ރަސްމާލެ ޑީލާއިގުޅިގެން އުފެދޭ މި ސުވާލުތަކަށް ސަރުކާރުގެ ޖަވާބަކީ ކޮބާ!
އަންނަ ޖީލުތަކަށް ދަރަންޏާއި ގާނޫނީ މައްސަލަތައް ވާރުތަކޮށްދީފައި ދިޔުން މަނާކުރާނީ ކިހިނެއް
ހަވާ
ރަސްމާލެ – އީގަލް ހިލްސް މަޝްރޫޢާއި ހުޅުމާލެ ފޭސް 2 ގައި 5000 ފްލެޓް އެޅުމާ ގުޅިގެން ސަރުކާރުން ޖަވާބުދޭންޖެހޭނެ ކަމަށް ގަބޫލުކުރާ ބައެއްސުވާލުތަކެއް އެބަހުއްޓެވެ. މި ސުވާލުތަކަކީ މަޝްރޫޢާ ދެކޮޅުހެދުމަށް ހުށަހަޅާ ސުވާލު ނުވަތަ ޝަކުވާ ތަކެއް ނޫނެވެ. ނަމަވެސް، ގައުމީ މަސްލަހަތާއި، ދައުލަތުގެ މާލީ މަސްއޫލިއްޔަތާއި، ދުސްތޫރީ ސިޔާދަތާއި، އަންނަން އޮތް ޖީލުތަކުގެ ހައްގުތައް ރައްކާތެރިކުރުމަށް ޖަވާބު ހޯދަން ބޭނުންވާ ސުވާލުތަކެވެ.
1. ދުސްތޫރާއި ޤާނޫނީ ރައްކައުތެރިކަން.
މިހާރު ހުރި ގާނޫނުތަކަކީ މި މަޝްރޫއަށް ފުދޭ ގާނޫނީ އޮނިގަނޑަކަށް ނުވާނަމަ، އެއްބަސްވުމުގެ ކޮމާޝަލް ޓާމްސް ކުރިން އެއްބަސްވީ ކޮން ޤާނޫނީ ބާރަކުންތޯ؟
މި މަޝްރޫޢަށް ވަކިން ހާއްސަ ކޮށް ގާނޫނެއް ހެދުމަށް މަޖުބޫރުވަނީ ކީއްވެތޯ؟
ދުސްތޫރުގެ 251 ވަނަ މާއްދާއާ މި މަޝްރޫއު އެއްގޮތްވާނެ ކަން ޔަޤީންކުރާނީ ކިހިނެއްތޯ؟
99 އަހަރުގެ ލީޒް މުއްދަތުގެ ތެރޭގައި ބިން ވިއްކާ، ހިބަކޮށް ނުވަތަ ވާރުތަވާ ކޮންމެ ފަހަރަކު އަލުން އާވެ 99 އަހަރު ފެށޭނެތޯ؟
އަންނަ ސަރުކާރަކުން މި ގާނޫނުތަކަށް ބަދަލު ގެނެސްފިނަމަ،ދެން ވާނީ ކިހިނެތްތޯ؟
އެއްބަސްވުމުގައި ހިމެނޭ ކަންކަން އާންމުކޮށް ހާމަކުރާނެތޯ؟
2. ބިމާއި ހިއްކުމުގެ ހަރަދު
އީގަލް ހިލްސްއަށް ދޭ 500 ހެކްޓަރުގެ މާކެޓް އަގަކީ ކިހާ މިންވަރެއްތޯ؟
މި ބިން ހިއްކުމަށް މިހާތަނަށް ކިހާ ފައިސާއެއް ހަރަދުވެފައިވޭތޯ؟
ބިންހިއްކި ކުންފުނިތަކަށް މިހާރުވެސް ދައްކަންޖެހޭ ފައިސާ އެބަ ހުރިތޯ؟
ބިންހިއްކުމުގެ އަގުގެ ބަދަލުގައި ކުންފުނިތަކަށް ބިމެއް ނުވަތަ ބިންތަކެއް ދޭން ވައުދުވެފައިވާނެތޯ އަދި އެ ބިންތައް ކޮބައިތޯ؟
މި ބިން އީގަލް ހިލްސްއަށް ދެނީ ހިލޭތޯ، ކުއްޔަށްތޯ، ނުވަތަ އެހެން މާލީ އެއްބަސްވުމަކުންތޯ؟
މިހާ ބޮޑު ބިމެއް ބޭރުގެ އިންވެސްޓަރަކަށް ދިނުމުގައި ބައިނަލްއަގުވާމީ ޓެންޑަރަށް ހުޅުވާނުލީ ކީއްވެތޯ؟
3. ހުޅުމާލެ ފޭސް 2 ގެ 5000 ފްލެޓް
5000 ފްލެޓް އީގަލް ހިލްސްއިން ހިލޭ އަޅައިދެނީތޯ، ނުވަތަ ފަހުން ސަރުކާރުން އެއަށް ފައިސާ ދައްކާނީތޯ؟
ފައިސާ ދައްކާނަމަ، ފްލެޓެއްގެ ފުރިހަމަ އަގަކީ ކިހާ ވަރެއްތޯ؟
ރަސްމާލެއިން ފައިސާ ނުލިބިއްޖެނަމަ، ފްލެޓްތަކުގެ ދަރަނި ދައްކާނީ ކާކުތޯ؟
ކޮމާޝަލް ސްޕައިން މަޝްރޫޢަށް ވީ ކިހިނެއްތޯ؟
އެ މަޝްރޫޢަށް ދިން އެޑްވާންސް ފައިސާ އަނބުރާ ލިބިފައިވޭތޯ؟
މޯލްޑިވްސް އިންޓަރނޭޝަނަލް ފައިނޭންޝަލް ސެންޓަރަށް ވީ ކިހިނެއްތޯ؟
އެއް ބިމުގައި ތިން ތަފާތު މަޝްރޫޢު އިއުލާނުކުރިއިރު، ކުރީގެ އެއްބަސްވުންތަކުގެ ގާނޫނީ ހާލަތަކީ ކޮބައިތޯ؟
4. 20 ބިލިއަން ޑޮލަރުގެ އިންވެސްޓްމަންޓް
20 ބިލިއަން ޑޮލަރަކީ އީގަލް ހިލްސްއިން އަމިއްލަ ފައިސާއިން ކުރާ އިންވެސްޓްމަންޓެއް ހެއްޔެވެ؟
މި 20 ބިލިއަން ޑޮލަރުގެ ކިހާ ވަރެއް ދިވެހި ބޭންކުތަކަށް ވަންނާނެތޯ؟
މި ފައިސާއިން ކިހާ ވަރެއް ރާއްޖޭގައި، ކިހާ ވަރެއް ބޭރަށް ދާނެތޯ؟
20 ބިލިއަން ޑޮލަރުމް އީގަލް ހިލްސްގެ އަމިއްލަ ކެޕިޓަލްއަކީ ކިހާ މިންވަރެއްތޯ؟
ޕްރޮޕަޓީ ވިއްކުމުން ލިބޭ ފައިސާއިން ދައުލަތަށް ލިބޭ ހިއްސާ އަކީ ކޮބާތޯ؟
މަޝްރޫއުގެ އިންކަމް، ޓެކްސް، ހަރަދު އަދި ދަރަނި އަނބުރާ ދެއްކުން ވަކިކޮށް، އަހަރަކުން ދައުލަތަށް ލިބޭ ސާފު ފައިދާ ކިހާ ވަރެއްތޯ؟
5. ބޭރުގެ ރައްޔިތުން، ރެސިޑެންސީ އަދި ދީނީ މައްސަލަތައް.
ރަސްމާލެއިން ގެއެއް ގަތުމުން ބޭރުގެ ރައްޔިތަކަށް ރެސިޑެންސީ ލިބޭނެތޯ؟
އެ ރެސިޑެންސީއަކީ ދާއިމީ ރެސިޑެންސީއެއްތޯ، ނުވަތަ ވަކި މުއްދަތަކަށް ދޭ ހުއްދައެއްތޯ؟
ތަފާތު ދީންތަކަށް ނިސްބަތްވާ މީހުން ރަސްމާލެއިގައި ދިރިއުޅޭވޭނެތޯ؟
އެ މީހުންގެ ދީނީ ޢަމަލުތަކާއި ދިވެހި ދުސްތޫރާއި ގާނޫނުތަކާ ދެމެދު ގުޅުން ދަމަހައްޓާނީ ކިހިނެއްތޯ؟
ބޭރުގެ ޕްރޮޕަޓީ ގަތް މީހަކު ފަހުން އެ ޕްރޮޕަޓީ އެހެން މީހަކަށް ވިއްކާއިރު އަލުން ސެކިއުރިޓީ ސްކްރީނިންގ ހަދާނެތޯ؟
ދީނީ ނުވަތަ ސިޔާސީ ހިޔާލުތަފާތުވުން އުފެދިއްޖެނަމަ، އެކަންކަން ޙައްލުކުރުމަށް އޮންނާނީ ނިޒާމެއް ތޯ؟
6. ޕޮލިސް، އިންޓެލިޖެންސް އަދި ގައުމީ ސަލާމަތް:
ޕްރައިވެޓް ރެސިޑެންސީ ޑިވޮލޮޕްމަންޓެއްގެ ހައިސިއްޔަތުން ނަމަ:-
ރަސްމާލެއިގެ ޕޮލިސިންގ (އަމަން ބެލެހެއްޓުން) ހިދުމަތް ދޭނީ ކޮންބައެއްތޯ؟
ޕޮލިސް ސްޓޭޝަން، އޮފީސް، ވެހިކަލް އަދި އެހެން ވަސީލަތްތައް ހޯދުމުގެ ހަރަދު ކުރާނީ ކޮންފަރާތަކުންތޯ؟
އަމްނަ ބަލަހައްޓާ މުވައްޒަފުންގެ މުސާރަ، ޓްރެއިނިންގ އަދި އޮޕަރޭޝަނަލް ހަރަދު އަދާކުރާނީ ކޮން ފަރާތަކުންތޯ؟
މަޝްރޫއުގެ ސަބަބުން އިތުރު އިންޓެލިޖެންސް އަދި ގައުމީ ސަލާމަތުގެ ހިދުމަތް ބޭނުންވެއްޖެނަމަ، އެ ހަރަދު އަދާކުރާނީ އަދި ހިދުމަތްދޭނީ ކޮން ފަރާތަކުންތޯ؟
އެމް.އެން.ޑީ.އެފްގެ އެހީ ބޭނުންވާ ހާލަތެއް އުފެދިއްޖެނަމަ، އެ ކަމުގެ ހަރަދު އުފުލާނީކޮން ފަރާތަކުންތޯ؟
ޕްރައިވެޓް ސެކިއުރިޓީ ކުންފުންޏަކަށް ދެވޭނެ ބާރު ތަކަކީ ކޮބާތޯ؟
ރަސްމާލެއިގެ ހުރިހާ ސަރަހައްދަކަށް ދިވެހި ޤާނޫނު އަސާސީ އާއި ޤާނޫނީ ބާރުން ޕޮލިހާއި ސަލާމަތުގެ އިދާރާތަކަށް ވަންނަން ލިބޭނެ މިންވަރަކީ ކޮބާތޯ؟
7. ކަސްޓަމްސް، އިމިގްރޭޝަން އަދި ކޯޓުތައް.
ރަސްމާލޭގައި ޕްރައިވެޓް މެރީނާ ނުވަތަ ބޭރުން ފަޅަށް ވަންނަ ތަންތަން ހުރިނަމަ، ކަސްޓަމްސް އަދި އިމިގްރޭޝަން ހިދުމަތް ދޭނީ ކޮންބައެއްތޯ؟
އެ އިދާރާތަކުގެ އިމާރާތާއި، ވަސީލަތާއި، މުވައްޒަފުންގެ ހަރަދު ދައްކާނީ ކޮންފަރާތްކުންތޯ؟
ރަސްމާލޭގައި އުފެދޭ ސިވިލް އަދި ކްރިމިނަލް މައްސަލަތައް ބަލާނީ ދިވެހި ކޯޓުތަކުންތޯ؟
ރަސްމާލޭގައި ކޯޓުތަކެއް ވާނަމަ، ގާޒީން އަދި ގާނޫނީ ހިދުމަތް ބޭނުންވާ ހާލަތްތަކުގައި، އެ ހަރަދު ކުރާނީ ކޮންފަރާތަކުންތޯ؟
ބޭރުގެ އާބާދީ އިތުރުވުމުން އުފެދޭ އިތުރު ހަރަދުތަކަށް މާލީ ޕްލޭނެއް ހެދިފައިވޭތޯ، އަދި އެ ހަރަދުތަކުގެ ޒިންމާ ނަގާނީ ކޮންފަރާތަކުންތޯ؟
8. މުނިސިޕަލް ހިދުމަތްތަކާއި ލޯކަލް ގަވަރނަންސް.
ރަސްމާލެ ބަދަލު ވާނީ ސިޓީއަކަށްތޯ، އަދި އެހެން ސިޓީއެއްގެ އިހުތިސާސްގައިވާތަނެއް ނަމަ ކޮން ސިޓީއެއްގެ ބެލެނިވެރިކަމެއްތޯ، އަދި މި ހިދުމަތްތަކަށް ހަރަދު ކުރާނެ ނިޒާމާއި ހަރަދު ކުރާނެ ފަރާތަކީ ކޮބާތޯ؟
ކުނި ނެގުން، މަގުތައް، ފެން، ނަރުދަމާ އަދި ފަޔަރ ސާވިސް ފަދަ ހިދުމަތްތައް ދޭނީ ކޮންފަރާތަކުންތޯ؟
އެ ހިދުމަތްތަކުގެ ހަރަދު ބަހައްޓާނީ އީގަލް ހިލްސްއިންތޯ، ޕްރޮޕަޓީތަކުގެ ވެރީންތޯ، ނުވަތަ ދައުލަތުގެ ބަޖެޓުންތޯ؟
ރަސްމާލޭގެ މާލީ ފައިދާއިން ކައުންސިލަށް ލިބޭ ބައެއް ވާނެތޯ؟
މަޝްރޫއު ފެއިލްވެއްޖެނަމަ އެ ހިދުމަތްތައް ދެމެހެއްޓުމުގެ މަސްއޫލިއްޔަތު އުފުލާނީ ކާކުތޯ؟
9. 20، 30 އަދި 99 އަހަރުގެ ފަހުން:-
20 އަހަރުގެ ފަހުން ރަސްމާލޭގެ އިދާރީ ބާރު އޮންނާނީ ކޮންފަރާތެއްގެ އަތުގައިތޯ؟
އީގަލް ހިލްސް ބަދަލުވެ، ވިއްކާލައި ނުވަތަ ބޭރުގެ އެހެން ކުންފުންޏަކަށް ދަރަނިވެއްޖެނަމަ، ބިމުގެ ހައްގުތަކަށް ވާނީ ހިކިނެތްތޯ؟
ދެން އުފެދޭ ސަރުކާރަކުން ނުވަތަ ސަރުކާރުތަކުން މަޝްރޫޢުގެ ޝަރުޠުތަކަށް ބަދަލު ގެނެސްފި ނަމަ، ބައިނަލްއަޤްވާމީ އާބިޓްރޭޝަންގައި ދައުލަތަށް މައްސަލައެއް ޖެއްސޭނެތޯ؟
99 އަހަރުގެ ލީޒް ނިމުމުން ބިން ދައުލަތަށް އަނބުރާ ލިބޭނީ ކޮން ޝަރުޠުތަކެއްގެ މަތިންތޯ، އަދި ދިވެހި ބިން ދިވެހީންގެ އަތްމައްޗަށް އެނބުރި ބަދަލުވާނީ ކޮން އަހަރަކުތޯ؟
އަންނަ ޖީލުތަކަށް ދަރަންޏާއި ގާނޫނީ މައްސަލަތައް ވާރުތަކޮށްދީފައި ދިޔުން މަނާކުރާނީ ކިހިނެއްތޯ؟
99 އަހަރާއި ހަމައަށް ދަައިރު ޔަހޫދީންނާއި އިސްލާމީ ވަންތަކަމަށް އެއްވެސް އަސަރެއް ނުކުރާނެ ކަމުގެ ގެރެންޓީއަކީ ކޮބާތޯ؟
99 އަހަރަށް ފަހު ރަސްމާލޭގެ ބިމުގެ މިލްކު ވެރިކަން ދިވެހީންގެ މައްޗަށް ދެމިގެންދާނެ ގޮތަށް އެޅިދާނެ ހުރަސްތައް ކަޑަތު ކުރުމަށް ރޭވި ޤާނޫނުތަކުން ހޯދާނެ ހައްލާއި ބައިނަލް އަގުވާމީ ކޯޓުތަކުގައި ދަފްރަތު ކުރުމުގެ ނިޒާމަކީ ކޮބާތޯ؟
99 އަހަރުގެ މުއްދަތުގެ ތެރޭގައި ޔަހޫދީންގެ ޝަހަރަކަށް އަދި ގައިރު ދީނުގެ ސަރަހައްދަކަށް ރަސްމާލެ ނުވާނެ ކަމުގެ ޔަގީން ކަމަކީ ކޮބާތޯ؟
