންނަން ބޭނުންވާ ބަދަލުތަކަށް ހަރަދުކުރުމަށް ރިޕަބްލިކަން ޕާޓީން ހުށަހަޅާފައިވާ 95 ބިލިއަން ޑޮލަރުގެ ބަޖެޓާ ގުޅޭގޮތުން ސެނެޓުގައި ކުރިއަށްދިޔަ އަޑުއެހުމެއްގައެވެ.

ސެނެޓް އެޕްރޮޕްރިއޭޝަންސް ކޮމިޓީގައި ވާހަކަ ދައްކަވަމުން ހެގްސެތު ވަނީ ކުރިން އަންދާޒާކުރި ވަރަށްވުރެ ބޮޑު އަދަދެއް ހަނގުރާމައަށް ހަރަދުވާނެ ކަމަށް ވިދާޅުވެފައެވެ. މި އަޑުއެހުން ކުރިއަށްދިޔަ ވަގުތު ނުރުހުން ފާޅުކޮށް އަޑުއުފިލި މީހުން އެތައް ފަހަރަކު ވަނީ އޭނާގެ ވާހަކަ މެދުކަނޑުވާލާފައެވެ. ސެނެތްގައި ހަމަނުޖެހުންތައް ހިނގާފައި މިވަނީ، ޖުލައި މަހުގެ ކުރީކޮޅުން ފެށިގެން ކުރިއަށްދާ ހަނގުރާމައިގައި އެމެރިކާގެ އިތުރު ތިން ސިފައިން މަރުވެ، މަރުވި މީހުންގެ އަދަދު 17 އަށް އަރައި، 100 އަށްވުރެ ގިނަ މީހުން ޒަހަމްވެފައިވާ ކަމަށް ޕެންޓަގަންއިން ހާމަކޮށްފައި ވަނިކޮށެވެ.

ހެގްސެތު ވިދާޅުވި ގޮތުގައި ހަނގުރާމައަށް ބޭނުންވާ މި އިތުރު ފައިސާއަކީ "މުހިންމު އަދި ކޮންމެހެން ބޭނުންތެރި" އެހީއެކެވެ. އަދި ރައީސް ޑޮނަލްޑް ޓްރަމްޕް ހުށަހަޅުއްވާފައިވާ 1.5 ޓްރިލިއަން ޑޮލަރުގެ ދިފާއީ ބަޖެޓަކީ އަސްކަރިއްޔާއަށް ކުރެވޭ ތާރީހީ އިންވެސްޓްމަންޓެއްގެ ގޮތުގައި އޭނާ ސިފަކުރެއްވިއެވެ. "މި ފައިސާ ނުލިބިއްޖެނަމަ، އަޅުގަނޑުމެންނަށް އިއާދަނުކުރެވޭނެ ފަދަ ބޮޑެތި ދަތިތަކަކާ ކުރިމަތިލާންޖެހޭނެ،" އޭނާ ވިދާޅުވިއެވެ.

ނަމަވެސް، ކޮމިޓީގައި ހިމެނޭ ޑިމޮކްރެޓިކް ޕާޓީގެ އިސް މެންބަރު ސެނެޓަރ ފެޓީ މަރީ ވަނީ މިއީ "ކޮޅެއް ނެތް ހަނގުރާމައެއްގެ" ފެށުން ކަމަށް ވިދާޅުވެ އިންޒާރު ދެއްވާފައެވެ. އޭނާ ވިދާޅުވި ގޮތުގައި ހަނގުރާމަ މިހާރު ވަނީ ކޮންޓްރޯލުން ނެއްޓިފައެވެ. އަދި ހަނގުރާމަ ވަރަށް އަވަހަށް ނިމޭނެ ކަމަށް ޓްރަމްޕް 40 އަށްވުރެ ގިނަ ފަހަރު ވިދާޅުވެފައިވާއިރު، އަނެއްކާވެސް އިތުރު 70 ބިލިއަން ޑޮލަރަށް އެދިވަޑައިގަތުމަކީ ބަލައިގަނެވޭނެ ކަމެއް ނޫން ކަމަށް އޭނާ ފާހަގަކުރެއްވިއެވެ.

މި އަޑުއެހުމުގައި ޖޮއިންޓް ޗީފްސް އޮފް ސްޓާފްގެ ޗެއާމަން ޖެނެރަލް ޑެން ކޭން އާއި އެގްރިކަލްޗަރ ސެކްރެޓަރީ ބްރޫކް ރޮލިންސް ވެސް ބައިވެރިވެ ވަޑައިގެންނެވިއެވެ.

ރިޕަބްލިކަން ބަޖެޓުގެ ބޮޑުބަޔަކީ ހަނގުރާމައިގެ ހަރަދު

ރިޕަބްލިކަން ޕާޓީން ހުށަހަޅާފައިވާ ބަޖެޓުގެ ބޮޑު ބަޔަކީ ހަނގުރާމައަށް ކަނޑައަޅާފައިވާ ފައިސާއެވެ. މީގެ އިތުރުން ޓްރަމްޕްގެ ވިޔަފާރީގެ ސިޔާސަތުތަކުގެ ސަބަބުން ގެއްލުންވަމުންދާ ދަނޑުވެރިންނަށް އެހީވުމަށް 10 ބިލިއަން ޑޮލަރާއި، ވޯޓުލުމުގެ ގާނޫނަށް ބަދަލު ގެނައުމަށް 10 ބިލިއަން ޑޮލަރު ހިމަނާފައިވެއެވެ.

އޭޕީ-ނޯކް އިން ކުރި ސާވޭއަކުން ދައްކާ ގޮތުގައި ގިނަ އެމެރިކާ ރައްޔިތުން ޓްރަމްޕް އީރާނާ މެދު ގެންގުޅުއްވާ ސިޔާސަތަށް ތާއީދެއް ނުކުރެއެވެ. ތެލުގެ އަގު އިންތިހާއަށް އުފުލިފައިވާއިރު، އެމެރިކާގެ އަސްކަރީ ހަކަތަ ހުސްވަމުންދާ ކަމުގެ ކަންބޮޑުވުން ވަނީ އިތުރުވެފައެވެ. މީގެ އިތުރުން، ދިގުދެމިގެންދާ ހަނގުރާމަތަކުގެ ތެރެއަށް އެމެރިކާ ނުވައްދާނެ ކަމަށް ޓްރަމްޕް ވެވަޑައިގެންނެވި ވައުދާ ހިލާފުވެވަޑައިގަންނަވާ ކަމަށް ގިނަ ބަޔަކު ދެކެއެވެ.

އެހެންނަމަވެސް، ހަނގުރާމައިން ފަހަތަށް ޖެހުމުގެ އެއްވެސް ނިޝާނެއް ޓްރަމްޕް ނުދައްކަވާއިރު، ރިޕަބްލިކަން މެންބަރުންވެސް އޭނާގެ ސިޔާސަތުތަކާ ސުވާލު އުފެއްދުމަށް ޖެހިލުންވެއެވެ.

ހެގްސެތަށް ކުރިމަތިވި ފާޑުކިޔުންތައް

ހަނގުރާމައިގެ އިތުރުން ހެގްސެތުގެ ލީޑަޝިޕާ މެދު ވެސް ސެނެޓަރުން ވަނީ ސުވާލު އުފައްދާފައެވެ. ކޮމިޓީގެ މުގައްރިރު ސޫޒަން ކޮލިންސް ވިދާޅުވީ، އަސްކަރިއްޔާގެ އިސް މަގާމުތަކަށް އަންހެނުންނާއި މައިނޯރިޓީ ގްރޫޕްތަކުގެ މީހުން އައްޔަންކުރުމަށް ހުރަސްއަޅަމުންދާތީ އެކަމާ ކަންބޮޑުވާ ކަމަށެވެ.

ސެނެޓުގެ ޑިމޮކްރެޓިކް ލީޑަރު ޗަކް ޝޫމަރ ވިދާޅުވީ، ހަނގުރާމައިގައި ޒަހަމްވާ ސިފައިންގެ މައުލޫމާތު ހާމަކުރުމުގެ ބަދަލުގައި، ހެގްސެތު އިސްކަންދެއްވަނީ ސިފައިންގެ "ޓެސްޓޮސްޓިރޯން" ލެވެލް ޗެކްކުރުމުގެ ޕްލޭންތައް އިޝްތިހާރު ކުރުމަށް ކަމަށެވެ. ހަނގުރާމަ ފެށުނީއްސުރެ މިހާތަނަށް ގާތްގަނޑަކަށް 450 ސިފައިން ވަނީ ޒަހަމްވެފައެވެ.

އަދި ހަނގުރާމައިގެ ކުރީކޮޅު އީރާނުގެ ޕްރައިމަރީ ސްކޫލަކަށް ދިން ނުރައްކާތެރި ހަމަލާގެ ރިޕޯޓު ހާމަކުރުމަށް ވެސް ސެނެޓަރުން ވަނީ ޑިފެންސް ސެކްރެޓަރީއަށް މަޖުބޫރުކޮށްފައެވެ.

މި ހަފްތާގެ ތެރޭގައި ސެނެޓުން ހަނގުރާމަ ހުއްޓުވުމާ ގުޅޭ އިތުރު ގަރާރަކަށް ވޯޓަށް އެހުމަށް ވަނީ ހަމަޖެހިފައެވެ. ނަމަވެސް މީގެ ކުރިން ކުރި އެއްވެސް މަސައްކަތެއް ކާމިޔާބުވާ ގޮތް ވަނީ ނުވެފައެވެ.

ބަޖެޓު ފާސްކުރުމުގެ މަސައްކަތް

ރިޕަބްލިކަން ޕާޓީން މަސައްކަތް ކުރަމުންދަނީ ޑިމޮކްރެޓުންގެ ދެކޮޅުހެދުންތަކާ އެކުވެސް، ހާއްސަ އިޖުރާއަތްތަކެއްގެ ދަށުން މި ބަޖެޓު ފާސްކުރުމަށެވެ. މި ހަފްތާގެ ތެރޭގައި ހައުސް އޮފް ރެޕްރެޒެންޓެޓިވްސްގައި މި ބަޖެޓަށް ވޯޓަށް އެހުމަށް ވަނީ ހަމަޖެހިފައެވެ. ނަމަވެސް ރިޕަބްލިކަން ޕާޓީގެ ބައެއް މެންބަރުން ވެސް ދަނީ ބަޖެޓުގެ ސަބަބުން ދައުލަތުގެ ދަރަނި ބޮޑުވެގެންދާނެތީ އެކަމާ ކަންބޮޑުވުން ފާޅުކުރަމުންނެވެ.