އަރަބި ކަނޑަށް ވެއްޓުނު ކާގޯ ބޯޓު ހޯދަން ޕާކިސްތާނުން ފަށައިފި

ކަރާޗީ: ފަސް މީހުންނާއެކު ދަތުރުކުރި ބޯއިންގް މަރުކާގެ ކާގޯ ބޯޓެއް ޕާކިސްތާނުގެ ދެކުނު އައްސޭރިފަށުގެ ސަރަހައްދުން ގެއްލުމާ ގުޅިގެން، އެ ބޯޓު ހޯދުމުގެ ބޮޑު އޮޕަރޭޝަނެއް ބުދަ ދުވަހު ފަށައިފިއެވެ. ޕާކިސްތާނުގެ ބޮޑުވަޒީރު ޝެހެބާޒް ޝަރީފް ވިދާޅުވި ގޮތުގައި މި ބޯޓު ވެއްޓިފައިވަނީ އަރަބި ކަނޑަށެވެ.

ޕާކިސްތާނުގެ އެއާޕޯޓްސް އޮތޯރިޓީން މައުލޫމާތު ދޭ ގޮތުގައި، ޔުނައިޓެޑް އެރަބް އެމިރޭޓްސްގެ ޝާރިޖާ އިން ފުރައިގެން ކަރާޗީއަށް ދަތުރުކުރި އަމިއްލަ ކުންފުންޏެއްގެ މި ބޯޓު ރޭޑާ އިން ގެއްލުމުގެ ކުރިން، ބޯޓުގެ ނެވިގޭޝަން ސިސްޓަމަށް މައްސަލައެއް ދިމާވެފައިވާ ކަމަށް ވަނީ ރިޕޯޓްކޮށްފައެވެ. އަންގާރަ ދުވަހުގެ ރޭ އިރުއޮއްސުނު ވަގުތު މި ބޯޓު ވަރަށް ބާރަށް ތިރިއަށް ފައިބަމުން ދިޔަކަން ރޭޑާ އިން ދެއްކި ކަމަށް ވެސް އެ އިދާރާއިން ބުނެފައިވެއެވެ.

ހިތާމަވެރި މި ހާދިސާއާ ގުޅިގެން ބޮޑުވަޒީރު ޝަރީފް ނެރުއްވި ބަޔާނެއްގައި، ބޯޓުން ދަތުރުކުރި ފަސް ފަޅުވެރިންގެ އާއިލާތަކަށް ތައުޒިޔާ ފޮނުއްވައި، މި ދަނޑިވަޅުގައި އާއިލާތަކަށް ކެތްތެރިކަން ދެއްވުން އެދިވަޑައިގެންފައިވެއެވެ. އަދި ސިވިލް އޭވިއޭޝަނާއި، ކަނޑުގެ ސިފައިންނާއި ވައިގެ ސިފައިން ގުޅިގެން، ލިބެން ހުރި ހުރިހާ ވަސީލަތްތަކެއް ބޭނުންކޮށްގެން ބޯޓު ހޯދުމުގެ މަސައްކަތް އިތުރަށް ވަރުގަދަކުރުމަށް ވަނީ އިރުޝާދު ދެއްވާފައެވެ.

ގެއްލުނު ބޯޓާއި އޭގެ ފަޅުވެރިން ހޯދުމުގެ މަސައްކަތް މިހާރުވެސް މެދުކެނޑުމެއް ނެތި ދަނީ ކުރިއަށެވެ.