ޓެރަރިސްޓް ޖަމާއަތްތަކާއި ބޮޑެތި މަސްތުވާތަކެތީގެ ނެޓްވޯކްތަކާ ގުޅުންހުރި މީހުން މިނިވަންވުމާއި، ދައުވާތައް ސާބިތުނުވުމާއި، ޕެރޯލްގެ ދަށުން ދޫކޮށްލުމާ ގުޅިގެން، ރާއްޖޭގެ އަދުލު އިންސާފުގެ ނިޒާމާއި ކަރެކްޝަނަލް ސާވިސްއަށް އޮތް އިތުބާރު ވަނީ ވަރަށް ބޮޑަށް ކުޑަވެފައެވެ. ސިޔާސީ މުރާސިލުންނާއި ފާޑުކިޔާ ފަރާތްތަކުން ތުހުމަތުކުރާ ގޮތުގައި، އާންމު ރައްޔިތުންނަށް ގާނޫނުގެ އެންމެ ހަރުކަށި އަދަބު ލިބެމުންދާއިރު، މުއްސަނދި އަދި ނުފޫޒުގަދަ މީހުންނަށް މިފަދަ ލުއިތައް ލިބުމަކީ މުއައްސަސާތަކުގެ ތެރޭގައި އޮތް ކޮރަޕްޝަނާއި ސިޔާސީ ނުފޫޒު ހާމަކޮށްދޭ ކަމެކެވެ.

 ޓެރަރިޒަމާ ގުޅުންހުރި މީހުންނާއި މަސްތުވާތަކެތީގެ އިސް މީހުން ދޫކޮށްލުން

ނުރައްކާތެރި ކުށްވެރިން ބެލެހެއްޓުމުގައި ކަމާބެހޭ އިދާރާތަކުން އަމަލުކުރާ ގޮތާ މެދު ފަހަކަށް އައިސް ވަނީ ވަރަށް ބޮޑަށް ފާޑުކިޔުން އަމާޒުވެފައެވެ:

ޓެރަރިޒަމާއި އައި.އެސްއާ ގުޅުންހުރި މީހުން: ޓެރަރިޒަމް މަނާކުރުމުގެ ގާނޫނުގެ ދަށުން ހައްޔަރުކުރި ގިނަ އަދަދެއްގެ ބަޔަކު ވަނީ ދޫކޮށްލާފައެވެ. މީގެ ތެރޭގައި އައި.އެސް ފިކުރު ފެތުރުމާއި، ހަމަނުޖެހުމަށް ހިތްވަރުދިނުމާއި، ބޭރުގެ ހަނގުރާމަތަކަށް މީހުން ފޮނުވުމަށް އެހީތެރިވި ކަމަށް ތުހުމަތުކުރެވޭ މީހުން ހިމެނެއެވެ. މި މީހުން މިނިވަންވުމުގެ ސަބަބެއް ކަމަށް އިދާރާތަކުން ބުނަނީ އިޖުރާއީ ލަސްވުންތަކާއި، ވަކީލުން ހަމަނުޖެހުމާއި، ތަހުގީގީ އިދާރާތަކުން އެކަށީގެންވާ ހެކި ހުށަނޭޅުމެވެ.

މަސްތުވާތަކެތީގެ އިސް މީހެއްގެ ޕެރޯލް މައްސަލަ: އައްޑޫގެ މަސްތުވާތަކެތީގެ ނެޓްވޯކެއްގެ އިސް މީހެއް ކަމަށްވާ، 98.6 ކިލޯގެ މަސްތުވާތަކެތި އެތެރެކުރި މައްސަލައިގައި 25 އަހަރުގެ ޖަލު ހުކުމެއް ތަންފީޒު ކުރަމުންދިޔަ އަބްދުއްލާ އިބްރާހީމް (އަބުޗާ) ޕެރޯލްގެ ދަށުން ދޫކޮށްލުމާ ގުޅިގެން އާންމުންގެ ނުރުހުން އިންތިހާއަށް ބޮޑުވިއެވެ. މި މައްސަލައިގައި ސަރުކާރުން ވަނީ އޭނާގެ ޕެރޯލް ބާތިލްކޮށް، ޕެރޯލް ބޯޑުގެ ހަ މެންބަރަކު މަގާމުން ވަކިކޮށްފައެވެ. ނަމަވެސް، މި ހާދިސާއިން ހާމަވީ ދައުލަތުން ގާނޫނު ތަންފީޒު ކުރުމުގެ ނިޒާމުގައި ހުރި ދޯހަޅިކަމެވެ.

ބޮޑެތި މައްސަލަތަކުގައި ދައުވާ ސާބިތުނުވުން: 61 ކިލޯ އަދި 72 ކިލޯގެ މަސްތުވާތަކެތީގެ މައްސަލަތަކުގައި އިސްކޮށް އުޅުނު ކަމަށް ތުހުމަތުކުރެވޭ މީހުން، ހެކީގެ ބަލިކަށިކަމުގެ ބޭނުން ހިފައިގެން މިނިވަންވާއިރު، އާދައިގެ ކުށްވެރިންނަށް ދިގު މުއްދަތުގެ ހުކުމް ކުރަމުންދާތަން ފެނުމުން، މިކަމުގައި ފުލުހުންނާއި ކޯޓުތަކުގެ މެދުގައި ނުސީދާ އެއްބަސްވުމެއް އޮވެގެން ރޭވުމެއްގެ ތެރޭން ހިނގާކަންތަކެއްގެ ގޮތުގައި ދެކޭމީހުން މަދެއްނޫނެވެ.

ނުފޫޒާއި މުއައްސަސާތަކުގެ ކޮރަޕްޝަންގެ ތުހުމަތުތައް: ނުފޫޒުގަދަ މީހުންނާއި އާދައިގެ ކުށްވެރިންނާ މެދު އަމަލުކުރާ ގޮތުގައި ހުރި ތަފާތުތަކުގެ ސަބަބުން، ތަންފީޒީ އިދާރާތަކުގެ އިތުބާރު ވަނީ ގެއްލިފައެވެ:

ދެ ފަންތިއެއްގެ އިންސާފު: ގިނަ ފަރާތްތަކުން ދެކޭ ގޮތުގައި ރާއްޖޭގައި އޮތީ ދެ ފަންތިއެއްގެ އިންސާފުގެ ނިޒާމެކެވެ. ފައިސާ ވެރިންނާއި ސިޔާސީ ނުފޫޒު އޮންނަ މީހުން ގާނޫނީ ލޫޕްހޯލްތަކުގެ ބޭނުން ހިފައިގެން ސަލާމަތްވާއިރު، އެފަދަ ބާރެއް ނެތް އާދައިގެ މީހުން ދަނީ ހުކުމް ފުރިހަމަކުރަމުންނެވެ.

މާލީ މަންފާގެ ތުހުމަތު: ކުށްވެރިން މުއްދަތުގެ ކުރިން ދޫކުރުމާއި، ގަވާއިދާ ހިލާފަށް ޕެރޯލް ދިނުމަކީ ރިޝްވަތާއި ފަސާދައިގެ ތެރެއިން ހިނގާ ކަންކަން ކަމަށް ފާޑުކިޔާ ފަރާތްތަކުން ތުހުމަތުކުރެއެވެ. އަދި މިހާރުގެ ސަރުކާރަށް އިތުރު ދައުރެއް ލިބިދާނެ ކަމަށް ނުދޭކޭ ހިނދު، މިހާރު މިކުރަމުން ގެންދާ ކަމަކީ ހޯދެން އޮތް މާލީ މަންފާއެއް ވިއްޔާ ނުފޫޒު ބޭނުންކޮށްގެން ވިޔަށް ދަމައިގަތުމަށް ހިންގަމުން ގެންދާ ނޭދޭ އަމަލުތަކެކެވެ.

މުއައްސަސާތަކުގެ ބަލިކަށިކަން: ފުލުހުންނާއި، ކަރެކްޝަނަލް ސާވިސް އަދި އެޓަރނީ ޖެނެރަލާއި އޮފީހުގެ މަންދޫބުން ތިބޭ ބޯޑުތަކުން މިފަދަ ނިންމުންތައް ނިންމުމަކީ، އެއީ ގާބިލްކަން ނެތުމުން ވާކަމެއްތޯ ނުވަތަ ގަސްދުގައި ކުރާ ކަމެއްތޯ ސުވާލު އުފެދޭ ކަމެކެވެ.

ޒިންމާދާރުކުރުވުމުގެ މުހިންމުކަން: ކުށްވެރިން ދޫކޮށްލެވުނީ އިދާރީ އޮޅުމަކުން ކަމަށް ސަރުކާރުގެ ވަޒީރުން ވިދާޅުވި ނަމަވެސް، އާންމުން އެދެނީ ފުރިހަމަ ދެފުށް ފެންނަ ނިޒާމަކަށެވެ. ނިޒާމީ މައްސަލަތަކަށް ހައްލެއް ނުގެނެސް ހަމައެކަނި ބޯޑު މެންބަރުން ވަކިކުރުމަކީ، މަތީ ފަންތީގައި ހިނގާ ކަންކަމާ މެދު އޮތް ޝައްކުތައް ފިލާނެ ކަމެއް ނޫނެވެ. ޕެރޯލްގެ ނިންމުންތަކާއި، ޓެރަރިޒަމްގެ ތުހުމަތުވާ މީހުން ދޫކުރުމާއި، ރައީސުލްޖުމްހޫރިއްޔާއަށް ލިބިވަޑައިގަންނަވާ މައާފް ދިނުމުގެ ބާރު ބޭނުންކުރާ ގޮތް މިނިވަން އޮޑިޓަކުން ބަލައި ފާސްނުކުރާހާ ހިނދަކު، ގާނޫނީ ސިފަޔަށް އޮތް އިތުބާރު އިއާދައެއް ނުވާނެއެވެ.