އެމްޑީޕީއަކީ ވަކިމީހަކަށް ފަހާފައިވާ ކޯޓެއްނޫން!

ދިވެހި ރާއްޖޭގެ ސިޔާސީ މުސްތަގުބަލް ކަނޑައަޅާ ޕާޓީއަކީ އެމްޑީޕީ ކަމަށް އޮނަރަބަލް އަލްއުސްތާޒު ފަަައްޔާޒު އިސްމާއީލް ވިދާޅުވި ވިދާޅުވުމަކީ ވަރަށް ބޮޑުތެދެކެވެ. އެމްޑީޕީގެ ޗެއަރޕާސަން އެހެން ވިދާޅުވީ އެމްޑީޕީ ދޫކުރައްވާ ވަޑައިގެންނެވި އެޕާޓީގެ އިސްބޭފުޅުން ތަކެއް އެނބުރި އެޕާޓީއަށް ގުޅިވަގަތުމުން މަރުހަބާ ދެންނެވުމަށް އެކްސްގައި ކުރެއްވި ޕޯސްޓެއްގައެވެ. 

މަލްޓި ޕާޓީ ޑިމޮކްރަސީ ރާއްޖެއަށް ތައާރަފްކޮށް ޑިމޮކްރެޓިކް ވެއްޓެއް ރާއްޖޭގައި ގާއިމުކުރުމަށް އިސްނަގައިގެން އިސްލާހީ ހަރަކާތް ހިންގި ޕާޓީއަކީ އެމްޑީޕީއެވެ. އުފެދުނީއްސުރެ ޑިމޮކްރެޓިކްހަމަތައް ނަގަހައްޓަމުން ރާއްޖޭގެ ރައްޔިތުންގެ ހެވާލާބައަށް ހުއްޓުމެއްނެތި އެއް އަމާޒެއްގައި މިހާތަނަށްވެސް ދެމިއޮތް ޕާޓީއަކީ އެމްޑީޕީއެވެ.

ރާއްޖޭގެ ފަހުގެ ތަރީހުގައި އުފެދުނު ފުރަތަމަ ސިޔާސީޕާޓީ އެމްޑީޕީއަކީ ވަކިމީހެއްގެ ވަށައިގެން އެނބުރޭ ޕާޓީއެއް ނޫނެވެ. ވަކިމީހަކު ނެތުމުން ހުއްޓި ވަކިމީހަކަށްޓަކައި ރޫޅިގެންދާ ޕާޓީއެއްވެސް ނޫނެވެ. އެމްޑީޕީ އުފެއްދުމުގައި އިސްކޮށް އުޅުނު ގިނަ ބަޔަކު އެމްޑީޕީގެ އިސްސަފުން ނުފެނި އެއްވާނެއްގައި އެމްޑީޕީ ދެމިއޮތީ އަދަކު އެކަންޏެއް ނޫނެވެ. 

އެމްޑީޕީއަކީ ފިކުރެކެވެ. ވަކިމީހެއް ވަކިބައެއް ނޫނެވެ. މީހުން އައުމާ ދިއުމަކީ އެމްޑީޕީގެ ތޮބީއަތެވެ. ހިތްވަރާއެކު ކެރިގެން މަސައްކަތް ކުރާ ކޮންމެ ދިވެއްސަކަށް ވެސް އެމްޑީޕީގެ ލީޑަރޝިޕަށް އައުމުގެ ޖާގަ އެމްޑީޕީގައި ތަންމިނަށް ހުޅުވިފައިވެއެވެ. އެމްޑީޕީއަކީ ވަކިމީހަކަށް ހެޔޮވަރަށް ފަހާފައިވާ ކޯޓަކަށް ބަލައިގެން މީހެއްގެ ފަހަތުން އެނބުރޭ ބަޔަކަށް އެމްޑީޕީގައި އުޅެން އުނދަގުވާނެއެވެ. ވަކިމީހަކު ނެތިގެން އެމްޑީޕީ ނުހުއްޓި ކުރިއަށް ދަނީ އެހެން ވެގެންނެވެ. 

މައުމޫނު ވަށާއެބުރުނު ޑީއާރުޕީން މައުމޫނު ދުރުކުރެވުމުން މައުމޫނު ވަށައިގެން އެބުރުނު މީހުނަށް ޕީޕީއެމް އުފައްދާ ޑީއާރުޕީ ކަފުންކުރީއެވެ. ޕީޕީމްގެ ޓިކެޓްގައި ޔާމީނަށް ރައީސްކަން ލިބުމާއެކު ޕީޕީއެމަކީ ޔާމީނު ވަށައިގެން އެނބުރޭ ޕާޓީއަކަށް ވެގެން ދިޔައެވެ. ޕްރޮގްރެސިވް ކޯލިޝަނުން މުއިއްޒަށް ޓިކެޓް ލިބި ރައީސްކަން ލިބުމުން ޕީޕީއެމް ޕިއެންސީއަށްވެ އުވެދިޔައީއެވެ. މިއަދަކު ޑީއާރުޕީއެއް ޕީޕީއެމެއް ރާއްޖޭގެ ސިޔާސީ މައިދާނަކުނެތެވެ. އެހެނެއް ކަމަކު އުފެދުނީއްސުރެ އެންމެ ވަރުގަދަ ސިޔާސީ ޕާޓީގެ ގޮތުގައި އެމްޑީޕީ އެބައޮތެވެ.

އެމްޑީޕީގެ މަތިފަޑިން ވިދާލި ގިނަ މީހުން ވީތަނެއްވެސް ނޭގެއެވެ. ގޯގޯ ލަތީފެއް އިބްރާއެއް ޑރ. މުނައްވަރެއް ޑރ. ވަހީދެއް ނަޝީދެއް ނެތެވެ. އެމްޑީޕީ ގަދަކޮށް އެބައޮތެވެ. މިސާލަކަށް ޑރ.ޑީޑީއާއި އަލީ ވަހީދާއި މަވޯޓާ ޝަރީފް ރީކޯ މޫސަ ކަހަލަ ކިތަންމެ ބަޔަކު އެތައް ފަހަރަކު ގޮސް އައިސް އެތައް މަސައްކަތެއް އެމްޑީޕީގައި ރައްޔިތުންގެ ހައްގުގައިކޮށްދީފައި އެބަހުއްޓެވެ. ކިތަންމެ ވަރަކަށް ގޮސްގޮސްފައި އަޔަސް އެއްމެންނަށްވެސް އެއްވަރަށް ހިދުމަތްކުރުމުގެ ޖާގަ އެމްޑީޕީގައި އޮވެއެވެ. ދާމީހުން އެނބުރި އައިސް ހިދުމަތުގައި އުޅުމަށް ޖާގަ ތަންމިނަށް ދިނުމުގެ ކެރުން ތެރިކަން އެމްޑީޕީގެ މެންބަރުންގެ ކިބައިގާއި ހުރެއެވެ. އެމްޑީޕީ މެންބަރުން ބަލަނީ ކުރާ މީހަކަށް ނޫނެވެ. ގައުމަށްޓަކާ ޕާޓީއަށް ކޮށްދޭ ކަންތަކަށެވެ. 

އެމްޑީޕީގެ މަތިފަޑީގައި ތިއްބެވުމަށް ފަހު އެކުއެކީގައި އެމްޑީޕީ ދޫކުރެއްވި ބޭފުޅުންތަކެއް އެނބުރި އެމްޑީޕީޢާއި ގުޅިވަޑައިގެން ގަތުމަކީ އެމްޑީޕީން މަރުހަބާ ކިޔާކަމެކެވެ. އުސްތާޒު ހަސަން ލަތީފާއި ސިއްޕެއާއި އަލީ އާޒިމާ އަމްރު ފަދަ ބޭފުޅުންތަކެއް ގުޅިވަޑައިގަތުމުން އެނގިގެން ދިޔަކަމަކީ އެމްޑީޕީ ނުރޫޅޭކަމެވެ. އެމްޑީޕީ ގަދަކޮށް އޮތްކަމެވެ. ރަނގަޅު ޑިމޮކްރެޓިކް ސިޔާސީ ޕްލެޓް ފޯމެއް އޮތީ އެމްޑީޕީގައިކަމެވެ.