ސައިންޓިފިކް ނަމުން އިލިއުސިން އިންޑިކާ ކިޔާ ހުޔަށް އާންމުކޮށް ކިޔާއުޅެނީ ގޫސް ގްރާސްއެވެ. ރާއްޖޭގެ އެކި ރަށްރަށުގައި އެކިނަމުން މުހާތަބުކުރެވޭ ގޫސް ގްރާސްއަށް މިލިޔުމުގެ ބޭނުމަށްޓަކާ ކިޔާނީ އަސްދޫނިހުއިގެ ނަމުންނެވެ. އަސްދޫނި ހުޔަކީ ބޭނުމެއްނެތް ބޭކާރު ކުނިގަނޑެކޭ ހީވިޔަސް އަސްދޫނިހުއިގެ މުހިންމުކަމާއި ބޭނުންތެރިކަން އިންސާނާގެ ހަށިގަނޑަށް ވަރަށް މުހިންމެވެ. އެތަކެއް ބައްޔެއްގެ ފަރުވާ އަސްދޫނިހުއީގައި ވެއެވެ.

އަސްދޫނިހުއި ނުވަތަ ގޫސް ގްރާސް

ގޫސް ގްރާސް އަކީ ތަފާތު ވެށިތަކުގައި ފަސޭހައިން ހެދޭ، ދުނިޔޭގެ އެކި ކަންކޮޅުތަކުގެ ގޯތިގެދޮރުން އާންމުކޮށް ފެންނަ ހުޔެކެވެ. މިހުޔަކީ ބަލާބެލުމަށް މާ މުހިންމު ނޫން ބާވަތެއްގެ ހުޔެއް ކަމުގައި ފެނުނު ނަމަވެސް ވަރަށް ގިނައިން ބޭސްވެރިކަމުގެ ބޭނުންތައް ހުރި ހުޔެކެވެ. ދުޅަހެޔޮކަން އިތުރުކުރުމާއި، އެންޓި-އޮކްސިޑެންޓް އާއި ހަކުރު ބައްޔަށް ފަރުވާކުރުމާއި، އެލަރޖީ ކުޑަކުރުމާއި އަދި ކުޑަކަމުދާ ނިޒާމްގެ ފަރުވާތައް އޭގައި އެކުލެވެއެވެ. އަސްދޫނިހުއި ބޭނުންކޮށްގެން ތައްޔާރުކުރާ ސައިން ވަރަށް ގިނަ ބަލިތަކަށް ފަރުވާ ހޯދައެވެ.

ފުޅާ ދާއިރާއެއްގައި ސިއްހަތަށް ކުރާ ފައިދާ:

• ކެންސަރު ރައްކާތެރިވުމާއި ފަރުވާ: ގޫސް ގްރާސްގައި ގިނައިން ހުންނަ އެންޓި-އޮކްސިޑެންޓްތަކަކީ ކެންސަރާ ދެކޮޅަށް މަސައްކަތްކުރާ މުހިންމު އެއްޗެކެވެ. އެންޓި-އޮކްސިޑެންޓްތަކުން ހަށިގަނޑުގައި ހުންނަ ގެއްލުންދޭ ފްރީ ރެޑިކަލްތައް ނައްތާލައެވެ. މި ފްރީ ރެޑިކަލްތަކަކީ ކެންސަރު ސެލްތައް އުފެދުމަށް މަގުފަހިވާ އެއްޗެކެވެ. ގަވާއިދުން ގޫސް ގްރާސް ސައި ބުއިމަކީ ކެންސަރު ޖެހުމުގެ ފުރުސަތު ކުޑަކުރުމަށް އެޅިދާނެ ފިޔަވަޅެކެވެ.
• އޯވަރީ ސިސްޓް އަދި ފައިބްރޮއިޑްގެ ވޭން ލުއިކުރުން: ގޫސް ގްރާސްގައި ހުންނަ ދުޅަހެޔޮކަން އިތުރުކުރާ ބާވަތްތަކުގެ ސަބަބުން އޯވަރީ ސިސްޓް އާއި ފައިބްރޮއިޑްގެ ސަބަބުން ދިމާވާ ރިއްސުމާއި ދުޅަވުން ކުޑަކުރެއެވެ. ކޮންމެ ދުވަހަކު މި ސައި ބުއިމުން މި ކަހަލަ ބަލިތަކުގެ އަލާމާތްތައް ލުއިކޮށްދީ، އަންހެނުންގެ ނަސްލު އުފެއްދުމުގެ ދުޅަހެޔޮކަން އިތުރުކުރުމަށް އެހީތެރިވެދެއެވެ.
• ކިޑްނީ ބަލީގެ އެހީތެރިކަން: ކުޑަކަމުދިއުން އިތުރުކޮށްދީ ހަށިގަނޑުން އިތުރުވާ ފެނާއި ލޮނު ނައްތާލުމަށް އެހީތެރިވެދެއެވެ. ހާއްސަކޮށް ކިޑްނީގެ ބަލިތަކުން ސަލާމަތްވުމަށް މަސައްކަތްކުރާ މީހުންނަށް ކަމަކީ ވަރަށް ބޭނުންތެރި ކަމެކެވެ. އެއީ ހަށިގަނޑުގެ ދިޔާތަކެތި ބެލެހެއްޓުމަށާއި ދަބަރު ކުޑަކުރުމަށް އެހީތެރިވާތީއެވެ.

• ހަކުރު ބަލި ކޮންޓްރޯލް ކުރުން: ގޫސް ގްރާސްގައި ހުންނަ ހަކުރު ބަލި ކޮންޓްރޯލް ކުރުމުގެ ބާރު ހަކުރު ބަލި ހުންނަ މީހުންނަށް ވަރަށް ބޮޑަށް އެހީތެރިވެދެއެވެ. ގޫސް ގްރާސް ސައި ބޭނުން ކުރުމުން ލޭގައި ހުންނަ ހަކުރުގެ މިންވަރަށް ރަނގަޅު އަސަރުކުރާތީ، ގޫސް ގްރާސް ސައިއަކީ ހަކުރު ބަލި ބެލެހެއްޓުމުގެ ޕްލޭނަަކަށް ބޭނުންތެރި ކަމެކެވެ. އަސްދޫނިހުއިން ޖުމްލަކޮށް ގުލްކޯސް ކޮންޓްރޯލް ރަނގަޅުކޮށްދެއެވެ.
• ލޭމަނާކުރުމާއި ފާރުތައް ފަސޭހަކުރުން: ފާރުތައް އަވަހަށް ރަނގަޅުކުރުމަށާއި ލޭ އައުން ހުއްޓުވުމަށް، ފިސްކޮށްލާފައިވާ ގޫސް ގްރާސް ސީދާ އެ ސަރަޙައްދަކަށް އުނގުޅާލާށެވެ. މީގައި އެކުލެވޭ ތޮބައީ ސިފަތަކުން ލޭ ގަނޑުގަތުމަށާއި ފާރު ރަނގަޅުވުމަށް އެހީތެރިވެދެއެވެ.
• ޕެރަސައިޓްސް ދެކޮޅަށް ބޭނުން: ގޫސް ގްރާސްގައި ގުދުރަތީ ގޮތުން ހުންނަ ބޮޑުކަމުދިޔުން ފަސޭހަވުމުގެ އަސަރުތަކުން ޕެރަސައިޓްސްގެ އިންފެކްޝަންތަކަށް ފަރުވާކުރުމަށް އެހީތެރިވެދެއެވެ. ބޮޑުކަމުދިއުން ފަސޭހަކޮށްދޭތީ، މައިދައާއި ގޮހޮރުގެ ތެރެއިން ޕެރަސައިޓްސް ބޭރުކުރުމަށް އެހީތެރިވެ، ހަޖަމުކުރުމުގެ ދުޅަހެޔޮކަން ރަނގަޅުވެއެވެ.
• ނިއުމޯނިއާއިން އަރައިގަތުން: އަސްދޫނިހުއިގެ މޫތަކުން ހަދާ ސަޔަކީ ނިއުމޯނިއާއާ ދެކޮޅަށް ބާރުގަދަ ފަރުވާއެކެވެ. މި ސައި ގަވާއިދުން ބުއިމުން ނިއުމޯނިއާގެ އަލާމާތްތައް ވަރަށް ބޮޑަށް މަދުވެ، އަރައިގަތުން އަވަސްވެއެވެ. ގިނަ ފަހަރު މީގެ ނަތީޖާ ދުވަސްތަކެއްގެ ތެރޭގައި ފެންނަން ފަށައެވެ.
• ލޭމައްޗަށްދިޔުން ކޮންޓްރޯލްކުރުން: ލޭ ދައުރުވާ ނިޒާމަށް އެހީތެރިވެދީ ލޭމައްޗަށްދިޔުން ކޮންޓްރޯލްކުރުމަށް އެހީތެރިވެދެއެވެ. ގަވާއިދުން އަސްދޫނިހުއި ސައި ބުއިމުން ދުޅަހެޔޮ ކަމުގައި ލޭގެ ޕްރެޝަރ ހިފެހެއްޓުމަށް އެހީތެރިވެދެއެވެ.
• ހުން ދަށްކުރުން: ހުން އައިސްފައިވާ މީހުންނަށް އަސްދޫނިހުއިން ލުއި ލިބެއެވެ. މި ގަހުގެ މޫތަކުން ހަދާފައިވާ ސައި ބުއިމުން ހަށިގަނޑުގެ ފިނިހޫނުމިން ދަށްކޮށް ހުމުގެ އަލާމާތްތައް ކުޑަކުރުމަށް އެހީތެރިވެދެއެވެ.
• ކަނޑައިގެން ދާތަންތަނަށް ފަރުވާކުރުން: އަސްދޫނިހުއި ފިއްތާލާފައިވާ ފަތްތަކުން ހަދާފައިވާ މަލަމެއްހެން ބޭރުބަދެލުމުން ދުޅަވުމާއި ރިހުން ކުޑަކޮށް، ރަނގަޅު ކަނޑައިގެންދާ ތަންތަން ފަސޭހަކޮށް ދެއެވެ. 

ތައްޔާރުކޮށް ބޭނުންކުރާނެ ގޮތް:

ބޭސްވެރިކަމުގައި އަސްދޫނިހުއި ބޭނުންކުރުމަށް ތައްޔާރުކުރާ ގޮތް ފަރުވާކުރެވޭ ބައްޔަކާ ގުޅިގެން ކުޑަކޮށް ތަފާތުވެއެވެ:

• ހަކުރުބަލި، ކިޑްނީ ބަލި، ލޭމައްޗަށް ދިޔުން އަދި ހުން ފަދަ އެތެރޭގެ ބަލިތަކަށް، ފަތްތަކުން ނުވަތަ މޫތަކުން ސައި ހެދުމަށް ލަފާދެވެއެވެ. ބައި ލީޓަރު ފެނަށް މުށެއްހާ އަސްދޫނިހުއި ލައިގެން 3 މިނިޓެއް ހާއިރު ކައްކާ ދުވާލަކު އޭގެ އެއް ތަށި ފެން ބުއިމަށް ލަފާދެވެއެވެ.
• ފާރުތަކާއި ކަފައިގެން ދިޔުން ފަދަ ކަންކަމަށް ބޭރުން ބޭނުންކުރުމަށް، ތާޒާ ފަތް ފުޑައިގެން މަލަމެއް ބަދެލާނީއެވެ. ފާރު ގަނޑުގައާއި ކަޑައިގެން ގޮސްފައިވާ ހިސާބުގައި ރަގަޅަށް ޖައްސަންވާނެއެވެ.

ގޫސް ގްރާސް ފަރުވާއެއްގެ ގޮތުގައި ބަލައިގަތުން:

ސިއްހީ މައްސަލަތަކަށް ބާރުގަދަ ގިނަ ފަރުވާތަކެއް އަސްދޫނިހުއި ބޭނުންކޮށްގެން ހޯދިދާނެކަން ހާމަކޮށްދެއެވެ. ކޮންމެ ބައްޔަކަށްމެ ހާއްސަގޮތަކަށް އަސްދޫނިހުއި ތައްޔާރުކުރުކޮށް ބޭނުންކުރާނެ ގޮތްތައް ދެނެގަތުމުން ބޭކާރު އެއްޗެއްގޮތުގައި ދެކެމުންއައި ފައިދާހުރި މި ހުއިގެ ފުރިހަމަ ބޭނުން ހިފިދާނެއެވެ. އަދި ދުޅަހެޔޮކަމުގެ އާދަތަކުގެ ތެރެއަށް މި ގަސް ވައްދައިގެން ސިއްހީ ދުޅަހެޔޮކަން އިތުރުކުރެވިދާނެއެވެ.

ޗިއާ މުގުގެ ފެނުން ދުވަސް ފެށުން

ޗިއާ މުގުގައި އޮމެގާ-3 ފެޓީ އެސިޑް ޢާއި ފައިބަރު އަދި އެންޓިއޮކްސިޑެންޓްތައް ގިނައިން ހުރެއެވެ. އެއީ އަހަރެމެންގެ ކާނާގެ ވަރަށް މުހިންމު ބައެކެވެ. ހެނދުނު ޗިއާ މުގުގެ ފެން ބުއިމުން އެލްޑީއެލް (ނުބައި ކޮލެސްޓްރޯލް) މަދުކުރުމަށް އެހީތެރިވެދެއެވެ. ބޯލާ ޗިއާ މުގުފެނުގައި ހުންނަ ދޫވާ ފައިބަރު ޖެލީ ކަހަލަ އެއްޗަކަށް ބަދަލުވެ، ލޭހޮޅިތަކުގައި ކޮލެސްޓްރޯލް ޖަމާވުން މަދުކުރުމަށް އެހީތެރިވެދެއެވެ. މޭޒުމަތީ ސަމުސަލެއްހާ ޗިއާ އާއި މުގު ރޭގަނޑު ފެނުގައި ބަހައްޓާފައި ހެނދުނު އެންމެ ފުރަތަމަ އެ ފެން ބޯށެވެ.

އޯޓްސް އާއި ބާރލީ ކެއުން

އޯޓްސް އާއި ބާރލީގެ ކާނާއަކީ ހިތަށް ވަރަށް ރަނގަޅު އެކުވެރިއެކެވެ. އެއީ ކޮލެސްޓްރޯލް މަދުކުރުމަށް ވަރަށް ބުރަކޮށް މަސައްކަތްކުރާތީއެވެ. އޯޓްސް އާއި ބާރލީ އެލްޑީއެލް ކޮލެސްޓްރޯލްގެ މިންވަރު ދަށްކުރެއެވެ. ހެނދުނުގެ ނާސްތާއަށް އޯޓްމީލް ތަށްޓެއް ކެއުމާއި ސޫޕާއި ސެލެޑަށް ބާރލީ އިތުރުކުރުމުން ވަރަށް ބޮޑެތި ފައިދާތަކެއް ކުރާނެއެވެ.

ކެއުމަށް ފައިބަރު އިތުރުކުރުން

ހިތުގެ ދުޅަހެޔޮކަމަށް އަނެއް ރަނގަޅު އެހީތެރިއަކީ ފައިބަރެވެ. ފައިބަރު ބޭނުންކުރުން އިތުރުކުރުމުން ކޮލެސްޓްރޯލްގެ މިންވަރު ދަށްކުރުމަށް އެހީތެރިވެދެއެވެ. މޭވާ، ތަރުކާރީ ފަޅޯ ފަދަ ބަނޑު ދިޔާކުރާ ފައިބަރު ގިނައިން އެކުލެވޭ ކާނާާ ކޮލެސްޓްރޯލްއާ ގުޅި، އެއްވެސް ގެއްލުމެއް ދިނުމުގެ ކުރިން ހަށިގަނޑުން ބޭރުކޮށްލައެވެ. ކޮންމެ ކެއުމަކަށްވެސް ފައިބަރު ގިނައިން އެކުލެވޭ ކާނާ ހިމެނުމަކީ ހަޖަމުކުރުން ރަނގަޅުކޮށްދޭ ކަމެއްގެ އިތުރުން، ކޮލެސްޓްރޯލް ހިފެހެއްޓުމަށްވެސް އެހީތެރިވެދޭ ކަމެކެވެ. ކުރިއެރުން ފެންނަން ދުވާލަކު މަދުވެގެން 25-30 ގްރާމް ފައިބަރު އިތުރުކުރަން މަސައްކަތްކުރާށެވެ.

ކޮންމެ ދުވަހަކު ހަރަކާތްތެރިވެ އުޅުން

ކޮލެސްޓްރޯލް ކޮންޓްރޯލް ކުރުމުގައި ޖިސްމާނީ ހަރަކާތްތަކުގެ ދައުރު ވަރަށް ބޮޑެވެ. ކޮންމެ ދުވަހަކު ކަސްރަތު ކުރުމުން އެލްޑީއެލް (ނުބައި) ކޮލެސްޓްރޯލް މަދުކޮށް، އެޗްޑީއެލް (ރަނގަޅު) ކޮލެސްޓްރޯލް އިތުރުކުރުމަށް އެހީތެރިވެދެއެވެ. އެގޮތުން މާ ގަދަ ކަސްރަތުތައް ކުރާކަށް ނުޖެހެއެވެ. ހިނގުން، ބައިސްކަލު ދުއްވުން ނުވަތަ އާންމު ގޭތެރޭގައި ކުރާޒާތުގެ މަސައްކަތްތައް ކުރުން ފަދަ ކަންތައްތަކުންވެސް ހަރަކާތްތެރި ދިރިއުޅުމެއް ދެމެހެއްޓުމަށް އެހީތެރިވެދެއެވެ. ހަފްތާގެ ގިނަ ދުވަސް ތަކުގައި، މަދުވެގެން 30 މިނެޓު މެދުމިން ވަރުގެ ހަރަކާތްތަކެއް ކުރުމަށް މަސައްކަތް ކުރާށެވެ.

ނަޓްސްއާއި މަދު ކެއުން

ކޮލެސްޓްރޯލް ދަށްކުރާ ރަނގަޅު މޭވާގެ ތެރޭގައި ފްލެކްސްސީޑް، ވޯލްނަޓް އަދި ބަދަން ހިމެނެއެވެ. ރަނގަޅު ކޮލެސްޓްރޯލް އިތުރުކޮށް، ނުބައި ކޮލެސްޓްރޯލް ދަށްކުރުމަށް އެހީވާ މޭވާއެވެ. ކުޑަކުޑަ އަތްމުށެއްގެ މިންވަރަށް ނަޓްސް ނުވަތަ މަދު ކޮންމެ ދުވަހަކު ކެއުމުން ބޮޑު ބަދަލެއް އަންނާނެއެވެ. ނަމަވެސް ކެވޭ މިންވަރަށް ސަމާލުކަން ދޭންވާނެއެވެ. އެއީ ނަޓްސްގައި ކެލަރީ ވަރަށް ގިނައިން ހުންނާތީއެވެ.

ލިބެނީ ކޮން އެއްޗެއް:

މުރަނގަ ފަތަކީ ކެރެޓާއި އޮރެންޖާއި ކިރަށް ވުރެވެސް އޭގައި ހުންނަ ނިއުޓްރިޝަންގެ މިންވަރު މަތި އެއްޗެކެވެ. މުރަނގަފަތުގައި އެންޓިފަންގަލް އާއި އެންޓިވިރަލް އާއި އެންޓި-ޑިޕްރެސެންޓް ގެ އިތުރަށް ފާރު ހިއްކުމާއި ދުޅަ ތިރި ކޮށްދޭ ކަހަލަ ބާރުތައް އެކުލެވިގެންވެއެވެ. ބައެއް ޒަހަމް ތަކަށް ފަރުވާ ކުރުމުގައި ވެސް ކުރީގެ ބޭސްވެރިން ވަނީ މުރަނގަފަތް ބޭނުން ކޮށްފައެވެ.

މުރަނގަ ފަތުން ވިޓަމިން އޭ ލިބޭއިރު ވިޓަމިން ބީ1 ، 2، 3، 6 ލިބެއެވެ. ޒިންކް އާއި އަޔަން އާއި ކެލްސިއަމްގެ އިތުރުން ޕްރޮޓީން ޢާއި މެގްނީޒިއަމް މަތީ ދަރަޖައަކަށް ލިބެއެވެ. 

ބޭނުންކުރުން:

މުރަނގަފަތާއި މުރަނގަ ތޮޅިއަކީވެސް އެކި ގޮތްގޮތަށް ހަދައިގެން ކެއުމުގައި މީހުން ބޭނުން ކުރެވޭ ފައިދާހުރި ތަކެއްޗެވެ. މިހާރު މުރަނގަފަތު ސަޔަކީވެސް ބަރުދަން ލުއި ކުރުމަށާއި ހަކުރުބަލި ހުންނަ މީހުންގެ ހަކުރު ތިރި ކުރުމަށް ބޭނުން ކުރެއެވެ. 

މުރަނގަފަތު ސައި:

މުރަނގަފަތު ސައި ހެދުމަށް ތާޒާ މުރަނގަފަތް އަވިން ހިއްކާ މުރަނަ ކޮށްލާނީއެވެ. އެއްކޮށް މުރަނަ ވުމުން އަތުން ފުނޑުވާލާށެވެ. އަތުން ފުނޑުވުމުން މާ ބޮޑެތި އެތިކޮޅު ހުންނާތީ ހިތްހަމަ ނުޖޭނަމަ މިކްސަރުން ހިކި ކޮށް މުގުރާލާށެވެ. ސައިފަތުގެ ގޮތުގައި މުގުރާލި މުރަނގަފަތު ފުށް ބޭނުން ކޮށްގެން ސައިގިރައިގެން ބޯނީއެވެ. ހިއްކާފައި ހުރި މުރަނގަ ފަތް އަޅައިގެން ފެންކައްކައިގެން ވެސް މުރަނގަފަތު ސައި ހެދިދާނެއެވެ. 

މުރަނގަފަތް ތެލުލައިގެން ބޭނުން ކުރުމަކުން ސިއްހީ ފައިދާއެއް ނުކުރާނެއެވެ. ސިއްހީ ގޮތުން ފައިދާ ހޯދުމަށް ކެއުމުގައި މުރަނގަފަތް ބޭނުން ކުރަންވާނީ ރޮލަށެވެ.  

މުރަނގަ ފަތުން ކުރާ ސިއްހީ ބައެއް ފައިދާތައް:

• ޖަރާސީމުން ޖެހޭ ބަލިތަކުން ފަސޭހަވުން: މުރަނގަފަތު ދިޔަ ބޭނުން ކުރުމުން ސަލްމޮނެއްލާ، އީ-ކޮލައި ފަދަ ޖަރާސީމުތަކުން ޖެހޭ ބަލިތަކުން ފަސޭހަކޮށްދެއެވެ.
• ހަކުރުބަލި ކޮންޓްރޯލު ކުރުން: ލޭގައި ގްލުކޯޒް ހުންނަ މިންވަރު ދައްކޮށްދިނުމުގެ އިތުރުން، ކުޑަކަމުދާ ތަކެތީގައި ހުންނަ ހަކުރާއި ޕްރޮޓީން މަދުކޮށް ދޭނެއެވެ. އޭގެ ސަބަބުން ހަށިގަނޑުގައި ހިމަގޮލޮބިން ހުންނަވަރު ރަނގަޅުވެގެންދާނެއެވެ.
• ނޭވާލުމަށް ފަސޭހަވުން: ނޭވާހިއްލާ ބަލި ހުންނަ މީހުންނަށް މުރަނގަފަތް ބޭނުން ކުރުމުން ފުއްޕާމޭގެ ސިއްހަތު ރަނގަޅުވެ ނޭވާލާން ފަސޭހަ ވާނެއެވެ.
• ލޭ މައްޗައްދިޔުން ތިރިކުރުން: ލޭ ހޮޅިތައް ފަލަވެ ބެދުމުން ދުރުކޮށް ދޭނެއެވެ.
• ބަރުދަން ލުއި ކުރުން: މުރަނގަ ފަތު ސައި ބުއިމުން، ހަށިގަނޑުގައި ސަރުބީ އުފެދުމުގެ ބަދަލުގައި ހަކަތަ އުފައްދައިދޭނެއެވެ.
• ކްލޮސްޓްރޯލް ދަށްކުރުން: ހަށިގަނޑުގައި ކޮލެސްޓްރޯލް ހިމެނޭ މިންވަރު ދަށް ވުމުން ހިތުގެ ބަލިތައް ޖެހުމުގެ ފުރުސަތު ކުޑަކުރެއެވެ.
• ބަނޑުގެ އާއްމު އުދަގޫތައް ކުދަކުރުން: ބަނޑު ހަރުވުމާއި، ގޭސްވުން ފަދަ، ހަޖަމު ކުރުމުގެ ނިޒާމާއި ގުޅިފައިވާ މައްސަލަތައް މުރަނގަ ފަތުން ހައްލުކޮށްދެއެވެ. 

ހެނދުނު ފުރަތަމަ ބުއިމަކަށް ކޮފީ ބުއިމަކީ ސިއްހީ ގޮތުން ގިނަ ފައިދާތަކެއް ލިބިގެންދާނެ ކަމެކެވެ. ހެނދުނު ފުރަތަމަ ކަމަކަށް ކަޅު ކޮފީ ބުއިމުން ލިބޭ އެތައް ފައިދާތަކެއް ހިއްސާ ކޮށްލާނަމެވެ. 

1. ބަރުދަން ލުއިކުރުމަށް މަގުފަހިކޮށްދޭ: ކޮފީ އަކީ ދުޅަހެޔޮ ބަރުދަނެއް ބެހެއްޓުމަށް އެހީތެރިވެދޭ ކެލޮރީ އެއް ނެތް ބުއިމެކެވެ. އެއީ ގިނަ އަދަދަކަށް ކެފެއިން އެކުލެވޭ އެއްޗެއް ކަމުން މެޓަބޮލިޒަމް އަވަސްވެ، ހަކަތަ އިތުރުކޮށްދީ، ކާހިތްވުން ކުޑަވެދެއެވެ.
2. މޫޑު ރަނގަޅު ކޮށްދޭ: ކަޅު ކޮފީއަކީ ނިއުރޯލޮޖިކަލް ސިސްޓަމް ސްޓިމިއުލޭޓްކޮށް، "އުފާވެރި ކެމިކަލްތައް" ދޫކުރުން އިތުރުކޮށްދޭ އެއްޗަކަށް ވާއިރު، މިއީ އުފާވެރިކަމާއި ހިތްހަމަޖެހުމުގެ އިހުސާސް ކުރެވޭ ކަމެކެވެ.
3. ހަކުރުބަލީގެ ނުރައްކާ ކުޑަ: ގިނަ ދިރާސާތަކުން ދައްކާ ގޮތުގައި ކަޅު ކޮފީ ބުއިމަކީ ހަކުރުބަލި ޖެހުމުގެ ފުރުސަތު ކުޑަކޮށްދޭ ކަމެކެވެ. ހަށިގަނޑުގައި އިތުރު އިންސިއުލިން އުފައްދައެވެ. ލޭގައި ގުލްކޯޒްގެ މިންވަރު ކޮންޓްރޯލް ކުރުމަށް އެހީތެރިވެދެއެވެ.
4. އެންޓިޑިޕްރެޝަނެއްގެ ގޮތުގައި މަސައްކަތްކުރޭ: ކޮފީގެ ސަބަބުން އެންޓިޑިޕްރެޝަން އަސަރު ކުރަނީ ސިކުނޑީގައި ސެރޮޓޮނިން އާއި ޑޮޕަމިންގެ މިންވަރު މަތިކޮށްދޭތީއެވެ. ހިތާމައާއި އެކަނިވެރިކަމުން އުފެދޭ ޑިޕްރެޝަންގެ އިހުސާސްތައް ކުޑަކޮށްދެއެވެ.
5. ހަނދާން ގަދަކޮށްދޭ: ކަޅު ކޮފީ ބުއިމަކީ ހަނދާން ބެހެއްޓުމަށް އެހީތެރިވެދޭ ކަމެކެވެ. ވިސްނުމުގެ ގާބިލުކަން އުމުރާއެކު ދަށްވެ، އަލްޒައިމާ އާއި ޑިމެންޝިއާ އާއި ޕާކިންސަން ފަދަ ހަނދާނާ ގުޅުންހުރި ބަލިތައް އިތުރުވުން ކުޑަކުރުމަށް ކޮފީ މުހިންމެވެ.
6. ފުރަމޭގެ ދުޅަހެޔޮކަން ދެމެހެއްޓުމަށް އެހީތެރިވެދޭ: ފުރަމޭ އަކީ ހަށިގަނޑުގެ ސިއްހަތު ނެގެހެއްޓުމަށް މުހިއްމު ގުނަވަނެކެވެ. ކަޅު ކޮފީގެ އެހީގައި ފުރަމޭގެ ނުރައްކާތެރި އެންޒައިމްތަކުގެ ލޭގައި ހުންނަ މިންވަރު ދަށްވެއެވެ. ބައެއް ދިރާސާތަކުން ދައްކާ ގޮތުގައި ކޮފީ ބުއިމަކީ ހެޕަޓައިޓިސްޢައި ލިވަރ ސިރޯސިސް އާއި ފެޓީ ލިވަރ ޑިޒީޒް އަދި ލިވަރ ކެންސަރު ފަދަ ބަލިތައް މަދުކުރުމަށް އެހީތެރިވެދޭނެ ކަމެކެވެ.
7. އެންޓިއޮކްސިޑެންޓްސް އިން މުއްސަނދިވުން: ކަޅު ކޮފީން މެންގަނީޒް، މެގްނީޒިއަމް، ޕޮޓޭސިއަމް، ވިޓަމިން ބީ2، ބީ3، އަދި ބީ5 ފަދަ ވަރުގަދަ އެންޓިއޮކްސިޑެންޓްސް ލިބެއެވެ.
8. ބަނޑު ސާފުކުރޭ: ކޮފީއަކީ ކުޑަކަމުދިޔުމުގެ އެހީތެރިއެކެވެ. ކޮފީބޮންޏާ ގިނައިން ކުޑަކަމުދެވެއެވެ. ގިނަގިނައިން ކުޑަކަމުދިއުމުން ބަނޑު ސާފުކޮށް ބެހެއްޓުމުގެ އިތުރުން ވިހަ މާއްދާތަކާއި ބެކްޓީރިއާތަކުން ހަށިގަނޑުން ސަލާމަތްވުމަށް އެހީތެރިވެދެއެވެ.
9. ސްޓްރެސް ކުޑަކުރޭ: ކޮފީ އަކީ ހާސްކަން ފިލުވައިދީ، ލުއި ފަސޭހަ ކޮށްދިނުމަށް އެހީތެރިވެދޭ އަޖައިބު ކުރުވަނިވި ބުއިމެކެވެ. ކަޅު ކޮފީ ތަށިން ވަގުތުން މޫޑު ރަނގަޅު ކުރެވިދާނެއެވެ. އެއީ ނިއުރޯލޮޖިކަލް ސިސްޓަމް ސްޓިމިއުލޭޓް ކޮށްގެން ސެރޮޓޮނިން އަދި ޑޮޕަމިން ފަދަ ނިއުރޯޓްރާންސްމިޓަރސްގެ މިންވަރު މަތިކުރުމަށް އެހީތެރިވެދޭ އެއްޗަކަށް ވާތީއެވެ.
10. ކެންސަރު ޖެހުމުގެ ނުރައްކާ ކުޑަކުރޭ: ކޮފީއަކީ ފުރަމޭ، ބޮޑު ގޮހޮރު، އަދި އުރަމަތީގެ ކެންސަރު ފަދަ ބައެއް ކެންސަރުތައް ޖެހުމުގެ ނުރައްކާ ކުޑަކުރުމަށް އެހީތެރިވެދޭ އެއްޗެއްކަމަށް ދިރާސާތަކުން ދައްކައެވެ. ކޮފީގައި އެންޓި އިންފްލެމެޓަރީ ޕްރޮޕަޓީސް ވެސް އެކުލެވިގެންވެއެވެ.

ކަޅު ކޮފީގެ ސަބަބުން ސިއްހީ ގޮތުން ގިނަ ފައިދާތަކެއް ލިބުނު ނަމަވެސް އެހެން އެއްޗެތި ފަދައިން މާގިނައިން ބޭނުން ކުރުމުން ނޭދެވޭ އަސަރުތަކެއް ކޮށްފާނެތީ ކޮފީ ބުއިންވެސް މެދުމިނުގައި ހިފަހައްޓަން ޖެހެއެވެ. ކޮފީ މާގިނައިން ބޮވޭނަމަ މިނަރަލް އެބްޒޯޕްޝަން ރޭޓް ދަށްވުމާއި، އެސިޑިޓީ އިތުރުވުމާއި، ސްޓްރެސް އާއި ހާސްކަން އިތުރުވުމާއި، ގަވާއިދުން ނިދުމުގެ ހަމަތައް ގެއްލެއެވެ. ކަޅު ކޮފީއަކީ މެދުމިނުގައި ބުއިމުން ކެލޮރީ، ފެޓް، އަދި ކޮލެސްޓްރޯލް އެއްކިބާ ވެފައިވާ މޮޅު ބުއިމެކެވެ. 

ދުނިޔޭގެ އެންމެ މަގުބޫލު ނަޓްސްގެ ތެރޭގައި އަލްމަންޑް ހިމެނެއެވެ. އެއީ ވަރަށް ގިނައިން ނިއުޓްރިޝަން އެކުލެވޭ އަދި ސިއްހަތަށް ވަރަށް ފައިދާ ހުރި ފެޓްސާއި އެންޓިއޮކްސިޑެންޓްސް އާއި ވިޓަމިނާއި މިނަރަލްސް އިން މުއްސަނދި ބާވަތެކެވެ. ފިހާރަތަކުން ގަންނަން ލިބެން ހުންނަ އަލްމަންޑް މަދު ރޯކޮންނާއި ހަނާކޮށްގެން ވިއްކައެވެ. ކިރާއި ތެލާއި ބަޓަރާއި ފުށާއި ޕޭސްޓާއި މާޒިޕަން ފަދަ އުފެއްދުންތައް އުފެއްދުމަށް އަލްމަންޑް ބޭނުން ކުރެއެވެ.

އަލްމަންޑުން ލިބޭ ސިއްހީ 9 ފައިދާއެއް ފާހަގަ ކޮށްލެވެއެވެ. އެއިގެ ތެރެއިން އެއްކަމަކީ ގިނަ އަދަދެއްގެ ނިއުޓްރިއެންޓްސް ފޯރުކޮށްދިނުމެވެ. ފާހަގަ ކޮށްލެވޭ ނިއުޓްރިއެންޓް ޕްރޮފައިލެއް އަލްމަންޑްގެ އޮވެއެވެ.

1 އައުންސް ނުވަތަ 28 ގްރާމްގެ އަލްމަންޑްގައި އަންނަނިވި މިންވަރަށް ފައިދާ ހުރި މާއްދާތައް ހިމެނޭކަމަށް އިތުބާރުހުރި ފަރާތްތަކުން ކަށަވަރު ކޮށްދެއެވެ. އެ ގޮތުން މިދެންނެވި މިންވަރުގެ އަލްމަންޑުގައި:

ފައިބަރު: 3.5 ގްރާމް، ޕްރޮޓީން: 6 ގްރާމް، ފެޓް: 14 ގްރާމް ހިމެނެއެވެ. އޭގެ ތެރެއިން 9 ގްރާމް ފެޓުން ލިބެނީ މަންފާއެވެ.

އެ މިންވަރުގެެ އަލްމަންޑް ބޭނުން ކުރާނަމަ ވިޓަމިން އީ ދުވާލަކު ލިބޭ މިންވަރަކީ %48 އެވެ. މެންގަނީޒް ގެ ދުވަހީ މިންވަރަކީ %27 އެވެ. މެގްނީޒިއަމްގެ ދުވަހީ މިންވަރަކީ %18 އެވެ. ރަނގަޅު މިންވަރަކަށް ކޮޕަރ އާއި ވިޓަމިން ބީ2 އާއި ފޮސްފަރަސް ވެސް އެކުލެވިގެންވެއެވެ. މި ހުރިހާ ފައިދާއެއް ލިބެނީ އަތް ގޮއްޓެއްހާ އަލްމަންޑުންނެވެ. އޭގައި 164 ކެލޮރީ އާއި 6 ގްރާމް ކާބޯހައިޑްރޭޓް ހިމެނޭއިރު 3.5 ގްރާމް ފައިބަރު ވެސް ހިމެނެއެވެ. ފާހަގަ ކޮށްލަންޖެހޭ މުހިންމު ކަމަކީ އަލްމަންޑުގައި ހުންނަ ސަރުބީގެ %6 ވަރުން ގެއްލުމެއް ނުލިބެނީ ސަރުބީ ހަޖަމުކުރާ އެންޒައިމްތަކަށް އޭގެން ބާރު ނުފޯރާކަމެވެ. 

އަލްމަންޑުގައި ފައިޓިކް އެސިޑްއަކީ ގިނައިން ހުރުމުން އަލްމަންޑަކީ ގެއްލުންދޭ ވަކި މާއްދާތަކެއް ހިފެހެއްޓި ހަށިގަނޑަށް ގެއްލުން ދިނުން ހުއްޓުވާ މާއްދާއެކެވެ. އާންމުކޮށް ފައިޓިކް އެސިޑަކީ ސިއްހަތަށް ފައިދާހުރި އެންޓިއޮކްސިޑެންޓެއްގެ ގޮތުގައި ބެލެވެއެވެ. ހަށިގަނޑުން ގެއްލޭ ދަގަނޑާއި ޒިންކް އަދި ކެލްސިއަމްގެ މިންވަރު ވެސް އަލްމަންޑުން ދަށްކޮށްދެއެވެ.

ފާގަ އަކީ ހޫނު ސަރަޙައްދުތަކުގައި ފެންނަ ވެލެކެވެ. ފާގައަކީ ކިއުކަންބާއާއި ތޮރާއާއި ޗިޗަންޑާއާއި ކެކުރިއާއި ފަދަ ވެޔޮތަކާ ވަރަށް ގާތް ގުޅުމެއް އޮންނަ ވެލެކެވެ. ފާގައަކީ އޭޝިއާގެ ކެއުމުގައި އާންމުކޮށް ބޭނުންކުރާ އެއްޗެކެވެ. ފާގައަކީ ނިއުޓްރިއެންޓްސްތަކާއި ވަރުގަދަ އެންޓިއޮކްސިޑެންޓްތަކުން ފުރިފައިވާ އެއްޗެކެވެ.

ދިރާސާތަކުން ދައްކާގޮތުގައި ފާގައިން ލޭގައި ހުންނަ ހަކުރުގެ މިންވަރު ދަށްކޮށްދެއެވެ. އިންސިއުލިން އުފެއްދުމަށް އެހީތެރިވެދެއެވެ. އިންސިއުލިންއަކީ ލޭގައި ހުންނަ ހަކުރުގެ މިންވަރު ހަމަޖެހޭ މިންވަރެއްގައި ބެހެއްޓުމަށް ޒިންމާވާ ހޯމޯނެވެ.

ލޭގައި ހުންނަ ހަކުރުގެ މިންވަރު ބެލެހެއްޓުމަށް އިންސިއުލިން ބޭނުންކުރާނަމަ ފާގަ ދުވަހުން ދުވަހަށް ކެއުމަށް އިތުރުކުރުމުގެ ކުރިން ސިއްހީ ފަރުވާދޭ ފަރާތަކާ މަޝްވަރާކުރުން މުހިންމެވެ. އެއީ ލޭގައި ހުންނަ ހަކުރުގެ މިންވަރު ނުރައްކާތެރި ވަރަށް ދަށްވެދާނެތީއެވެ.

ޖަނަވާރުން ބޭނުންކޮށްގެން ކުރެވިފައިވާ ދިރާސާތަކުން ދައްކާގޮތުގައި ފާގައިން ޓްރައިގްލިސެރައިޑް އާއި އެލްޑީއެލް (ނުބައި) ކޮލެސްޓްރޯލްގެ މިންވަރު ދަށްކޮށް ދީފާނެއެވެ. ނަމަވެސް މިކަން ޔަގީން ކުރުމަށް އިންސާނުންނަށް ދިރާސާތައް ކުރަން ޖެހެއެވެ.

ކާފޫރުތޮޅި

ކާފޫރުތޮޅިއަކީ " ހަވާދުގެ ރާނީ" ގެ ގޮތުގައި ވެސް ބުނެވޭ އެއްޗެކެވެ. ކާފޫރުތޮޅިއަކީ ޒަމާންވީ އާޔުރުވޭދާގެ ބޭސްވެރިކަމުގައި ބޭނުންކުރަމުން އައި އެއްޗެކެވެ.

ދިރާސާތަކުން ދައްކާގޮތުގައި ކާފޫރުތޮޅި ފުށުން ލޭގެ ޕްރެޝަރު މަތިވެފައިވާ މީހުންގެ ޑަޔަސްޓޮލިކް ބްލަޑް ޕްރެޝަރު ދަށްކުރުމަށް އެހީތެރިވެދޭކަމަށް ބެލެވެއެވެ.

ދިރާސާތަކުން ދައްކާ ގޮތުގައި ކާފޫރުތޮޅިފުށުން ޑަޔަސްޓޯލިކް ލޭގެ ޕްރެޝަރު މަތިވެފައިވާ މީހުންގެ ޕްރެޝަރު ދަށްކުރުމަށް އެހީތެރިވެދާނެ ކަމަށް އިތުބާރުހުރި 85 ފަރާތަކުން ކަށަވަރުކޮށްދެއެވެ.

ފަހަކަށްއައިސް ކުރެވުނު އެއް ދިރާސާއަކުން ދައްކާ ގޮތުގައި ކާފޫރުތޮޅިން މާބަނޑު އަންހެނުންގެ ބަޑުގައި އުފެދޭ މައްސަލަތައް ކުޑަކުރުމަށް އެހީތެރިވެދެއެވެ.

މީގެ އިތުރުން ޓެސްޓް-ޓިއުބް އަދި ޖަނަވާރު ބޭނުންކޮށްގެން ކުރީން  ކުރެވުނު ދިރާސާތަކުން ދައްކާ ގޮތުގައި ހެލިކޮބެކްޓަރ ޕައިލޯރީ ބެކްޓީރިއާއިން ރައްކާތެރިވުމަށް އެހީތެރިވެދޭ ކަމަށް ދައްކައެވެ. މިއީ ބަނޑުގައި އުފެދޭ އަލްސަރގެ އާންމު ސަބަބެކެވެ. އަލްސަރގެ ސައިޒު މަދުވެގެން %50 އަށް ކުޑަކޮށްދޭ ކަމަށް ނުވަތަ އެއްކޮށް ނައްތާލާ ކަމަށްވެސް ދައްކައެވެ.

ނަމަވެސް، މި ކަންކަމާ ގުޅޭގޮތުން ބޮޑު ނިންމުމެއް ނިންމުމުގެ ކުރިން އިންސާނުންގެ މައްޗަށް މިކަމާގުޅޭ އިތުރު ދިރާސާތައް ކުރަން ޖެހެއެވެ.

ހޮންކް ކޮންގްގެ ފުޑް ރެގިއުލޭޓަރީ އޮތޯރިޓީ ސެންޓަރ ފޯ ފުޑް ސެކިއުރިޓީން ޝާއިއުކުރި ރިޕޯޓެއްގައި ކެންސަރަށް މަގުފަހިވާ ކެމިކަލް ހުންނަ 3 ބްރޭންޑެއްގެ ހަވާދު އިންޑިއާގައި އުފައްދާކަމަށް ބުނެފައިވެއެވެ. ބްރޭންޑްތަކުގެ ވާހަކަ ދައްކާފައިވެއެވެ. އިންޑިޔާގެ އެ ތިން ބްރޭންޑްގެ ހަވާދުން ވެސް ފެނިފައިވަނީ އެތިލީން އޮކްސައިޑް ކަމަށް ރިޕޯޓްތައް ބުނެއެވެ.

ކެމިކަލް ބޭނުން ކުރުމަށް ހުއްދަކުރެވިފައިވާ މިންގަނޑާއި ހިލާފު ވެފައިވާ ކަމަށް ވަނީ އެމްޑީއެޗް ކުންފުންޏާއި އެވަރެސްޓް ކުންފުނިންނެވެ. އެ ކުންފުނި ތަކުން އެ ތުހުމަތުތަކަށް އަދި ރައްދެއް ދީފައިނުވެއެވެ.

ހޮންކޮންގުގެ ފުޑް ރެގިއުލޭޓަރީ އޮތޯރިޓީން ބުނާގޮތުގައި އެމްޑީއެޗްގެ އުފެއްދުންތަކެއް ކަމުގައިވާ "މަދްރަސާ ކަރީ ޕައުޑަރ" އާއި "މިކްސްޑް މަސާލާ ޕައުޑަރ" އާއި  "ކަރީ ޕައުޑަރ މިކްސްޑް މަސާލާ ޕައުޑަރ" ގައި އެތިލީން އޮކްސައިޑް ހުރެއެވެ. ހަމައެހެންމެ އެވަރެސްޓްގެ "ފިޝް ކަރީ މަސާލާ" އިން އެތިލިން އޮކްސައިޑްގެ އަސަރު ފެނިފައިވާކަމަށް ވެއެވެ. 

ޑްރެގަން ފްރުޓަކީ ވިޓަމިން ސީ އަދި އީ ހަށިގަނޑަށް ފޯރުކޮށްދޭ ރަނގަޅު މަސްދަރެކެވެ. މިއީ ހާސްވެ ކަންބޮޑުވުމާއި ދެކޮޅަށް މަސައްކަތްކޮށް، އަވިން ފިހިފައިވާ ތަންތަނަށް ފަރުވާ ދިނުމަށާއި، ދުޅަވުން ހުއްޓުވުމާއި، ހަންގަނޑު ތެތްކޮށް ބެހެއްޓުމަށް އެހީތެރިވެދޭ މޭވާއެކެވެ.

ހަމައެއާއެކު، ޑްރެގަން ފްރުޓް ކެއުމަކީ ކޮލެސްޓްރޯލް ލެވެލް، ލޭގައި ގްލޫކޯޒް ލެވެލް، އަދި ލޭމައްޗަށް ދިއުން ދަށްކޮށް ދިނުމަށް އެހީތެރިވެދޭ ކަމެކެވެ. މިއީ ގައިގެ ހަންގަނޑަށްވެސް އެ މޭވާ އެއްގެ ސަބަބުން ގިނަގުނަ ފައިދާތަކެއް ލިއްބައިދޭ މޭވާ އެކެވެ.

ހަންގަނޑަށް ޑްރެގަން ފްރުޓް ބޭނުން ކުރެވިދާނެ ގޮތްތައް:

ޑްރެގަން ފްރުޓްގެ ސަބަބުން ހަންގަނޑަށް ލިބޭ ފައިދާތައް ނުހަނު ގިނައެވެ. ކަންމިހެން އޮތްއިރު، އަވަސް ނަތީޖާ ހޯދުމަށް ގަވާއިދުން ޑްރެގަން ފްރުޓް ކެއުމަށް ނުވަތަ މޫނުގައި  އުނގުޅުމަށް ސަމާލުކަން ދިނުމަކީ މުހިންމު ކަމެކެވެ. އެގޮތުން،ޑްރެގަންފްރުޓް ބޭނުންކޮށްގެން ހަމަށް ދިމާވާ އެކި މައްސަލަތަކަށް އަމާޒުކޮށްގެން ތަފާތު ފޭސް ޕެކްތައް ހަދާލެވޭނީ އަންނަނިވި ގޮތްތަކަށެވެ.

1. މޫނުގައި ބިހިނެގުމަށް:

ޑްރެގަން ފްރުޓް އަކީ ވިޓަމިން ސީ، ޒިންކް، އަދި ނިއަސިނަމައިޑް މުއްސަނދި މޭވާ އަކަށްވީއިރު، މިއީ މޫނުގައި ބިހިނެގުން މަދުކޮށްދިނުމަށް އެހީތެރިވެދޭ މައުދަންތަކެވެ. މިކަމަށްޓަކައި:

• ޑްރެގަން ފްރުޓްގެ ދެތިން އެތިކޮޅު ނަގައި ހިމުން ޕޭސްޓަކަށް ހަދާލާށެވެ.
• ދެން ކުޑަ ކަފަ ބޯޅައެއް ނަގާ ނުވަތަ އިނގިލިތައް ބޭނުންކޮށްގެން މޫނުގައި ބިހި ހުރި ތަންތަނުގައި އުނގުޅާލާށެވެ.
• ގަޑިއެއްހާއިރު ބެހެއްޓުމަށްފަހު ދޮވެލާށެވެ.
• ހަންގަނޑުގައި  ރަނގަޅަށް ރިއެކްޓް ކުރާނަމަ އެއްރޭ ވަންދެން ވެސް ދޫކޮށްލެވިދާނެ އެވެ.

2. އޮމާން ހަންގަނޑަކަށް:

ޑްރެގަން ފްރުޓްގައި ހިމެނޭ ވަރުގަދަ އެންޓިއޮކްސިޑެންޓްތަކާއި މިނަރަލްސްގެ ސަބަބުން ފަނޑު އަދި ދިރުން ގެއްލިފައިވާ  ހަންގަނޑަށް ތާޒާކަމާއި އުޖާލާކަން ލިބި، އަވިން ފިހިފައިވާ ތަންތަން ވެސް ލުއިކޮށްދެ އެވެ. މި  ފޭސް މާސްކް ހެދުމަށް:

• ކަނޑާފައިވާ ޑްރެގަން ފްރޫޓްގެ 1/4 ތަށި ނަގައި ހިމުން ކޮށްލާށެވެ.
• ދެން ވިޓަމިން އީ އަދި/ނުވަތަ ކޮންމެވެސް ވަރަކަށް އެލޯ ވެރާ ޖެލް އެޅުމަށްފަހު އެއްކޮށްލާށެވެ.
• އެއަށްފަހު، މި ޕޭސްޓް މޫނުގައި 15 މިނެޓު އުނގުޅާފައި ބެހެއްޓުމަށްފަހު  ފިނިފެނުން ދޮވެލާށެވެ.

މިއީ ހައްތަހާވެސް ޑްރެގަން ފްރުޓްގެ ސަބަބުން ލިބޭނެ ފައިދާތަކެވެ. އެހެންނަމަވެސް، ޑްރެގަން ފްރުޓް ބޭނުންކުރުމުގެ ކުރިން އެއީ ތިމާ އާއި ގުޅޭ މޭވާއެއްތޯ ބެލުމަށާއި އެލާޖިކް ރިއެކްޟަނަކުން ސަލާމަތްތެރިކަން ހޯދުމަށް  ޕެޗް ޓެސްޓެއް ހަދާލުމަކީ ބުއްދިވެރިކަމެކެވެ.

ކަދުރުގެ ވައްތަރުތައް: 

ދުނިޔޭގައި ސިލްކް އުފެއްދުމާއި ވިޔަފާރީގައި މީގެ އެތައް އަހަރުތަކެއް ކުރިން ފާހަގަ ކުރެވޭ ޗައިނާ މީހުން ވިޔަފާރިކޮށް ދަތުރު ނިންމާލާފައި އަންނީ ކަދުރު ހިފައިގެންނެވެ. ޒަމާނަކީ ބާޓާ ސިސްޓަމަށް ވިޔަފާރި ހިންގަމުން އައި ޒަމާންކަމުން ސިލްކަށް ކަދުރު ބަދަލުކޮށް ޗައިނާއަށް ގެނެސް އުޅުނެވެ. އަދި މެދުއިރުމައްޗައް ދުނިޔޭގެ އެކި ކަންކޮޅުތަކުންދާ ގިނަ ބަޔަކު އެންމެ ކުރިން ފަށައިގެންވެސް ރަމްޒީ އެއްޗެއްގެ ގޮތުގައި ކަދުރު ގެންނަކަން ވަނީ ފާހަގަ ކުރެވިފައެވެ. ދަތުރުގެ ހަދިޔާއެއްގެ ގޮތުގައި ގައުމުގައި ތިބޭ އާއިލާއަށް ގިނަ ބަޔަކު ކަދުރުގެނެއެވެ.

ކަދުރު އާންމުކޮށް ހައްދަނީ އަރަބި ދުނިޔޭގައެވެ. ދުނިޔޭގައި ކަދުރު ހައްދާ ގައުމުތަކަކީ ސައުދީ އަރަބިއްޔާއާއި އީރާނާއި އިރާގާއި މިސްރެވެ. އަދި މީގެ އިތުރަށް ޔޫރަޕްގައި އިސްލާމީ ދައުލަތް ފެތުރިފައި ކުރިން އޮތް ދެ ގައުމު ކަމަށްވާ އިޓަލީއާއި ސްޕެއިނާއި އެމެރިކާގައެވެ. އެމެރިކާގެ ކޮންޓިނެންޓްގައި އެމެރިކާގެ އިތުރަށް މެކްސިކޯ ފަދަ ގައުމުތަކުގައި ވެސް ކަދުރު ހައްދާ އުޅެއެވެ. މެކްސިކޯއަށް ކަދުރު ތައާރަފް ކޮށްފައިވަނީ  ޕޯރޗުގީޒުންނެވެ. ދުނިޔޭގެ ގިނަ ގައުމުތަކަށް ކަދުރުގެ މުޑުވައް ގެންގޮސްފައިވަނީ ސައުދީ އަރަބިއްޔާއިންނެވެ. ސްޕެއިންގެ އަންދަލްސަށް ކަދުރު ތައާރްފް ކޮށްފައިވަނީ ހަލީފާ އަބްދުއްރަޙްމާންއެވެ. ޕާކިސްތާނަށް ކަދުރު ގެނެސްފައިވަނީ އެލެކްސެންޑާރ ދަ ގްރޭޓް އޭސިއާގައި މަސައްކަތް ކުރެއްވި ދުވަސްވަރުއެވެ. ދުނިޔޭގެ ގިނަ ގައުމުތަކެއްގައި ކަދުރު ހެދޭކަން ވަނީ ފާހަގަ ކުރެވިފައެވެ. 

ސަލާމްލެއްވި އިސާގެ ފާނުގެ މައިކަނބަލުން އީސާގެ ފާނާއިގެން ރައްކައުވެ ވަޑައިގަތުމަށް ބަނޑުގައި ރިހުމުގެ ވޭންވަރު އަޅަންފެށި ހިނދު އެކަމަނާއަށް ވަހީ ބަސްފުޅު އިއްވިއެވެ. މި ހާދިސާގެ ވާހަކަ ހިމެނެނީ މަރުޔަމް ސޫރަތުގައެވެ. މިގޮތުން އެ ސޫރަތުގެ 25 ވަނަ އާޔަތުގައި މާނާގައިވަނީ " ވީއިރު، ތިޔަ ކަދުރު ރުކުގައި ހިފާފައި، ކަމަނާއާއި ދިމާއަށް ހަލުވައިލާ ހުށިކަމެވެ! އެއިރުން، ދޮންވެ ފައްކާވެފައި އެހުރި ކަދުރުތައް ކަމަނާގެ ކައިރިއަށް އެޅޭނެއެވެ." ދެން ހަމަ އެޔާޖެހިގެން 26 ވަނަ އާޔަތުގެ މާނަގައި ވަނީ “ ދެން އެކަދުރުކައި، ތިޔައޮތް ފެންއާރުން ފެންބޮއި ހިތްހަމަޖައްސާހުށި ކަމެވެ.! ދެން، ކަމަނާއަށް މީހަކު ފެނިއްޖިނަމަ ބުނާށެވެ: ހަމަކަށަވަރުން، އަހަރުރެން މިއިނީ، ރަޙްމާންވަންތަ މާތްރަސްކަލާންގެ ކިބައަށް ރޯދަހިފުމަށް ނަދުރުގަނެގެންނެވެ.! ވީމައި އަދު، އަހުރެން، އެއްވެސް މީހަކާއި ވާހަކަދަށްކައި އުޅޭކަށް ނެތީމެވެ".

ސައިންސް ވެސް ސާބިތު ކޮށްދޭގޮތުގައި ކަދުރަކީ މާބަނޑު މީހުންނަށް ފައިދާހުރި ރަނގަޅު މޭވާއެކެވެ. ކަދުރަކީ މާބަނޑު މީހުން ކެއުމަށް ނުހަނު ރަނގަޅު ފައިދާހުރި މެވާއަކަށް ވަނީ ކީއްވެތޯއެވެ؟ ކަދުރަކީ ވިހެއުމުގައި ދިމާވާ ދަތިތަކުން ސަލާމަތްކޮށްދީ ލޭ ހިނގުމާއި އަދި ބަނޑުގައި އޮންނަ ކުޑަ ދަރިފުޅުގެ ހެދި ބޮޑުވުމަށް ބޭނުންވާ ގިނަ މާއްދާތަކެއް އެކުލެވޭ މޭވާއެކެވެ. ކަދުރަކީ  ރަހިމުގެ މަސްތަކުގެ ބާރުގަދަކޮށްދޭ މޭވާއެކެވެ.

ކަދުރަކީ އިންސާނާގެ ހަށިގަނޑަށް ހާއްސަކޮށް ކުޑަކުދިންނަށް ފައިދާހުރި ކާނާއެކެވެ. ކުޑަކުދިންގެ ބަނޑު އަދި ގޮހޮރުގެ މައްސަލަތައް ރަނގަޅުކޮށްދީ ފަސޭހަކަމާއި އެކު ކާތަކެތި ހަޖަމްކުރުމަށް އެހީއަކަށްވެދެއެވެ. ކުޑަކުދިންނަށް ދިމާވާ ބޭރަށް ހިންގުމާއި ބަނޑު ހަރުވުންފަދަ ބަލިތަކަށް ހާއްސަ ފަރުވާއެއްގެ ގޮތުގައިވެސް ކަދުރު ބޭނުން ކުރެވެއެވެ. މިގޮތުން ކަދުރު ޖޫސް ކިރާ އެއްކޮށްގެން ނުވަތަ މާމުޔާއި އެއްކޮށްގެން ބޭނުން ކުރެވިދާނެއެވެ. 

ކަދުރަކީ ފަލަބަލި ނުވަތަ އޮބޭސިޓީއަށްވެސް ފަރުވާއެއްގެ ގޮތުގައި ބޭނުން ކުރެވޭނެ ފައިދާހުރި މެވާއެކެވެ. އާންމުކޮށް އޮބޭސިޓީ ބަލި މީހުން އިތުރަށް ބަލި ބޮޑުވެގެން ދަނީ މި ބަލީގެ ސަބަބުން އާދަޔާ ހިލާފަށް ކާހިތްވުމާއި ބަނޑުހައިކަން އިހްސާސްވުމުމުގެ ސަބަބުން ކެއުމުގައި ކޮންޓްރޯލުން ނެއްޓި އަދި މީހާ ކަންނެތްވެ ހަރަކާތްތެރިވުން ކުޑަވުމުންނެވެ. ކަދުރުގެ ސަބަބުން ހަށިގަނޑުގައި ހަކުރުގެ ބައި ކޮންޓްރޯލްވެ އަދި ބަނޑުހައިކަން ކުޑަކޮށްދެއެވެ. ހަށިގަނޑުގައި ބާރުޖެހި ލޭ ހިނގުން އަވަސްވެދެއެވެ. މި ބަލި ހުންނަ ފަރާތްތަކުން ހާއްސަ ސަމާލުކަމެއް ދީގެން ކަދުރު ކެއުމުން ހަށިގަނޑުގައި ސަރުބީ ވިރުވައިދީ ހީވާގިކަންގެނެސްދީ މި ބައްޔަށް ލުއިކަން ލިބެއެވެ.

ކަދުރަކީ ހަށިގަނޑު ވިހަ މާއްދާތަކުން ސަލާމަތްކޮށް ރަށްކާތެރިކޮށްދޭ މޭވާއެކެވެ. އަދި ހަމަ އެހެންމެ ކަދުރު ޖޫހަކީ އެކި ވައްތަރުގެ ހުމުގެ ބަލިތަކާއި ރޯގާތަކަށް ވެސް ރަނގަޅު ފަރުވާއެކެވެ. ކަދުރަކީ ޖިންސީ ދުޅަހެޔޮކަން ވެސް އިތުރުކޮށްދޭ މޭވާއެކެވެ. އަދި ކަދުރު ކެއެއުމުން ނުވަތަ މާމުޔާ ކިރު ކަދުރު ޖޫހާއި އެއްކޮށްގެން ބުއިމުން ހަށިގަނޑު ބާރު ގަދަކޮށްދެއެވެ.

ސަހީހުލް ބުހާރީގައި އަދި މުސްލިމްގައި ބަޔާންވެފައިވާ ރަސޫލާގެ ހަދީސް ބަސްފުޅެއްގައިވާ ގޮތުން ހެނދުނު އަޖުވާ ކަދުރުގެ 7 ކަދުރު ކައިފި މީހަކަށް އެދުވަހު ވިހައިގެ އަސަރެއް އަދި ސިހުރުގެ އަސަރެއް ނުކުރާނެއެވެ. މީގެ 1400 އަހަރުކުރިން ރަސޫލާ ވިދާޅުވި ބަސްފުޅު މިއަދުގެ ސައިންސް ވަނީ އިތުރަށް ސާބޮތުކޮށްދީފައެވެ. 7 ކަދުރަކީ ގާތްގަނޑަކަށް 70 ގުރާމެވެ. އޭގެން 70 މިލިގްރާމަކީ އިންސާނާގެ ހަށިގަނޑުގެ ނާރުތަކާއި ހުޅުތަކާއި ކަށިގަނޑަށް ބޭނުންވާ ކެލްސިއަމްއެވެ. އަދި 35 މިލިގްރާމް އަކީ ސިކުނޑިއަށް ބޭނުންވާ ކާނާގެ ތެރޭގައިހިމެނޭ ޕޮސްޕަރަސްއެވެ. ހަށިގަނޑަށް ބޭނުންވާ ވިޓަމިންސް، ލޮނު، މިނަރަލްސްގެ ބައި ލިބެއެވެ.

ކަދުރުގައި ހަށިގަނޑަށް ބޭނުންވާ ހުރިހާ ބައެއް ހިމެނޭއިރު އޭގެތެރޭގައި އެންމެ މަތީ މިންވަރަކަށް ހިމެނެނީ ކާބޯހައިޑްރޭޓްސް އެވެ. އެއީ ހަށިގަނޑު ވަރުގަދަވެ ބާރު ޖެހުމަށް ބޭނުންވާ ބާވަތެވެ. ކަދުރުން ލިބޭ ކާބޯހައިޑްރޭޓްސްގެ މިންވަރަކީ 88ޕަސެންޓެވެ. އަދި %5.6-2.3  ޕުރޮޓީންސް ހިމެނެއެވެ. ޕްރޮޓީންސް އަކީ ހަށިގަނޑު ހެދިބޮޑުވުމަށް ބޭނުންވާބައެވެ. އަދި ހަށިގަނޑަށް ބޭނުންވާ ޑައިޓްރީ ފައިބަރޔާއި ވިޓަމިންސް %11.5-6.4 ހިމެނެއެވެ. އަދި %5-5.2  ގެ ފެޓް ހިމެނެއެވެ. އަދި މީގެ އިތުރަށް %5-0.2 ތެޔޮހިމެނެއެވެ.

ކަދުރަކީ ވިޓަމިން އޭ، ބީ ވަން، އަދި ފުލުއޮރިން ހިމެނޭ މޭވާއެކެވެ. އަދި މީގެ އިތުރަށް ހަށިގަނޑަށް ބޭނުންވާ މިނަރަލްސްގެ ބާވަތްތައް ހިމެނެއެވެ. އޭގެ ތެރޭގައި ކެލްސިއަމް، ކޯބަލްޓް، ދަގަނޑު، މެގްނީޒިއަމް، ޕޮޓޭސިއަމް، ޕޯސްފަރަސް، ސޯޑިއަމް، ޒިންކްއެވެ. އަދި އެލްމީނިއަމް، ކްލޯރައިޑް، ލެޑް އާއި ސަލްފަރ، ސެލީނިއަމްވެސް ހިމެނެއެވެ. މި މާއްދަތަކީ ދިފާއީ ނިޒާމް ވަރުގަދަކޮށްދީ ކެންސަރުން ސަލާމަތްވުމަށް އެހީތެރިވެދޭ ބައިތަކެކެވެ.

ކަދުރަކީ ހަށިގަނޑަށް ބޭނުންވާ ޑައެޓަރީ ފައިބަރ ހިމެނޭ މޭވާއެކެވެ. ކަދުރުގައި ފެނަށްގިރޭ ވައްތަރުގެ ފައިބަރާއި، ފެނަށް ނުގިރޭ ވައްތަރުގެ ފައިބަރު ވެސް ހިމެނެއެވެ. އަދި ކަދުރަކީ ހަށިގަނޑަށް ބޭނުންވާ ހަކަތަ އަވަސްކަމާއެކު ލިއްބައިދެނިވި އެންމެ ރަނގަޅު ކާނާގެ ބާވަތެވެ. ޕޮޓޭސިއަމްވެސް އެންމެ ގިނައިން އެކުލެވިގެންވާ އެއްބާވަތަކީ ކަދުރެވެ. ކަދުރަކީ ބަނޑުހަރުވުމުން ދުރުކޮށްދޭ ކާނާގެ ބާވަތްތަކުގެ ތެރެއިން ބާވަތެކެވެ. ނަމަވެސް އޭގެ ފައިދާ އެންމެ ރަނގަޅު ގޮތުގައި ލިބިގަތުމަށްޓަކައި ބަނޑުހަރުވެފައިވާ މީހާ ކަދުރު ބޭނުންކުރަން ޖެހޭނީ އެއްރޭ ވަންދެން ފެނުގައި ލުމަށްފަހު އެފެނާ އެކުގައެވެ..

ގަވާޢިދުން ކަދުރު ބޭނުންކުރާނަމަ، ގޮހޮރުގެ މައްސަލަތައް މެދުވެރިން ކުޑަކޮށް ދެއެވެ. ކަދުރަކީ ބޭރަށް ހިންގުމަށް ވެސް ހުރި ފަރުވާއެކެވެ. ސަބަބަކީ ކަދުރުގައި ހުންނަ ޕޮޓޭސިއަމްއަކީ ބޭރަށްހިންގުން ކޮންޓްރޯލް ކުރުމުގައި އެހީތެރިވެދޭ މާއްދާއަކަށްވާތީއެވެ.

ކަދުރަކީ ބައެއް ވައްތަރުގެ ކެންސަރުން އިންސާނާ ސަލާމަތްކޮށްދޭ އެއްޗެކެވެ. ކަދުރުގައި އެންޓި އޮކްސިޑެންޓް އެކުލެވިގެން ވުމަކީ ފްރީ ރެޑިކަލްތަކުން ހަށިގަނޑުގެ ސެލްތައް މިންޖުކޮށްދީ، ކެންސަރުން ރައްކާތެރިކޮށްދޭ ކަމެކެވެ. ކަދުރުގައި ވިޓަމިން އޭ ގިނަ މިންވަރަކަށް ހުރެއެވެ. ވިޓަމިން އޭ ގިނައިން ހުންނަ ކާނާ ބޭނުންކުރުމަކީ އަނގަޔާއި، ފުއްޕާމޭގެ ކެންސަރުން ރައްކާތެރިކޮށްދޭނެ ކަމެކެވެ.

ކަދުރަކީ ހިތުގެ ބަލިތަކުން ވެސް މީހާ ސަލާމަތް ކޮށްދޭ މޭވާއެކެވެ. އެހެނީ އެއީ ސޯޑިއަމް މަދު ޕޮޓޭސިއަމް ގިނަ މޭވާ އެކެވެ. އެހެންކަމުން، މިއީ ހިތާއި ލޭހޮޅިތަކުގެ ނިޒާމްގެ މަސައްކަތް ރަގަޅުކޮށްދީ، އަދި ނާރުތަކުގެ ނިޒާމްގެ މަސައްކަތް ރަގަޅުކޮށްދޭ މޭވާއެކެވެ. ކަދުރުގައި އަޔަން އެކުލެވިފައިވުމުން ހަށިގަނޑުގެ ލޭ އިތުރުވެއެވެ. ކަދުރަކީ އެއްވެސް މިންވަރަކަށް ކޮލެސްޓްރޯލް ހިމެނޭ މޭވާއެއްނޫނެވެ.

މާބަނޑު އަންހެނުން ކަދުރު ބޭނުންކުރުމަކީ ރަހިމުގެ މަސްތަކުގެ ބާރުގަދަކޮށްދޭ ކަމެކެވެ. މީގެ އިތުރުން ކަދުރަކީ މާބަނޑު އަންހެނުންނަށް ދިމާވާ ވިހެއުމުގެ ވޭންތައް ކުޑަކޮށްދޭ މޭވާއެއް ވެސް މެއެވެ.

ކަދުރުގައި ވިޓަމިން އޭ އެކުލެވުމަކީ ލޮލުގެ ފެނުމުގެ މައްސަލަ ހުންނަން އެހީތެރިކަން ފޯރުކޮށްދޭ ކަމެކެވެ. ހާއްސަކޮށް ނައިޓް ބްލައިންޑްނެސްގެ މައްސަލަ ހުންނަ މީހުންނަށް ކަދުރު ބޭނުންކުރުމުން އެކަމުގެ އުދަގޫ ކުޑަވެއެވެ.

މިހުރިހާ ފައިދާތައް އެކުލެވިގެންވާ ކަދުރަކީ ހަމައެކަނި ރޯދަމަހު ބޭނުން ކުރަންޖެހޭ މޭވާއެއްކަމަށް ބައެއް މީހުން ދެކެއެވެ. ނަމަވެސް ކަދުރަކީ ރޯދަމަސް ނޫނަސް ކޮންމެ ދުވަހަކު ވެސް ބޭނުންކުރުމަށް އެންމެ ރަގަޅު މޭވާއެވެ

އަހި ނުވަތަ އަހިވަކަކީ ކޮބާ؟

އޭޝިއާ، އޮސްޓްރޭލިއާ އަދި ޕޮލިނީޝިއާގެ ޖަޒީރާތަކަށް ނިސްބަތްވާ އަހިގަހަކީ ތަފާތު ސައިޒުތަކަށް ހެދޭ ގަހެކެވެ. މި ގަހުގެ ހުދު މާތަކަކީ ހޮޅިގަނޑެއް ފަދަ މާތަކެކެވެ. މިގަހުގެ މޭވާކަމުގައިވާ އަހިވަކަކީ ޅައިރު ފެހިކުލައިގައި ހުންނަ އަދި ދޮންވުމުން ދޮންފެހި ކުލަޔެއްގައި ހުންނަ މޭވާއެކެވެ. ހޭވިފައިވާ މޭވާގައި ޗީޒް ފަދަ ސިފައެއް ފާޅުވުމާއެކު ނުބައި ވަހެއް ހުރެއެވެ.

އަހިވަކުގެ ބޭނުމަކީ ކޮބާ؟

ޕޮލިނީޝިއާގެ ޝިފާވެރިން ވަނީ ހަކުރުބަލި، ލޭމައްޗަށް ދިއުން، އާތުރައިޓިސް، ދުޅަވުން، ޓިއުމަރު، މުސްކުޅިވުމުގެ އަސަރު، އަދި ޕެރަސައިޓިކް، ވައިރަލް، އަދި ބެކްޓީރިއަލް އިންފެކްޝަންތައް ފަދަ ސިއްހީ ތަފާތު މައްސަލަތަކަށް ފަރުވާ ދިނުމަށް އެތައް ހާސް އަހަރެއް ވަންދެން އަހިވަށް ބޭނުންކޮށްފައިވެއެވެ. ޤަދީމީ ޝިފާ މެނުސްކްރިޕްޓްތަކުގައި ގުދުރަތީ ޝިފާ ފޯމިއުލޭޝަންތަކުގައި ހިމެނޭ އަސާސީ މާއްދާއެއްގެ ގޮތުގައި މި މޭވާ ފާހަގަކޮށްފައި ވެއެވެ.

އަހިގަހާއި ދިވެހިންނާއި ހުރިގުޅުމަކީ ކޮބާ؟

އަހިގަހަކީ ދިވެހިންގެ ތެރޭގައި ވަރަށް މަގުބޫލް ގަހެކެވެ. އަހިގަހުގެ ފަތާއި މާ އަދި ޅަ އަހިވަކާއި ހަރުވެ ދޮންވެފައިވާ އަހިވަކަކީ މިއަދުވެސް ދިވެހިންނަށް ބޭނުންޖެހިފައިވާ އެއްޗެއް ފަދައެވެ. ޒަމާނުއްސުރެ ދިވެހި ބޭސްވެރިކަމުގެ ތެރޭގައި އަހިވަށް ބޭނުންކުރެވި އޭގެ ނަތީޖާ ދިވެހިން ވަނީ ތަޖުރިބާ ކޮށްފައެވެ. ޚައްޞަކޮށް ދަރިމައިވުމުގެ މައްސަލަތަކަށާއި ވިހައިގެން އުޅޭ ދުވަސް ވަރު މަތިކަރާ ބޭހުގެ ތެރޭގައިވެސް ޅަ އަހިވަކާއި އޭގެ މާ ހިމެނިފައިވެއެވެ. މީގެ އިތުރުން އަހިފަތް ހޫނުކޮށްގެން ބަނޑުގައެޅުމާއި އެނޫންވެސް ތަފާތު ކަންކަމުގައި ބޭނުންކުރެއެވެ. އަދި ދޮންވެފައިވާ އަހިވަށް ކިތަންމެ ނުބައި ކަމުގައި ވިޔަސް ހަށިގަނޑަށް ލިބިދޭ ލުއިކަމުގެ ސަބަބުން ކާލުމަށް ދިވެހިންގެ ގިނަ ބަޔަކު ޝައުގުވެރިވެއެވެ.

އަހިވަށް އެއީ އެންމެނަށްވެސް ކެވިދާނެ އެއްޗެއްތަ؟

އެއްވެސް އެއްޗަކީ އެންމެންނަށް އެންމެ އެކަށިގެންވާ އެއްޗަކަށް ނުވެދާނެއެވެ. އެކިމީހުންގެ ހަށިގަނޑު އުފެދި ގުނަވަންތައް ފުރިހަމަވެފައިވީ ނަމަވެސް ޞިއްހީގޮތުން ތަފާތު ކަންކަމާ ކުރިމަތިލާން ޖެހޭ މީހުން އުޅޭނެއެވެ. ހަށިގަނޑަށް ބޭނުންވާ މައްދާތައް އެންމެ އެކަށިގެންވާ ވަރަށް އުފައްދާ ނުދޭ މީހުންނާއި ހުންނަންވާ ވަރަށްވުރެ އިތުރަށް ބައެއްބައިތައް ގިނަވެފައިވެސް ހުންނަ މީހުން އުޅޭނެއެވެ. އެހެންކަމުން އެކަކު ކާއެއްޗެއް އަދި އަނެކަކަށް ނުކެވުމަކީވެސް ވެދާނެ ކަމެކެވެ. ޚާއްޞަކޮށް ޞިއްހީ މައްސަލަތައް ހުންނަމީހުން ފަރުވާއެއް ލިބޭކަމަށް ބަޔަކު ބުނާ ކޮންމެ އެއްޗެއް ޑޮކްޓަރެއްގެ ލަފައެއްނެތި ބޭނުން ކުރުމަކީ އެންމެ ރަނގަޅު ގޮތެއް ނޫނެވެ. އަހިވަކުގައި ގިނަ އަދަދަކަށް ޕޮޓޭސިއަމް އެކުލެވޭ ކަމަށް ޞިއްހީމާހިރުން ވިދާޅުވެއެވެ. އެހެންކަމަށް ވާނަމަ ކިޑްނީގެ މައްސަލަތަކާއި ފުރަމޭގެ މައްސަލަތައް ހުންނަ މީހުން އަހިވަށް ބޭނުންކުރާނަމަ ޑޮކްޓަރުންގެ ލަފަޔާއި މަޝްވަރާ ހޯދަންވާނެއެވެ.

މާގަނޑުކޮޕީގައި އެތައް ބާވަތެއްގެ އެންޓިއޮކްސިޑެންޓް ހިމެނެއެވެ. އެންޓިއޮކްސިޑެންޓް މާއްދާތަކުގެ ސަބަބުން ކެންސަރުގެ ސެލްތައް ބޮޑުވުން ހުއްޓުވާ އެންޒައިމްތައް ހީވާގިކޮށް ހަރަކާތްތެރި ކުރުވައެވެ. މާގަނޑު ކޮޕީގައި ދުޅަތަކާއި ދެކޮޅަށް މަސައްކަތް ކުރުމުގެ ބާރު ލިބިފައިވާ ވިޓަމިން ކޭ ހުރެއެވެ. ގަވާއިދުން މާގަނޑުކޮޕީ ކެއުމުން ލޭހިގުން ރަގަޅުކޮށްދެއެވެ. ލޭހޮޅިތަކުގެ ތެރޭގައި ސަރުބީ ޖަމާވުމަށް ހުރަސްއަޅައެވެ. ނަތީޖާއެއްގެ ގޮތުން ލޭހޮޅިތައް ހަރުވުމުން ދުރުކޮށް ހިތުގެ ދުޅަހެޔޮކަން އިތުރުކޮށްދެއެވެ.

މާގަނޑު ކޮޕީގައި ހިމެނޭ އިންޑޯލްސް ގެ ސަބަބުން ސަރުބީގެ މިންވަރު އެއްވަރެއްގައި ހިފަހައްޓައިދީ، ހިތުގެ ދުޅަހެޔޮކަމާއި ރައްކާތެރިކަން ދެމެހެއްޓުމަށް އެހީތެރިކަން ފޯރުކޮށްދެއެވެ. ގަނޑުލޭކޮޅުތައް އުފެއްދުން ހުއްޓުވާ ބާރުގެ ސަބަބުން ހިތުގެ ދުޅަހެޔޮކަމާއި ރައްކާތެރިކަން ދެމެހެއްޓުމަށް އެހީތެރިކަން ފޯރުކޮށްދެއެވެ. މާގަނޑު ކޮޕީގައި އޮމެގާ-3-ފެޓީ އެސިޑް ހުރުމުންވެސް ހިތުގެ ދުޅަހެޔޮކަން ހިފެހެއްޓުމަށް ވާގިވެރިވެއެވެ.

މާގަނޑު ކޮޕީ އަކީ ފައިބަރުގެ ރަގަޅު ބަހާއެކެވެ. ފައިބަރަކީ ހަޖަމު ރަގަޅުކޮށްދީ ވިހަ މާއްދާތައް ބަނޑާއި ގޮހޮރުން ބޭރުކުރުމަށް އެހީތެރިވެދޭ މާއްދާއެކެވެ. މާގަނޑު ކޮޕީގައި ހުންނަ މާއްދާތަކެއް އެހީގައި ބަނޑުގެ ބަތާނަ ފަށުގައި ހެލިކޮބެކްޓަރ ޕައިލޮރި ކިޔާ ޖަރާސީމެއް އަށަގަތުމަށް ހުރަސްއަޅައެވެ. ހަމައެހެންމެ  ބަނޑާއި ގޮހޮރުގެ ކެންސަރު ޖެހުމުގެ ފުރުސަތު ކުޑަކޮށްދެއެވެ.

މާގަނޑު ކޮޕީން ލަގޮނޑިއާއި ވައިނޮޅިއާއި ވައިނޮޅީގެ ކަފި އަދި ފުއްޕާމެޔަށް ޖެހޭ ބައްޔެއް ކަމުގައިވާ "ޕެޕިލޯމާ ވައިރަސް" ޖެހުމުން ދުރުކޮށްދޭ އެއްޗަކަށް މާގަނޑުކޮޕީވެއެވެ. މާގަނޑު ކޮޕީ އާއި އެއާއިލާގެ ތަރުކާރީގެ ބާވަތްތައް ބޭނުން ކުރުމަކީ ރެސްޕިރޭޓަރީ ޕެޕިލޮމެޓޯސިސް ގެ ނުރައްކާތެރިކަން ކުޑަކޮށްދޭނެ ކަމެކެވެ.

މާގަނޑު ކޮޕީގައި އެކުލެވޭ ގުލޫކަސިނޮލޭޓް ބައިބައިވެގެން "އިންޑޯލް-3-ކާރބިނޯލް" އާއި "ސަލްފޮރަފޭން" އުފެދި ކެންސަރުގެ ސެލްތައް ބޮޑުވުން ހުއްޓުވުމަށް އެހީތެރިވެދެއެވެ. މާގަނޑު ކޮޕީ އާއި އެ އާއިލާގެ އެހެން ތަރުކާރީގެ ބާވަތްތައް ބޭނުން ކުރުމަކީ ފުއްޕާމޭގެ ކެންސަރާއި މަސާނާގެ ކެންސަރައި އުރަމަތީގެ ކެންސަރާއި ޕްރޮސްޓޭޓް ކެންސަރާއި ބިސް އުފައްދާ ތަނުގެ ކެންސަރައި ރަހިމުގެ ދޮރަށް ޖެހޭ ކެންސަރު ސަލާމަތްވުމަށް އެހީތެރިވެއެވެ. މާގަނޑު ކޮޕީގައި ވިޓަމިން ސީ ހުރުމުން ހުޅުތަކާއި ކަށިތައް ރައްކާތެރިކޮށް ދޭއިރު ވިޓަމިން ކޭ ހުރުމުން ކަށިތައް ވަރުގަދަވެ ކުރުވައެވެ.

އުމުރުން ދުވަސްވުމުން ލޮލަށް ދިމާވާ "މެކިޔުލަރ ހަލާކުވުން" ފަދަ މައްސަލަތަކުން މިންޖުވުމަށް އެހީތެރިވެދޭ ބާވަތަކަށްވެސް މާގަނޑު ކޮޕީވެއެވެ. ލޮލުގެ އަލިދުލި ހަލާކުވުން ހުއްޓުވައި، ލޯފުސްވުން ފަދަ ކަންކަމުން ރައްކާތެރިވެ ހުރުމަށް އެހީތެރިވެދެއެވެ.

މާގަނޑު ކޮޕީ ބޭނުން ކުރުމަކީ ހަށިގަނޑުން ވިހަ ބޭރުކޮށް ސާފުކުރުމަށް އެހީތެރިވެދޭނެ ކަމެކެވެ. މާގަނޑު ކޮޕީގައި ހުންނަ އެންޒައިމްތައް ހަރަކާތްތެރި ކުރުވައި، އޭގެ މަސައްކަތްތައް ތަންޒީމު ކުރުމުގައި ބައިވެރިވެއެވެ. އިރުގެ ދޯދި ތަކުން ލިބޭ ގެއްލުމުން ހަމުގެ ފަށަލަ ރައްކާތެރި ކުރުމުގައި އެހީތެރިވެދެއެވެ. ހަމުގެ ކެންސަރުން ޖެހުމުގެ ފުރުސަތު ކުޑަކުރުވުމާއި ހަމުގެ ސެލްތައް ހަލާކުވިޔަ ނުދިނުމާއި އިރުގެ ދޯދިން ހަންގަނޑުން ފިހުނަ ނުދިނުން ފަދަ ކަންކަމަށް ކޮލިފްލާވަރ އެހީވެދެއެވެ.

މާގަނޑު ކޮޕީގައި ހިމެނޭ އިންޑޯލް ތަކާއި ސަލްފޮރަފޭން ފަދަ މާއްދާތަކަކީ ނާރުތަކަށް ލިބޭ ގެއްލުން ކުޑަކުރުމަށް ބޭނުންތެރި މާއްދާ ތަކެކެވެ. މި މާއްދާ ތަކަކީ ވިހަބޭރުކުރާ އެންޒައިމްތައް ހަރަކާތްތެރިކޮށް، "ގުލޫޓެތިއޯން"ގެ މިންވަރު މަތިކޮށްގެން ނާރުތަކަށް ލިބޭ އަނިޔާ އަށް ފަރުވާކުރުމަށް އެހީތެރިވެދޭ މާއްދާ ތަކެކެވެ. ތުރުތުރުއަޅާ ބައްޔާއި އަލްޒައިމާ ބަލިޖެހިފައިވާ މީހުންނަށް ކޮލިފްލާވަރގެ ބޭނުން ވަކީން ބޮޑެވެ. ސެލްތަކުގެ ބޭރު ފަށަލަ މަރާމާތު ކުރުމާއި ނާރުތަކުގެ ސެލްތަކުގެ މަސައްކަތަށް ވެސް ބޭނުންތެރިއެވެ.

ޕޮޓޭސިއަމާއި ޕައިރިޑޮކްސިން މާގަނޑުކޮޕީގައި ހުރުމުން ސިކުނޑީގެ މަސައްކަތް ފުރިހަމަކުރުމަށް ވެސް އެހީތެރިވެދެއެވެ. ލޭގެ ޕްރެޝަރު ދަށްކުރުމާއި ސަރުބީ ދަށްކުރުމަކީ މާގަނޑު ކޮޕީގެ ރޯލެކެވެ. ލޭއާއި މުޅި ހަށިގަނޑުގައި ސަރުބީ އެކުލެވޭ މިންވަރު ދަށްކުރުމަށް އެހީތެރިވެދެއެވެ. ލޭގެ ޕްރެޝަރު ދަށްކޮށްދީ ރަގަޅު ކޮލެސްޓްރޯލްގެ މިންވަރު މަތިކުރުމަށް ވެސް އެހީތެރިވެދޭ ބަވަތެކެވެ. ދިފާއީ ބާރުގަދަކޮށް ތަފާތު ބަލިތަކުން ދުރުވެ ހުރުމަށް އެހީތެރިވެދެއެވެ. ހަށިގަނޑު ފަލަވުމާއި ދެކޮޅަށް މަސައްކަތްކުރުމުގެ ބާރު ލިބިފައިވާ މާއްދާ ތަކުގެ ސަބަބުން ހަށިގަނޑުން ސަރުބީ ވިރުވުމަށް ބާރުއަޅައިދީ އާދަޔާ ހިލާފަށް ހަށިގަނޑު ފަލަވެގެން ދިއުމަށް ހުރަސް އަޅައެވެ.

މާގަނޑު ކޮޕީއަކީ މާބަނޑު ދުވަސްވަރު ބޭނުން ކުރަން ވެސް ރަގަޅު ފައިދާހުރި ބާވަތެކެވެ. މާގަނޑު ކޮޕީގައި ގިނަ އަދަދަކަށް ފޮލިކް އެސިޑް ހުންނާތީއެވެ. ފޮލިކް އެސިޑަކީ މާބަނޑު ދުވަސްވަރު ބަނޑުގައި އޮންނަ ތުއްތު ދަރިފުޅުގެ ހަށިގަނޑުގައި އައިބު އުފެދުމުން މިންޖުކޮށްދޭ މާއްދާއެކެވެ.

މާގަނޑު ކޮޕީގައި ޕޮޓޭސިއަމް އަދި ވިޓަމިން ސީ ހުންނާތީ ހަކުރު ބަލި ޖެހުމުގެ ފުރުސަތު ކުޑަކޮށްދެއެވެ. އަނެއްކޮޅުން މާގަނޑު ކޮޕީ ބޭނުން ކުރުމަކީ ސްޓްރޯކް ޖެހުމުގެ ފުރުސަތު ކުޑަކުރާ ކަމެކެވެ.

• އަންނާރަކީ ސްޓްރޯކް ޖެހުމާއި ހާރޓް އެޓޭކް ޖެހުން ފަދަ ހިތާއި ލޭ ހޮޅިތަކާއި ގުޅުން ހުރި ބަލިތައް ޖެހުމުގެ ފުރުސަތު ކުޑަކޮށްދޭ މޭވާއެކެވެ. އަންނާރު ޖޫސް ކޮންމެ ދުވަހަކު ބޭނުންކުރުމަކީ ހަށިގަނޑުގައި ލޭދައުރުވުން ރަގަޅުކުރުމުގައި އެހީތެރިވެދޭ ކަމެކެވެ. އަންނާރުގައި ހިމެނޭ ތަފާތު އެންޓި އޮކްސިޑެންޓުން ލޭހޮޅިތަކުގައި ސަރުބީ ތަތްވުން ހުއްޓުވައި ލޭހޮޅިތައް ބެދުނަނުދީ ހިފަހައްޓައިދެއެވެ. ހިތާއި ލޭހޮޅިތަކާއި ގުޅުންހުރި ބަލިތަކުން ދުރުކޮށްދީ ލޭގައި ނުރަގަޅު ސަރުބީގެ އަދަދު ދަށްކޮށް ރަގަޅު ސަރުބީގެ މިންވަރު އިތުރު ކުރުވައެވެ.
• އަންނާރުގައި ހުންނަ ބާރުގަދަ އެންޓި އޮކްސިޑެންޓް "ފްލޭވޮނޮއިޑް"އަކީ ހަށިގަނޑުގެ ސެލްތަކަށް ލިބޭގެއްލުން ކުޑަކޮށްދޭ މާއްދާ އެކެވެ. އެހެންކަމުން ހަށިގަނޑު ކެންސަރުން ރައްކާތެރިކޮށްދެއެވެ.  
• މައިމީހާ އަންނާރު ޖޫސް ބޭނުން ކުރުމަކީ ތުއްތު ދަރިފުޅުގެ ސިކުނޑިއަށް ލިބޭ އަނިޔާތަކުން ރައްކާތެރިކޮށްދޭ ކަމެކެވެ.
• ކޮންމެ ދުވަހަކު 1.7 އައުންސްގެ އަންނާރު ޖޫސް ބޭނުންކުރުމަކީ ސްޓޮލިކް ޕްރެޝަރ 5 އިންސައްތަ ދަށްވާ ކަމެކެވެ.
• އަންނާރު ބޭނުންކުރުމުން ހަކުރު ބަލި، ހުޅުތައް ދުޅަވުން، އަދި ލޭހޮޅިތައް ހަރުވުން ފަދަ ބަލިތައް ޖެހުމުގެ ފުރުސަތު ކުޑަކޮށްދެއެވެ.
• އަންނާރުގައި އެކުލެވޭ ހާއްސަ ސިފަތަކެއްގެ ސަބަބުން، ލޭހޮޅިތައް ބޯވެ، ހަރުކޮށްލާ ބަލިތަކާއި، ހުޅާއި މަޑުކަށިތައް ހަލާކުކޮށްލާ ބަލިތަކަށް މި މޭވާ ބޭނުންކޮށްގެން ލުއެއް ހޯދެއެވެ.
• އަންނާރު ޖޫސް ބޭނުން ކުރުމަކީ އުރަމަތީގެ ކެންސަރު ޖައްސާ ސެލްތައް ގަނޑެއްގެ ސިފައިގައި އެއްވެ ބޮޑުވުން މަނާކޮށްދޭ ކަމެކެވެ. އެއާއި އެކު އެފަދަ ސެލްތައް ހަލާކުކޮށް ނެތިކޮށްލާ ދެއެވެ.
• އާއްމުކޮށް އަންނާރު ބޭނުންކުރުމުން ފުއްޕާމޭގެ ކެންސަރުގެ ސެލްތައް ބޮޑުވުން ހުއްޓުވައި ޓިއުމަރު ހިންދާލައެވެ. 
• ޕްރޮސްޓޭޓް ކެންސަރުގެ ސެލްތައް އުފެދި ބޮޑުވުން އަންނާރު ބޭނުންކުރުމުން ހުއްޓެއެވެ.
• އަންނާރުގައި ވަރަށް ގިނައިން އަޔަން ހުރެއެވެ. އެހެންކަމުން ލޭމަދުވުމުމާއއި ވަރުބަލިވުމާއި ބޯއެނބުރުމާއި ވަރުދެރަވުން ކުޑަކޮށްދޭ އެއްޗަކަށް އަންނާރުވެއެވެ.
• އަންނާރު ޖޫހަކީ މަޑުކަށި ހަލާކުވުން ހުއްޓުވާ އެއްޗެކެވެ. 
• އަންނާރަކީ ތަފާތު ވިޓަމިނުން މުއްސަދިވެފައިވާ މޭވާ އެކެވެ. އަންނާރުގައި ހިމެނޭ ފާހަގަކޮށްލެވޭ ވިޓަމިންގެ ބާވަތްތަކުގެ ތެރޭގައި، ވިޓަމިން އޭ، ވިޓަމިން ސީ، ވިޓަމިން އީ އަދި ފޮލިކް އެސިޑް ހިމެނެއެވެ.
• އާންމުކޮށް އަންނާރު ބޭނުން ކުރުމަކީ ދަތުގައި މެރައާއި ކޮބަޑި ޖެހުމުގެ ފުރުޞަތު ކުޑަކޮށްދޭނެ ކަމެކެވެ.
• ބޭރަށް ހިންގުން ފަދަ ހާލަތްތަކުގައި ފޮނިތޮށި ކާފޫރު ތޮޅިއާއި އެކު އަންނާރު ކެއުމުން ބޭރަށް ހިންގުން ރަގަޅުކޮށްދެއެވެ.
• ތުއްތު ދަރިފުޅުގެ ބަރުދަން ލުއިވިޔަނުދީ ހިފަހައްޓައެވެ.
• ކަރުތެރެ ހަލާކުވުމުން ދުރުކޮށް ދެއެވެ.
• އެލްޒެއިމާ ބަލި ޖެހުމުގެ ފުރުސަތު ކުޑަކޮށް ދެއެވެ.
• ދިފާއީ ބާރު ވަރުގަދަކޮށްދެއެވެ.
• ވައިރަސްތަކާއި ދެކޮޅަށް މަސައްކަތްކުރުމުގެ ބާރު ލިބިދެއެވެ.
• އަރިދަފުސް ރޯގާޖެހުން ކުޑަކޮށް ދެއެވެ.
• އަޑުކުރަކިވެ، ނުވަތަ އަޑު ގޮސްފައިވާނަމަ އަންނާރު ޖޫސް ބޭނުންކޮށްގެން އަގަދޮވުން ފަރުވާއެއް ކަމުގައި ފުދެއެވެ.
• އަންނާރު މާމުޔާއި އެކު ބޭނުންކުރުމުން ކަންފަތުގައި އުފެދޭ ރިހުން ކުޑަކޮށްދެއެވެ.
• ގުރުދާގެ ބަލިތައް ކުޑަކޮށްދީ ހަޖަމު ރަގަޅުކޮށް، ކާހިތްވުން އިތުރުކޮށްދެއެވެ.
• ލޮލުގެ ފެނުން ސާފުކުރުމުގައި ވެސް އަންނާރު ބޭނުން ކުރުން އެހީއަކަށް ވެއެވެ.
• ބަނޑުގައި ރިހުން ކުރިމަތިވުމުން ކުޑަލޮނު ކޮޅަކާއި އަސޭމިރުސް ކޮޅަކާއި އެކު އަންނާރު ބޭނުންކުރުމުން ރިހުން ފިލައިދެއެވެ.
• ހިރުގަނޑާއި، ދަތުގެ ބަލިތައް ކުޑަކޮށްދިނުމުގައި ވެސް އަންނާރު އެހީތެރިވެދެއެވެ.
• ދުވަސްނުފުރާ ވިހެއުމުގެ ފުރުސަތު ކުޑަކޮށްދެއެވެ.

ކުންނާރުގެ ސިއްހީ ފައިދާ:-

• ވިޓަމިންތަކާއި މައުދަންތައް: ކުންނާރުގައި ވަރަށް ގިނަ މައުދަންތަކާއި ވިޓަމިންތައް ހުރެއެވެ. ކުންނާރުގައި ހުންނަ މައިގަނޑު މައުދަންތަކުގެ ތެރޭގައި، ޕޮޓޭސިއަމް، ފޮސްފަރަސް، މެންގަނީޒް، ސޯޑިއަމް، ޒިންކު، ދަނގަޑު، ކޮޕަރ، އަދި ކެލްސިއަމް ހިމެނެއެވެ. ކުންނާރުގައި ހުންނަ ވިޓަމިން ތަކުގެ ތެރޭގައި، ވިޓަމިން ސީ، ރައިބޯފްލެވިން، އަދި ތިއެމިން ހިމެނެއެވެ. ހުތްމޭވާތަކުގައި ހުންނަ ވިޓަމިން ސީގެ 20 ގުނަ ކުންނާރުގައި ހުރެއެވެ. ކުންނާރުގައި ހިމެނޭ ވިޓަމިންތަކާއި މައުދަންތަކުގެ ސަބަބުން އަންނަނިވި ފައިދާކުރެއެވެ.
  • ބަނޑުގައި ރިހުން ލުއިކޮދިނުން
  • ހަލާކުވެފައިވާ ކަރުތެރެ ރަގަޅުކޮށް ދިނުން
  • ހިތާއި ލޭހޮޅިތަކުގެ މަސައްކަތަށް ވާގިވެރިވުން
  • ކާހިތްވުމަށް މަގުފަހި ކުރުން
  • ލޭހޮޅިތަކާއި ލޭނާރުތައް ސާފުކޮށް ދިނުން
• އެމިނޯ އެސިޑް ތައް: ހަށިގަނޑު ފުރިހަމައަށް މަސައްކަތް ކުރުމަށް ޕްރޮޓީންގެ ތެރޭގައި ގުނާލެވޭ 24 އެމިނޯ އެސިޑް ބޭނުންވެއެވެ. ކުންނާރުގައި 24-18 އާއި ދެމެދުގެ އަދަދަކަށް އެމިނޯ އެސިޑް ހުރެއެވެ. ކުންނާރުގައި ހިމެނޭ އެމިނޯ އެސިޑް ތަކަކީ ހަށިގަނޑުގެ ވަރަށް ގިނަ ބައިތަކުގެ މަސައްކަތްތަކަށް ބޭނުންވާ މާއްދާ ތަކެކެވެ. އެގޮތުން ކައްޓާއި ހަމާއި މަހާއި ހޯރމޯނާއި ލެއާއި ނިއުރޯޓްރާންސްމިޓަރތަކާއި އެންޒައިމްތައް އުފައްދައި، އޭގެ މަސައްކަތްތައް ހަލުވިކޮށް ފުރިހަމަ ކުރުމުގައި އެމިނޯ އެސިޑްތަކުގެ ބޭނުން ހިފައެވެ. އެމިނޯ އެސިޑަތަކަކީ ހަށިގަނޑުން އުފައްދާ 50 ހާހަށްވުރެ ގިނަ ޕްރޮޓީންތައް އުފެއްދުމަށް ބޭނުންތެރި މާއްދާ ތަކެކެވެ. އަނެއްކޮޅުން ތަފާތު ބަލިތަކާއި، އަދި ހަށިގަނޑުގައި ހެދޭ ފާރުގަނޑު ފަސޭހަވުމަށް އެހީތެރިވެދޭ މާއްދާ ތަކެކެވެ.
• ކެންސަރުން ރައްކާތެރި ކޮށްދިނުމުގެ ގޮތުން ކުންނާރުގައި ހިމެނޭ ފެނުގެ ބައިން ޓިއުމަރު ގެ ސެލްތައް ހުއްޓުވުން މަނާކުރެއެވެ. ކުންނާރުގައި ގިނައަދަދަކަށް އެންޓި އޮކްސިޑެންޓް ތައް ހުރެއެވެ. އެކަމުގެ ސަބަބުން ތަފާތު ބާވަތްތަކުގެ ކެންސަރުން ރައްކާތެރިވުމަށް އެހީތެރި ވެއެވެ. އޭގެ ތެރޭގައި، ފުރަމޭގެ ކެންސަރު، ގޮހޮރުގެ ކެންސަރު، އުރަމަތީގެ ކެންސަރު، އަދި ޕްރޮސްޓޭޓް ކެންސަރު ހިމެނެއެވެ. ކުންނާރު ފަނީގައި ކެންސަރުގެ ސެލްތައް މަރާލުމުގެ ބާރު ހުރެއެވެ. ނަތީޖާއެއްގެ ގޮތުން ދިރެ ބޮޑުވަމުންދާ ޓިއުމަރުގެ ސެލްތަކުގެ އަދަދު ދަށްކުރެއެވެ. ކުންނާރުގައި ވަރަށް ގިނައިން “ބެޓޫލިނިކް އެސިޑް” ހުރެއެވެ. ކެންސަރުގެ ސެލްތައް މަރާލައިގެން "މެލާނޯމާ" ގެ އަސަރު ކުޑަކުރުމަށް ބެޓޫލިނިކް އެސިޑް ބޭނުން ކުރެވެއެވެ.
• ކުންނާރުގައި ގިނަ އަދަދަކަށް "އެންތޯސިއެނިން"، ވިޓަމިން ސީ، އަދި "ގެލިކް އެސިޑް" ހުރެއެވެ. މި މާއްދާތައް ހުރުމަކީ ހިތުގެ ދުޅަހެޔޮކަމަށް ބޭނުންތެރި ކަމެކެވެ. ކުންނާރުގައި ޕޮޓޭސިއަމް ގިނައިން ހުރުމަކީ އޭގެ ސަބަބުން ލޭގެ ޕްރެޝަރު ކޮންޓްރޯލް ކުރުމަށް އެހީތެރިވެދޭ ކަމެކެވެ. ކުންނާރުގައި ގުލްކޯޒް، ފްރަކްޓޯޒް، ރަމްނޯޒް، އަދި ސުކްރޯޒް، އެކުލެވިގެންވުމުން، ކުންނާރު ބޭނުންކުރުމުން ހަށިގަނޑަށް ހަކަތައާއި ބާރު ލިއްބައިދެއެވެ.
• ނިދިނައުމުގެ މައްސަލަ ހައްލުކޮށްދީ، ނުތަނަވަސްކަން ފިލުވައިލުމަށް ކުންނާރުގައި “ލިނޯލެނިކް އެސިޑް” އަދި “ލިނޯލެއިކް އެސިޑް” ހުރެއެވެ. މިއީ ސިކުނޑިއާއި، ނާރުތަކުގެ ނިޒާމް ރައްކާތެރިކޮށްދީ، ހާސްވެ ކަންބޮޑުވުން ފިލުވައިދީ، މޫޑު ހަމައަކަށް އެޅުވުމުގައި އެހީތެރިވާ މާއްދާ ތަކެކެވެ. މިއީ ނިދުމަށް އެހީތެރިވެދީ، ފިއްތުއްތަކުން ދުރުކޮށްދީ، ރުޅި އާއި ނުތަނަވަސްކަން ކުޑަކޮށްދިނުމުގައި އެހީތެރިވެދޭ މާއްދާ ތަކެކެވެ. ކުންނާރުގެ ދިޔައިން ހޯދިފައިވާ ބާރުގަދަ ކެމިކަލް “ޖުޖޫބޮސައިޑް އޭ” އަކީ ސިކުނޑީގައިވާ “ހިޕޯކެމްޕަސް” އޭކިޔާ ހިސާބަށް ބާރުފޯރުވާ އެއްޗެކެވެ. އަދި މިއީ ނިދުމަށް އެހީތެރިވެދޭ މާއްދާ އެކެވެ.
• ހަޖަމުކުރުމުގެ މައްސަލަތައް ހައްލު ކުރުމަށް ބަލާލިޔަސް ކުންނާރަކީ ވަރަށް ފަސޭހައިން ހަޖަމުކުރެވޭ މޭވާ އެކެވެ.
• މޭނުބައިކުރުމާއި ހޮޑުލުން، އަދި ބަނޑުގައި ރިހުން ލުއިކުރުމަށް ކުންނާރު ބޭނުންކުރެވެއެވެ. އަދި މިއީ ބަނޑުގައި ވައިހެދުމުގެ މައްސަލަ ލުއިކޮށްދޭ މޭވާ އެއްވެސް މެއެވެ.
• ކުންނާރަކީ ލޭސާފުކޮށްދޭ އެއްޗެކެވެ. އެއީ އޭގައި ހިމެނޭ “ސެޕޯނިން”، “އެލްކަލޮއިޑް” އަދި “ޓްރައިޓަރޕެނޮއިޑް” ތަކުގެ ސަބަބުންނެވެ.
• ކުންނާރުގައި ފެން ގިނައިން ހުރުމަކީ ކުންނާރު ބޭނުން ކުރުމުން، ކަރުހިއްކުން ފިލުވައިދޭ ކަމެކެވެ. ނޭވާކުރުވުމާއި، ދާހިއްލުމުގެ މައްސަލައަށް ވެސް ކުންނާރު ބޭނުންކުރުމުން ލުއިކަން ލިބެއެވެ.
• ކުންނާރުގައި ހިމެނޭ ފައިޓޯކެމިކަލްތަކާއި، ވިޓަމިން ސީގެ ސަބަބުން، ފާރުގަނޑު ފަސޭހަވުން އަވަސްވެ، ހަށިގަނޑުގެ ދިފާޢީ ބާރު ރަގަޅުކޮށް ދެއެވެ. އަދި މިމާއްދާތަކުގައި ހުންނަ ދުޅަތަކާއި ދެކޮޅަށް މަސައްކަތްކުރުމުގެ ބާރުގެ ސަބަބުން، ރާއްޖެބައްޔާއި، އެހެނިހެން ހުޅުތައް ދުޅަވުމުގެ ބަލިތަކުން ކުރިމަތިވާ އުދަނގޫތައް ކުންނާރު ބޭނުންކުރުމުން ލުއިކޮށް ފަސޭހަކޮށްދެއެވެ.
• ފުރަމޭ ރައްކާތެރި ކަމަށް ބެއްޔަސް ކުންނާރުގައި ފުރަމޭގެ މަސައްކަތެއް އީޖާބީ އަސަރެއް އެކުލެވިގެންވެއެވެ. އެންޓި އޮކްސިޑެންޓެއްގެ ގޮތުގައި މަސައްކަތްކޮށްގެން ، ކުންނާރުން ފުރަމޭއަށް ރައްކާތެރިކަން ހޯދައިދެއެވެ. “އޮކްސިޑޭޓިވް ސްޓްރެސް” އަކީ ފްރީ ރެޑިކަލްތަކުން ހަށިގަނޑަށް ގެއްލުންދޭ މަސައްކަތެކެވެ. އެންޓި އޮކްސިޑެންޓް ތައް ފްރީ ރެޑިކަލްތައް ސާފުކޮށް، އެއިން ހަށިގަނޑުގެ ސެލްތަކަށް ލިބޭ ގެއްލުން ކުޑަކޮށް ދެއެވެ. އޮކްސިޑޭޓިވް ސްޓްރެސް އާއި ހަނގުރާމަ ކުރާނެ، ކެމިކަލްތައް ކުންނާރުގައި ހުރެއެވެ.
• ކުންނާރުގައި ހިމެނޭ “ބެޓޫލިނިކް އެސިޑް” އަދި “ޑައިހައިޑްރޯބެޓޫލިނިކް އެސިޑް” އަކީ އޭޑްސް ވައިރަސް އާއި ދެކޮޅަށް މަސައްކަތް ކުރުމުގެ ގާބިލިއްޔަތު ހުރެދާނެ މާއްދާ ތަކެއްކަމަށް ވެދާނެ ކަމަށް ދިރާސާތައް ބުނެއެވެ.