އެއްތަކެއްގައި ކާރަކުންޖެހި 3 މީހުން މަރުވެއްޖެ

ޔުގެންޑާގެ ނޭޝަނަލް ޕާކެއްގައި ދުއްވާފައި ދިޔަ އުޅަނދެއް އެއްތަކެއްގައި ޖެހި ހިނގި ނުރައްކާތެރި އެކްސިޑެންޓެއްގައި މަދުވެގެން ތިން މީހުން މަރުވެފައިވާ ކަމަށް އޮފިޝަލުން ހާމަކޮށްފިއެވެ.

އެ ގައުމުގެ ހުޅަނގު އުތުރުގައި އޮންނަ މާޗިސަން ފޯލްސް ނޭޝަނަލް ޕާކުގައި އާދީއްތަ ދުވަހުގެ ހަވީރު ހިނގި މި ހާދިސާގައި އިތުރު ހަތަރު މީހަކަށް އެކިވަރުގެ އަނިޔާތައް ލިބިފައިވާ ކަމަށް ފުލުހުން ބުނެފައިވެއެވެ.

ފުލުހުން މައުލޫމާތު ދޭ ގޮތުގައި، މި އުޅަނދުގައި ދަތުރުކުރީ ޔުގެންޑާ ރެވެނިއު އޮތޯރިޓީ (ޔޫ.އާރު.އޭ) ގެ ހަތް އޮފިޝަލުންނެވެ.

ޔުގެންޑާއަކީ މަގުމަތީގެ އެކްސިޑެންޓްތައް އާންމު ގައުމެކެވެ. މީގެ އިތުރުން، އިންސާނުން ދިރިއުޅޭ ސަރަހައްދުތައް ފުޅާވެ، ހިމާޔަތްކޮށްފައިވާ ޖަންގަލިތަކާ ކައިރިވަމުންދާތީ، ވަލު ޖަނަވާރުންނާއި އިންސާނުންނާ ދެމެދު ހިނގާ މިފަދަ ހާދިސާތައް ވެސް ދަނީ އިތުރުވަމުންނެވެ.

ޔުގެންޑާ ޕޮލިސް ފޯސްއިން ސޯޝަލް މީޑިއާ ޕްލެޓްފޯމް 'އެކްސް' ގައި ބުނެފައިވާ ގޮތުގައި، މި އެކްސިޑެންޓް ހިނގާފައިވަނީ އަރުއާ ސިޓީން ފުރައިގެން ވެރިރަށް ކަމްޕާލާއަށް އެ އުޅަނދު ދަތުރުކުރަނިކޮށެވެ.

އަނިޔާވި މީހުންނަށް ފުރަތަމަ ފަރުވާ ދީފައިވަނީ އެ ސަރަހައްދުގެ ހޮސްޕިޓަލެއްގައެވެ. ނަމަވެސް، ފަހުން އިތުރު ފަރުވާއަށް އެމީހުން ވަނީ ކަމްޕާލާއަށް ބަދަލުކުރެވިފައެވެ. މި ހާދިސާގައި އެތަށް ލިބުނު ގެއްލުމުގެ އެއްވެސް ތަފްސީލެއް އޮފިޝަލުން ހާމައެއް ނުކުރެއެވެ.

ޔުގެންޑާ ވައިލްޑްލައިފް އޮތޯރިޓީން ވަނީ މަގު ހުރަސްކުރާ ޖަނަވާރުތަކަށް ސަމާލުވުމަށް ޑްރައިވަރުންނަށް އިލްތިމާސްކޮށްފައެވެ.

އެ އިދާރާއިން ބުނެފައިވަނީ، "ހިމާޔަތްކޮށްފައިވާ ސަރަހައްދުތަކުގެ ތެރެއިން ދަތުރުކުރާ އުޅަނދުތައް ދުއްވާއިރު، ވަލު ޖަނަވާރުތައް ގިނަގިނައިން މަގު ހުރަސްކުރާނެތީ، ވަރަށް ބޮޑަށް ސަމާލުވެގެން ދުއްވުމަށް ހަރުކަށިކޮށް އިރުޝާދު ދެން،" ކަމަށެވެ.