ކުއްލި ފެންބޮޑުވުމެއްގައި ބަޔަކު މަރުވެ، ގިނަ ބަޔަކު ގެއްލިއްޖެ

މިދިޔަ ހަފުތާ ބަންދުގައި އެމެރިކާގެ ގްރޭންޑް ކެންޔަންގެ ބައެއް⁹⁹41 ސަރަހައްދުތަކަށް ކުރިމަތިވި ބާރުގަދަ ކުއްލި ފެންބޮޑުވުމެއްގައި ދެ މީހަކު މަރުވެ، 15 ވަރަކަށް މީހުން ގެއްލިފައިވާ ކަމަށް އެ ސަރަހައްދުގެ އޮފިޝަލުން ހާމަކޮށްފިއެވެ.

މި ފެންބޮޑުވުން ކުރިމަތިވީ ހޮނިހިރު ދުވަހު ބޯކޮށް ވާރޭވެހި، ފެންގަނޑު ކުއްލިއަކަށް ބޮޑުވުމުގެ ސަބަބުން ބްރައިޓް އެންޖެލް ކެންޔަން އަދި ފެންޓަމް ރެންޗް ސަރަހައްދަށެވެ. ފެންބޮޑުވި ސަރަހައްދުތަކުން ބޮޑެތި ހިލައާއި، މަޑާއި އަދި ކުނިބުނި ދެމިގެން ދިޔައިރު، އެ ސަރަހައްދުގައި ތިބި 60 އަށްވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުކޮށްފައެވެ.

މި ހާދިސާގައި މަރުވި މީހުންގެ ތެރޭގައި ހިމެނެނީ އުމުރުން 46 އަހަރުގެ ފިރިހެނެކެވެ. އޭނާގެ ހަށިގަނޑު ފެނިފައިވަނީ ކޮލޮރާޑޯ ކޯރުގެ ކްރިސްޓަލް ރެޕިޑްސް ސަރަހައްދުންނެވެ. މީގެ އިތުރުން، ގެއްލުނު މީހުން ހޯދުމުގެ މަސައްކަތް ކުރަމުންދަނިކޮށް ހޯމަ ދުވަހު ވަނީ ދެވަނަ މީހެއްގެ ހަށިގަނޑު ފެނިފައެވެ.

މި ފެންބޮޑުވުމުގެ ސަބަބުން އެ ސަރަހައްދުގެ ފާލަންތަކަށާއި، ހިނގާ މަގުތަކަށާއި އަދި އެހެނިހެން ވަސީލަތްތަކަށް ބޮޑެތި ގެއްލުންތަކެއް ވަނީ ލިބިފައެވެ. އެގޮތުން ބްރައިޓް އެންޖެލް ކްރީކް ހުރަސްކޮށް އަޅާފައިވާ ބައެއް ފާލަންތައް ހަލާކުވެފައިވާއިރު، އެ ސަރަހައްދަށް ފެން ފޯރުކޮށްދޭ މައި ހޮޅިއަށް ލިބުނު ގެއްލުންތަކާ ގުޅިގެން ކަމާބެހޭ ފަރާތްތަކުން ވަނީ ފެން ބޭނުންކުރުން ކޮންޓްރޯލްކޮށް، އެ ސަރަހައްދުގައި ރޭގަނޑު މަޑުކުރުން މަނާކޮށްފައެވެ.

ސަލާމަތީ ފަރާތްތަކުން މިހާރުވެސް ދަނީ ފެންބޮޑުވި ވަގުތު އެ ސަރަހައްދުގައި އުޅުނު ފަތުރުވެރިންނާއި ހައިކިންގްއަށް ގޮސް އުޅުނު މީހުން ހޯދުމުގެ މަސައްކަތް ކުރަމުންނެވެ. އަދި އިތުރަށް ވާރޭވެހި، ގުގުރުމާއެކު ކުއްލި ފެންބޮޑުވުމެއް ކުރިމަތިވެދާނެތީ، ބަންދުކޮށްފައިވާ ސަރަހައްދުތަކަށް ނުދިއުމަށް އޮފިޝަލުން ވަނީ އިލްތިމާސްކޮށްފައެވެ.

މި ހާދިސާއަކީ އެރިޒޯނާގެ ހޫނު މޫސުމުގެ ވިއްސާރަ ދުވަސްވަރު، ގްރޭންޑް ކެންޔަންގެ މޫސުން ކުއްލިއަކަށް ބަދަލުވެދާނެކަން ހާމަކޮށްދޭ ހިތާމަވެރި ހާދިސާއެކެވެ.